မန္တလေးဗဟိုအကျဉ်းထောင်မှ အကျဉ်းသား အကျဉ်းသူ ၁၈၅ ဦး ပြစ်ဒဏ်လွတ်ငြိမ်းသက်သာခွင့်ရရှိ

 

မန္တလေး နိုဝင်ဘာ ၂၇

အကျဉ်းထောင်/အချုပ်ထောင်/အကျဉ်းစခန်း အသီးသီးတွင် ပြစ်ဒဏ်ကျခံလျက်ရှိသော အကျဉ်းသား အကျဉ်းသူများကို ယနေ့တွင် ပြစ်ဒဏ်မှ လွတ်ငြိမ်းသက်သာ ခွင့်ပြုလိုက်ရာ မန္တလေးမြို့ရှိ ဗဟို အကျဉ်းထောင်မှ အကျဉ်းသား အကျဉ်းသူ ၁၈၅ ဦး လွတ်ငြိမ်းသက် သာခွင့်ရရှိခဲ့ကြောင်း သိရသည်။ 

အဆိုပါ မန္တလေးဗဟိုအကျဉ်းထောင်မှ ပြစ်ဒဏ်လွတ်ငြိမ်း သက်သာခွင့် ရရှိခဲ့ကြသူများအား မန္တလေးတိုင်းဒေသကြီး လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး နေလင်းစိုးနှင့် မန္တလေးတိုင်းဒေသကြီး အကျဉ်းဦးစီးဌာန ညွှန်ကြားရေးမှူး ဦးချိုဝင်းထွန်းတို့က ယနေ့နံနက်ပိုင်းတွင် မန္တလေးဗဟိုအကျဉ်းထောင်၌ တွေ့ဆုံ၍ ဆုံးမဩဝါဒ စကားများ ပြောကြားသည်။ 

ယနေ့ ပြစ်ဒဏ်လွတ်ငြိမ်းခွင့်ပြု လိုက်ခြင်းနှင့်စပ်လျဉ်း၍ မန္တလေးတိုင်းဒေသကြီး အကျဉ်းဦးစီးဌာန ညွှန်ကြားရေးမှူး ဦးချိုဝင်းထွန်း က “သူတို့တွေက စည်းကမ်းတကျ နေထိုင်လာကြတဲ့သူတွေလည်း ဖြစ်ပါတယ်။ အခုလို လွတ်မြောက်တဲ့အပေါ်မှာ သူတို့လည်း ပျော်ရွှင်သလို ကျွန်တော်တို့လည်း ပိုပြီး ပျော်ရွှင်ပါတယ်။ ဝမ်းသာပီတိ ဖြစ်မိပါတယ်။ သူတို့အတွက်လည်း စားစရိတ်၊ ခရီးစရိတ်တွေ ထောက်ပံ့ပေးအပ်ပါတယ်။ သူတို့တွေအနေနဲ့လည်း ဆက်လက်ပြီး နိုင်ငံ့အကျိုးအတွက် ကျရာနေရာကနေ ဝိုင်းဝန်းကူညီ ဆောင်ရွက် သွားကြလိမ့်မယ်လို့လည်း ကျွန်တော့်အနေနဲ့ သုံးသပ် မိပါတယ်”ဟုပြောသည်။ 

ပြစ်ဒဏ်လွတ်ငြိမ်းခွင့်ရရှိခဲ့သူ တစ်ဦးကလည်း “အခုလိုလွတ်ငြိမ်း ခွင့်ရတဲ့အတွက် အလွန်ကိုဝမ်းသာ ပါတယ်။ ဒီလိုလွတ်မြောက်မယ်လို့ မိသားစုတွေကလည်း ကြိုတင် သိရှိထားခြင်းမရှိပါဘူး။ ဒါပေမယ့် သိရှိပြီးတဲ့အချိန်မှာပဲ မိသားစုတွေက လာရောက်ကြိုဆိုနေကြပါပြီ။ အခုလို မိသားစုနဲ့ ပြန်လည် ဆုံစည်းခွင့်ပေးတဲ့ အတွက်လည်း တာဝန်ရှိသူတွေကို ကျေးဇူးတင်ရှိပါတယ်။ သူငယ်ချင်းတွေလည်း လွတ်မြောက်တဲ့အထဲ ပါဝင်တဲ့အတွက်လည်း ပျော်ရွှင်မိပါတယ်” ဟုပြောသည်။ 

ယနေ့တွင် မန္တလေးတိုင်းဒေသကြီးအတွင်းရှိ အကျဉ်းထောင် ငါးထောင်မှ အကျဉ်းသား အကျဉ်းသူ စုစုပေါင်း ၂၆၅ ဦး ပြစ်ဒဏ်လွတ် ငြိမ်းသက်သာခွင့် ရရှိခဲ့ကြောင်း သိရသည်။  

မောင်အေးချမ်း