ပဲခူးတိုင်းဒေသကြီးအတွင်း ၂၀၂၁ ခုနှစ် ဖေဖော်ဝါရီ ၁ ရက်မှ ၂၀၂၂ ခုနှစ်၊ ဇန်နဝါရီ အထိ အကိုင်အခွင့်အလမ်း (၄၇၉၀၃) ဦး ဖန်တီးပေးနိုင်ခဲ့
ပဲခူး ဇန်နဝါရီ ၂၁
တိုင်းဒေသကြီးအတွင်း လာရောက်ရင်းနှီးမြှုပ်နှံသည့် လုပ်ငန်းရှင်များအား ရသင့်ရ ထိုက်သည့်အခွင့်အရေးများခံစားရရှိနိုင်ရန်နှင့် ဥပဒေအရအကာအကွယ်ပေးရမည့်လုပ်ငန်း စဉ်များကို ဆောင်ရွက်ပေးရမည်ဖြစ်ကြောင်း ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း က ပြောကြားသည်။
ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာခန်းမ၌ ယနေ့၊ မွန်းလွဲပိုင်း တွင်ကျင်းပသည့် ပဲခူးတိုင်းဒေသကြီးရင်းနှီး မြှုပ်နှံမှုကော်မတီ အစည်းအဝေး (၁/၂၀၂၂) ၌ ထိုသို့ပြောကြားခဲ့ခြင်းဖြစ်သည်။
ဆက်လက်၍ တိုင်းဒေသကြီးဝန်ကြီးချုပ် က တိုင်းဒေသကြီးအတွင်း CMP ကဲ့သို့သော အထည်ချုပ်လုပ်ငန်းများနှင့် စိုက်ပျိုးရေးလုပ်ငန်းများတွင် အသုံးဝင်သည့် ဓာတ်မြေဩဇာ ထုတ်လုပ်ရေးလုပ်ငန်းများနှင့် အလုပ်အကိုင်အခွင့်အလမ်းများစွာရရှိစေမည့်စက်ရုံများကို အဓိကထားခွင့်ပြုပေးလျက်ရှိကြောင်း၊ စက်မှုလုပ်ငန်းများခွင့်ပြုချထားပေးရာတွင် သဘာဝ ပတ်ဝန်းကျင်ဂေဟစနစ်ကိုမထိခိုက်စေရန်နှင့် စက်မှုဇုန်ဥပဒေအရလိုက်နာရမည့် စည်းကမ်း ချက်များအတိုင်းကြီးကြပ်ဆောင်ရွက်သွားရမည်ဖြစ် ကြောင်းမှာကြားသည်။
ထို့နောက် ပဲခူးတိုင်းဒေသကြီးရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာန၊ ညွှန်ကြားရေးမှူး က တိုင်းဒေသကြီအတွင်း ရင်းနှီးမြှပ်နှံမှုဆိုင်ရာကိစ္စရပ်များနှင့်စပ်လျဉ်း၍ ရှင်းလင်းတင်ပြရာ ကော်မတီဝင်များက အကြံပြုဆွေးနွေးကြပြီး တိုင်းဒေသကြီး ဝန်ကြီးချုပ် ကဥပဒေလုပ်ထုံးလုပ်နည်းနှင့်အညီဆောင်ရွက်ပေးသည်။
ပဲခူးတိုင်းဒေသကြီးအတွင်း ၂၀၂၁ ခုနှစ် ဖေဖော်ဝါရီ ၁ ရက်မှ ၂၀၂၂ ခုနှစ်၊ ဇန်န ဝါရီ လအထိ နိုင်ငံခြားသားရင်းနှီးမြှုပ်နှံမှုနှင့် မြန်မာနိုင်ငံသားရင်းနှီးမြှုပ်နှံမှု အမေရိကန်ဒေါ်လာ (၁၀၄ ဒသမ ၄၈၃) သန်းနှင့် မြန်မာကျပ်ငွေ (၈၃၂၉ ဒသမ ၁၅)သန်း ဝင်ရောက်ခဲ့ပြီး အလုပ် အကိုင်အခွင့်အလမ်း (၄၇၉၀၃) ဦး ဖန်တီးပေးနိုင်ခဲ့ကြောင်း သိရသည်။
(သတင်းစဉ်)
No comments