ဆောင်းဆီထွက်သီးနှံ နေကြာစိုက်ပျိုးမည့် တောင်သူများအား နေကြာမျိုးစေ့နှင့် မြေဩဇာများ ချီးမြှင့်ပေးအပ်

 

ဘားအံ နိုဝင်ဘာ ၂၇

ကရင်ပြည်နယ်အတွင်း ဆီဖူလုံမှု ပြည့်မီကျော်လွန်ရေး အတွက် ၂၀၂၅-၂၀၂၆ ခုနှစ် ဆောင်းရာသီတွင် ဆောင်းဆီထွက်သီးနှံများဖြစ်သော ဆောင်းမြေပဲ ၃၁၆၀၇ ဧက၊ ဆောင်းနှမ်း ဧက ၄၁၇၅၀၊ ဆောင်းနေကြာ ၃၅၆၆ ဧက စိုက်ပျိုးရန် လျာထားဆောင်ရွက်လျက်ရှိရာ ယမန်နေ့ မွန်းလွဲပိုင်းက ဘားအံမြို့ ဇွဲကပင်ခန်းမ၌ ဆောင်းဆီထွက်သီးနှံ နေကြာစိုက်ပျိုးမည့် တောင်သူများအား ပြည်နယ်အစိုးရအဖွဲ့က နေကြာမျိုးစေ့နှင့် မြေဩဇာများ ချီးမြှင့် ပေးအပ်သည်။

ဦးစွာ ပြည်နယ်ဝန်ကြီးချုပ် ဦးစောမြင့်ဦးက အမှာစကား ပြောကြားပြီး ဘားအံမြို့နယ်နှင့် လှိုင်းဘွဲမြို့နယ်အတွင်းရှိ ဆောင်းနေကြာ ၂၇၀၇ ဧက စိုက်ပျိုးမည့် တောင်သူများအား ရေဆင်း စပ်မျိုး-၁၊ ဆင်းရွှေကြာ-၂ နေကြာ မျိုးစေ့ သုံးကီလိုဂရမ်အထုပ် ၂၇၀၇ ထုပ်၊ ယူရီးယားဓာတ်မြေဩဇာ အိတ် ၁၀၀၊ သဘာဝမြေဩဇာ အိတ် ၁၀၀ တို့ကို ချီးမြှင့်ပေးအပ်၍ ဆောင်းနေကြာ စိုက်ပျိုးမည့် တောင်သူများကိုယ်စား တောင်သူတစ်ဦးက ကျေးဇူးတင်စကား ပြန်လည်ပြောကြားကာ ပြည်နယ် ဝန်ကြီးချုပ်နှင့် တာဝန်ရှိသူများသည် နေကြာစိုက်ပျိုးမည့် တောင်သူများအား ရင်းနှီးနွေးထွေးစွာ တွေ့ဆုံနှုတ်ဆက် အားပေးစကားပြောကြားပြီး တောင်သူများအား ချီးမြှင့်ပေးအပ်မည့် နေကြာမျိုးစေ့နှင့် မြေဩဇာများကို ကြည့်ရှုစစ်ဆေးသည်။

နေကြာမျိုးစေ့နှင့် သွင်းအားစု ချီးမြှင့်ပေးအပ်ပွဲ မစတင်မီနှင့် အခမ်းအနားအပြီးတို့တွင် ပြည်နယ် စိုက်ပျိုးရေးဦးစီးဌာနက နေကြာ စိုက်ပျိုးနည်းစနစ်၊ မြေဩဇာအသုံးပြုနည်း၊ အပင်ပြုစုစောင့်ရှောက် နည်းများကို အသိပညာပေး ဆွေးနွေး ဟောပြောခဲ့သည်။

ထို့ပြင် ကရင်ပြည်နယ်အစိုးရအဖွဲ့ ပြည်နယ်မြေပြင် ကွင်းဆင်းစာရင်းကောက်ယူရေး ကြီးကြပ်မှု ကော်မတီ၏ (၇/၂၀၂၅) ညှိနှိုင်းအစည်းအဝေးကို ယနေ့နံနက် ၁၀ နာရီတွင် ပြည်နယ်အစိုးရအဖွဲ့ရုံး အစည်းအဝေးခန်းမ(၂)၌ ကျင်းပခဲ့ကြောင်း သိရသည်။

ပြည်နယ်(ပြန်/ဆက်)