ချစ်စရာ့ကင်ညာ

မြင်းမူမောင်နိုင်မိုး 

ကမ္ဘာ့သတင်းမီဒီယာကောင်စီ (World Association of Press Council)၏ ပုံမှန်အစည်းအဝေး (Annual General Meeting) ကို တစ်နှစ်တစ်ကြိမ်နှစ်စဉ် ကျင်းပခဲ့သည်ဖြစ်ရာ ၂၀၁၉ ခုနှစ် စက်တင်ဘာလအတွင်းက အဇာဘိုင်ဂျန်နိုင်ငံ ဘာကူးမြို့၌ ကျင်းပခဲ့သည်မှာ နောက်ဆုံးအကြိမ်ပင်ဖြစ်ပြီး နောက်တစ်နှစ်အကြာတွင် အာဖရိကအရှေ့ပိုင်း ကင်ညာ (Kenya) နိုင်ငံ၌ ကျင်းပရန် သဘောတူညီခဲ့ကြလေသည်။ သို့ရာတွင် ၂၀၂၀၊ ၂၀၂၁ ခုနှစ်များတွင် ကိုဗစ် - ၁၉ ရောဂါပိုး၏ ကူးစက်ပြန့်ပွားမှုအခြေအနေများအရ အဆိုပါအစည်းအဝေးကို ကျင်းပနိုင်ခြင်း မရှိခဲ့ပေ။ 

ယခုအခါ ကိုဗစ် - ၁၉ ရောဂါအခြေအနေမှာ လွန်ခဲ့သော နှစ်ကာလများနှင့်စာလျှင် အနည်းငယ် လျော့ပါးလာသည်ဟု ဆိုနိုင်ပေသည်။ သို့ဖြစ်၍ ပုံမှန်အစည်းအဝေးကို ၂၀၂၂ ခုနှစ် မေ ၃ ရက်မှ ၈ ရက်အထိ ခြောက်ရက်ကြာ ကျင်းပပြုလုပ်မည် ဖြစ်ကြောင်း ကမ္ဘာ့သတင်းမီဒီယာကောင်စီက အကြောင်းကြားလာခဲ့သည်။ ၂၀၂၂ ခုနှစ် ဇန်နဝါရီ လမှ ဧပြီလအတွင်း လေးကြိမ်တိုင်တိုင် အစည်းအဝေးပြုလုပ်ခဲ့ပြီးနောက် ကျွန်တော်တို့ မြန်မာနိုင်ငံ သတင်းမီဒီယာကောင်စီမှ အဖွဲ့ဝင်နှစ်ဦး အစည်းအဝေး တက်ရောက်မည်ဖြစ်ကြောင်း အကြောင်းပြန်ကြားခဲ့သည်။ 

သို့နှင့်ပင် အာဖရိကတိုက်အရှေ့ပိုင်းရှိ ကင်ညာဆိုသော နိုင်ငံလေးသို့ အစည်းအဝေးတက်ရောက်ရန် ၂၀၂၂ ခုနှစ် မေ ၂ ရက်တွင် ကျွန်တော်နှင့်ကောင်စီဝင် ဦးအေးချမ်းတို့ ခရီးစဉ် စတင်ခဲ့ရပေတော့သည်။ 

ဂျိုမိုကင်ညာတာ ဒါလည်းမဆန်းပါတယ်

ကင်ညာနိုင်ငံသို့ သွားရမည်ဆိုတော့ ၁၉၇၅၊ ၁၉၇၆ ခုနှစ်က တက်ရောက်ခဲ့သော ကျွန်တော်တို့ ဗိုလ်လောင်းသင်တန်း အမှတ်စဉ်(၅၁)က သူငယ်ချင်းများကို သတိရမိသည်။ အဘယ့်ကြောင့်ဆိုသော် ကျွန်တော်တို့ အပတ်စဉ်မှ သူငယ်ချင်းတစ်ဦးသည် ကင်ညာနိုင်ငံသမ္မတ ဂျိုမိုကင်ညာတာနှင့် ရုပ်ချင်း အလွန်ဆင်သည်ဟု တစ်ပတ်စဉ်လုံးက မှတ်ချက်ပြုကြခြင်းကြောင့်ဖြစ်သည်။ ထိုအချိန်က ကင်ညာသမ္မတ၏ ရုပ်ပုံကို သတင်းစာမှာ တွေ့မြင်ခဲ့ရသည်။ ထိုသူငယ်ချင်း သည် သူ့ကိုဂျိုမိုကင်ညာတာနှင့် တူသည်ဟုပြောလျှင် အလွန်စိတ်ဆိုးသည်။ လုံးဝမကြိုက်ပေ။ သူက မကြိုက်မှန်းသိလေ နောက်ပြောင်၍ ခေါ်ကြလေဖြစ်၏။ သူ့ခေတ်သူ့အခါနှင့် ခေတ်စားနေသော သီချင်းတစ်ပုဒ်ကို မှတ်မိသည်။ 

“ဆောင်းမှာနှင်းကျတာ ဒါလည်းမဆန်းပါတယ်”

“မိုးမှာ ပန်းပွင့်တာ ဒါလည်း မဆန်းပါတယ်”

ကင်ညာသမ္မတနှင့်တူသော သူငယ်ချင်းသည် ကျွန်တော်နှင့်တပ်စု တစ်စုတည်း၊ တစ်ဆောင်တည်း ဖြစ်လေသည်။ သူ့ကိုတိုက်ရိုက် ဂျိုမိုကြီးဟုခေါ်လျှင် သူသည်းမခံနိုင်လောက်အောင်ကို စိတ်တိုတတ်သဖြင့် တိုက်ရိုက်မခေါ်တော့။ မစတော့။ သို့သော် အဆောင်အတွင်းသို့ သူဝင်လာတော့မည်ကို မြင်သည်နှင့်တစ်ပြိုင်နက် အဆောင်သားအားလုံးက တညီတညွတ်တည်း သံပြိုင်သီဆိုလိုက်ကြသည့် တေးသံ မှာ…။

“ဆောင်းမှာနှင်းကျတာ ဒါလည်းမဆန်းပါတယ်” “မိုးမှာ ပန်းပွင့်တာ ဒါလည်းမဆန်းပါတယ်”

“ဂျိုမို ကင်ညာတာ ဒါလည်း မဆန်းပါတယ်”

ထိုသို့ သီချင်းဆိုသံကြားပြီး မကြာမီ ဂျိုမိုကြီး၏ ဆဲဆိုရေရွတ်သံများကို တစ်ဝကြီး ကြားရတော့၏။ တပ်စု(၂) တစ်ဆောင်လုံး ဗိုလ်လောင်းတွေ၏ ရယ်သံနှင့် ဖုံးလွှမ်းသွားလေတော့သည်။ လွန်ခဲ့သော နှစ်ပေါင်း ၄၇ နှစ်ကအဖြစ်ကို သတိရရင်း ကျွန်တော် ပြုံးမိသည်။

“ဪ…ခုတော့လည်း ဂျိုမိုကြီးရဲ့ကင်ညာကို ရောက်ရတော့မယ်လေ။”

မနီးလှတဲ့ခရီးအစ

မေ ၂ ရက် နံနက်၊ မြန်မာစံတော်ချိန် နံနက် ၁၀ နာရီခွဲတွင် ရန်ကုန်မြို့မှ မြန်မာ့လေကြောင်း ခရီးစဉ်ဖြင့် စတင်ထွက်ခွာသည်။ မြန်မာနိုင်ငံသတင်း မီဒီယာကောင်စီ၏ တတိယသက်တမ်း ပထမဆုံး ပြည်ပခရီးစဉ်ဖြစ်သဖြင့် မိမိ၏လုပ်ဖော်ကိုင်ဖက်များ စုံညီစွာလိုက်လံပို့ဆောင်ကြသည်။ ကိုမျိုးထွန်း၊ ကိုအောင်ပြည့်စုံ၊ ကိုရဲနိုင်စိုး၊ ကိုသက်နိုင်ဦး၊ ကိုသက်ပိုင်ထူး၊ ကိုအောင်သူထက်တို့ဖြစ်ကြသည်။ 

မလေးရှားနိုင်ငံ ကွာလာလမ်ပူလေဆိပ်သို့ ဒေသစံတော်ချိန် ၂ နာရီ မိနစ် ၂၀ (မြန်မာစံတော်ချိန် ၁၂ နာရီ မိနစ် ၅၀)ခန့်တွင် ရောက်သည်။ ဒုတိယ ခရီးစဉ်အဖြစ် ကာတာနိုင်ငံ ဒိုဟာမြို့သို့ ဒေသစံတော်ချိန် ၂၀ : ၃၅ နာရီတွင်မှ ဆက်လက်သွားရောက်ရမည် ဖြစ်ဖြစ်ရာ မလေးရှားလေဆိပ်တွင် ၆ နာရီခန့် စောင့်ဆိုင်းရမည်ဖြစ်လေသည်။  နေ့လယ်စာ ခေါက်ဆွဲပြုတ်တစ်ပွဲ မှာယူစားသောက်ရာ ကြက်သားဖတ်လေး နှစ်ဖတ်ပါသည်ကို မလေးငွေ ၃၁ ရင်းဂစ်ပေးရသည်။ မြန်မာငွေ နှင့်ဆိုလျှင် ကျပ် ၁၆၀၀၀ ခန့်ကျသည်။ ရန်ကုန်၌ ကျန်ရစ်သောအတွင်းရေးမှူးက နေ့လယ်စာစားပြီးပြီလားဟု လှမ်းမေးတော့ ခေါက်ဆွဲပြုတ်အကြောင်း ပြောပြလိုက်ရာ “ဘုရား…ဘုရား ဈေးကြီးလိုက်တာ” ဟု ပြော၏။ မတတ်နိုင်ပါ။ မြန်မာပြည်မှာ အစစအရာရာ ဈေးကြီးပါသည်ဟု ဘယ်လောက်ပင်ပြောပြော သူတစ်ပါး နိုင်ငံထက်တော့ သက်သာနေသေးတာ အမှန်ပါ။ ထိုအချိန်က မြန်မာပြည်၌ ကြေးအိုးပွဲကြီး တစ်ပွဲမှ ကျပ် ၄၅၀၀ ဆိုတာ အများဆုံးဖြစ်သည်ကို သတိရမိသည်။ 

မလေးရှားလေဆိပ်မှ ၂၀:၃၅ နာရီချိန် လေယာဉ် စတင်ပျံသန်းသည်။ လေယာဉ်ကြီးမှာ ခရီးသည် ၄၀၀ ကျော်ဆံ့သည်ဟု သိရသည်။ ထိုနေ့က လေယာဉ်ပေါ်တွင် ခရီးသည် ၃၀၀ ကျော်လိုက်ပါလာသည်။ လေယာဉ်ပေါ်မှာ ကျွေးမွေးသောအစားအစာများ အတော်လေးကောင်းပါသည်။ ခေါက်ဆွဲကြော်၊ ထမင်းဖြူ၊ ဝိုင်အရက်၊ ဝီစကီ နှစ်သက်ရာ မှာစား၍ရသည်။ အသားကတော့ အမဲသားနှင့် ငါးပဲ ဖြစ်လေသည်။ မလေးရှားနိုင်ငံ ကွာလာလမ်ပူမှ ကာတာနိုင်ငံ ဒိုဟာမြို့သို့ ဒေသစံတော်ချိန် ၁၁:၃၀ နာရီ မြန်မာ စံတော်ချိန်မှာ (၃-၅-၂၀၂၂ နေ့ နံနက် ၃ နာရီ ၄၅ မိနစ်) ကျမှ ရောက်ရှိသည်။ တမေ့တမြောအကြာကြီး လေယာဉ်စီးရသဖြင့် တစ်ကိုယ်လုံး ညောင်းညာကိုက်ခဲလှသည်။ လေယာဉ်ပျံသန်းကြာချိန်မှာ ၈ နာရီနှင့် ၄၅ မိနစ်ဖြစ်လေသည်။ 

ကာတာနိုင်ငံ ဒိုဟာလေဆိပ်မှာ ခမ်းနားစည်ကားလှပေသည်။ လေဆိပ်ထိုင်ခုံများပေါ်တွင် ခရီးသွားရန် အသင့်စောင့်ဆိုင်းနေသော လူမျိုးပေါင်းစုံကို တွေ့မြင်ရသည်။ လေဆိပ်တွင် ၃ နာရီနှင့် မိနစ် ၂၀ ခန့်မျှ စောင့်ဆိုင်းရပါသည်။ ဒေသစံတော်ချိန် ၁၂၅၀ (မြန်မာစံတော်ချိန် နံနက် ၅ နာရီခွဲခန့်)တွင် ကာတာမှ ထွက်ခွာသည်။ လေယာဉ်ပေါ်တွင်ရောက်ရှိ ဖြတ်သန်းရာနေရာများကို မြေပုံနှင့်တကွ ပြသ ထားသဖြင့် ကျွန်တော်တို့ ရောက်ရှိနေသောနေရာ များကို မှတ်သားကြည့်ရှုရသည်။ မလေးရှားမှ ကာတာ၊ ကာတာမှ ကင်ညာသို့ လေယာဉ်ပျံသန်းနေစဉ်  အောက်ဘက်အိန္ဒိယသမုဒ္ဒရာကြီးကို ရှည်လျားစွာ ဖြတ်သန်းရသည်ကို ငေးမျှော်ကြည့်မောရင်း အရှေ့အလယ်ပိုင်းဒေသ(Middle East) ရှိ ဆော်ဒီအာရေဗျ၊ အီဂျစ်၊ အီသီယိုပီးယား၊ တန်ဇန်းနီးယား၊ ယူဂန္ဓာ၊ ဆိုမာလီယာ အစရှိသောနိုင်ငံများကို ဖြတ်ကျော်နေရသည်ကို သတိပြုမိသည်။ ဤသို့ဖြင့် ကင်ညာနိုင်ငံ နိုင်ရိုဘီမြို့သို့ မေလ ၃ ရက် ဒေသစံတော်ချိန် ၁၀:၃၀ နာရီချိန် ရောက်ရှိခဲ့လေသည်။

နိုင်ငံပေါင်း ၂၃ နိုင်ငံ

လေဆိပ်ကိုရောက်တော့ ကျွန်တော်တို့ကို လာကြိုမည့်သူများက ရောက်မလာကြသေးပေ။ လာကြိုမည့် ကင်ညာသတင်းမီဒီယာကောင်စီထံသို့ ကိုအေးချမ်းက ဖုန်းဖြင့် ဆက်သွယ်သည်။ သူတို့ လာကြိုပါမည်။ နာရီဝက်ခန့် စောင့်ပေးပါဆိုသဖြင့် ကျွန်တော်တို့ စောင့်ဆိုင်းရင်း တက္ကစီယာဉ်မောင်း များနှင့်အဖွဲ့ကျကာ စကားတွေပြောဖြစ်လေသည်။ ကျွန်တော်တို့က နီဂရိုးလူမျိုးများဟု ခေါ်ဝေါ်လေ့ရှိသော ကင်ညာမြို့သားများမှာ အင်္ဂလိပ်ဘာသာစကားကို ကျွမ်းကျင်ရည်မွန်စွာ ပြောဆိုနိုင်ကြသည်။ သွက်လက်ချက်ချာသည်။ တက္ကစီအလိုရှိလျှင် သူတို့ နှင့်ဆက်သွယ်ပါဆိုပြီး ဖုန်းနံပါတ်တွေပေးသည်။ မကြာမီအမျိုးသမီးတစ်ဦးရောက်လာပြီး ကျွန်တော်တို့ကို လာခေါ်ပါသည်။ ထိုအမျိုးသမီးသည် ကင်ညာသတင်းမီဒီယာကောင်စီ အဖွဲ့ဝင်တော့မဟုတ်၊ ကင်ညာသတင်းမီဒီယာကောင်စီ၏ ကိုယ်စားလှယ်ပင် ဖြစ်လေသည်။ တည်းခိုရမည့် ဟိုတယ်ကို မွန်းတည့် (၁၂:၀၀) နာရီခန့်မှ ရောက်လေသည်။

ကျွန်တော်တို့ တည်းခိုရသည့်ဟိုတယ်မှာ Safri Park Hotel ဖြစ်သည်။ အလွန်ကျယ်ဝန်းသော မြေပေါ်တွင် သက်တမ်းရှည်သစ်ပင်ကြီးများက နေရာယူထားကြသည်။ အဆောက်အအုံများမှာ ရှေးဟောင်းအဆောက်အအုံကြီးများ အသွင်ကို ဆောင်လျက်ရှိသည်။ အထပ် နှစ်ထပ်၊ သုံးထပ်ဆောင် ကြီးများဖြစ်ပြီး ဧရာမသစ်လုံးကြီးများဖြင့် တိုင်ထူကာ ဆောက်လုပ်ထားသည်ကို တွေ့ရသည်။ ဟိုတယ် ၏ Reception တွင် ကင်ညာသတင်းမီဒီယာ ကောင်စီ၏ ပြည်ပဆက်ဆံရေးကိုယ်စားလှယ် အမျိုးသမီး Ms Deana ကိုတွေ့ရသည်။ သူက မြန်မာ အပါအဝင် အခြားနိုင်ငံများအားလုံးမှ အစည်းအဝေး လာရောက်တက်ရောက်ကြသည့် ကမ္ဘာ့သတင်း မီဒီယာကောင်စီ (World Association of Press Council) အဖွဲ့ဝင်များကို ကြိုဆိုနှုတ်ခွန်းဆက်ကာ အစည်းအဝေးအစီအစဉ်များကို ပြောပြသည်။ Deana နှင့် ယခင် Video Conferencing ဖြင့် အစည်းအဝေးပြုလုပ်တိုင်း ပြောဆိုဆွေးနွေးဖူးသည်မို့  ရင်းနှီးခင်မင်နေသည်။ သွက်လက်ချက်ချာ၍ ယဉ်ကျေးစွာ ပြောဆိုတတ်သောကြောင့် Deana ကို အစည်းအဝေးတက်ရောက်လာသူတိုင်းက ခင်မင်ကြသည်။ 

သူ၏ အချိုးအဆက်ကတော့ အာဖရိက တိုင်းရင်းသူပီပီ ထွားထွားကျိုင်းကျိုင်းရှိလှသည်။ မိမိတို့ထက် သူ့အရပ်က ခေါင်းတစ်လုံးနီးပါးမျှ ပိုမိုမြင့်မားလေသည်။ သူ၏ခန္ဓာကိုယ် အသားအရေက မဟူရာအရောင်အသွေးဖြစ်သော်လည်း သွားလေးတွေက ပုလဲသွယ်များလို ဖြူဖွေးနေသည်။ ရယ်လိုက် ပြုံးလိုက်လျှင် ခင်မင်နှစ်လိုဖွယ်ရာ ရုပ်ရည်သွင်ပြင် ကိုဆောင်သည်။ မြင်ပါများတော့ခင်ဟူသော မြန်မာစကားပုံကို သတိရမိသည်။ နောက်လေး ငါးရက်ကြာသောအခါ အာဖရိက တိုင်းရင်းသူအတော်များများနှင့် ပြောဆိုဆက်ဆံရင်းမှ သူတို့၏ ပြောပုံဆိုပုံ၊ ဆက်ဆံရေး ပြေပြစ်ပုံများကြောင့် သူတို့ကို ခင်မင်လာမိသည်။ မိတ်ရင်းဆွေရင်းလို စကြနောက်ကြနှင့် ဖြစ်လာသည်။ 

ကမ္ဘာ့သတင်းမီဒီယာကောင်စီ (World Asso-ciation of Press Council) ၏ ဥက္ကဋ္ဌမှာ Dr.Sule Aker ဖြစ်သည်။ ထိုအမျိုးသမီးမှာ အသက် ၆၀ ဝန်းကျင်မျှသာ ရှိသေး၏။ မေလ ၃ ရက် နံနက် ၈ နာရီ ၄၅ မိနစ်တွင် အစည်းအဝေးစတင်သည်။ ထိုနေ့က ဖွင့်ပွဲနေ့ဖြစ်၍  အစည်းအဝေးသို့ တက်ရောက်လာကြသည့် နိုင်ငံပေါင်း ၂၃ နိုင်ငံမှ သတင်းမီဒီယာကောင်စီဥက္ကဋ္ဌများနှင့် ကင်ညာ သတင်းမီဒီယာကောင်စီ၊ ကင်ညာပြန်ကြားရေးဝန်ကြီးတို့ အမှတ်တရဓာတ်ပုံရိုက်ကြသည်။ ထိုင်ခုံတွေ ဆက်တီအသုံးပြုခြင်းမရှိဘဲ မြက်ခင်းပြင်ပေါ်မှာပင် တိုးတိုးဝှေ့ဝှေ့နှင့် စီတန်းဓာတ်ပုံရိုက်ခြင်း ဖြစ်၏။ ထိုနေ့က တက်ရောက်လာသော နိုင်ငံ ၂၃ နိုင်ငံမှာ ကင်ညာ၊ နီပေါ၊ ဆိုက်ပရပ်စ်၊ ဇင်ဘာဘွေ၊ အဇာဘိုင်ဂျန်၊ ဘင်္ဂလားဒေ့ရှ်၊ အိန္ဒိယ၊ အီရတ် (အရှေ့အလယ်ပိုင်း)၊ ကိုဆိုဗို၊ မာစီ ဒိုနီယန်၊ မြန်မာ၊ မာလာဝီ၊ ပါကစ္စတန်၊ သီရိလင်္ကာ၊ ဆွစ်ဇာလန်၊ တန်ဇန်နီးယား၊ တူကီယဲ၊ ယူဂန္ဓာ၊ ဇမ်ဘီယာ၊ မော်လ်ဒိုက်၊ အာဖဂန်နစ္စတန်၊ ဆေးရှဲလ်၊ ဘူတန်တို့ ဖြစ်သည်။ မှတ်တမ်းတင်ဓာတ်ပုံရိုက်ပြီးမှ အခမ်းအနားစတင်ပါသည်။ 

အောက်ပါပုဂ္ဂိုလ်များက ကြိုဆို နှုတ်ခွန်းဆက်စကားပြောကြားကြသည်-

(၁) Mr David Omwoyo, CEO, Media Council of Kenya

(၂) Mr Maina Muiruri, Board Chairman, Media Council of Kenya

(၃) Dr Sule Aker, President, World Association of Press Councils

(၄) Ms Esther Koimett, CBS, Principal Secretary, State Department of Broadcasting and Telecommunica-tion, Ministry of ICT, Innovation and Youth Affairs

(၅) Mr Joe Mucheru, Cabinet Secretary, Ministry of ICT, Innovation and Youth Affairs 

MCK မှ ဦးဆောင်ကျင်းပသော ကမ္ဘာ့သတင်းလွတ်လပ်ခွင့်နေ့ အခမ်းအနား

မေ ၅ ရက်သည် ကင်ညာခရီးစဉ်၏ တတိယမြောက်နေ့ ဖြစ်လေသည်။ နံနက်စောစော ၇ နာရီ ခွဲခန့်တွင် ကျွန်တော်နှင့် ကိုအေးချမ်းတို့ Breakfast စားရန် စားသောက်ဆောင်ရှိရာသို့ သွားကြသည်။ တည်းခိုရာအိပ်ဆောင်နှင့် စားသောက်ဆောင်မှာ အတော်လေးလှမ်းပါသည်။ အဆောင်တစ်ဆောင်နှင့် တစ်ဆောင်မှာလည်း အတန်ငယ်ဝေးကွာသည်။ စားသောက်ဆောင်ကြီးများကိုသွားသည့် လမ်း တစ်လျှောက်မှာ ဝက်သစ်ချပင်ကြီးများနှင့် အခြား အမည်မသိ သစ်ပင်ကြီးများက အုပ်မိုးလျက်ရှိကာ သဘာဝသစ်တောသစ်ပင်များပမာ အရိပ်အာဝါသ အေးမြလှပေသည်။ ထို့ပြင် စမ်းချောင်းငယ်လေးများ၊ ရေတံခွန်ငယ်လေးများ၏ ရေစီးသံငြိမ့်ငြိမ့်ညောင်းညောင်းကို ဂီတသံပမာနားဆင်ရသည်။ 

သစ်ပင်ကြီးများ၏ သစ်ကိုင်းအချို့ပေါ်တွင် ချင်းတွင်းမြစ်အထက်ပိုင်း ခန္တီးမြို့ သောင်ပြင်များပေါ်တွင် တွေ့ရလေ့ရှိသည့် ဟင်္သာငှက်ကြီးတွေလို ငှက်ဖိုငှက်မများကို နှစ်ကောင်တွဲလျက် တွဲလျက် မြင်တွေ့ရသည်မှာလည်း အမြင်ဆန်း၍ ရွှင်လန်း စရာဖြစ်သည်။ ငှက်ကြီးတွေက ရွှေအိုရောင်နှင့် မဟူရာ အနက်ရောင်တစ်ဝက်စီ ဆေးခြယ်ထားသလို ဖြစ်ပြီး ထိုနေ့နံနက် စားသောက်ဆောင်သို့ ကိုအေးချမ်းနှင့် ကျွန်တော်လမ်းလျှောက်သွားကြစဉ် သိပ်မမြင့်လှသော သစ်ကိုင်းတစ်ကိုင်းပေါ်တွင် ငှက်ကြီးနှစ်ကောင် နား၍နေသည်ကို တွေ့မြင်ရသည်။ အတော်နီးနီး ကပ်ကြည့်သော်လည်း မလှုပ်မယှက်တွေ့မြင်ရသဖြင့် ကိုအေးချမ်းက 

“အစ်ကိုကြီး ဒီငှက်တွေက အရုပ်တွေများလား”

“အေးနော်...လှုပ်လည်းမလှုပ်ဘူး” 

ကျွန်တော်က ပြောပြောဆိုဆို ခဲသေးသေးလေး နှင့်ပစ်မည့်ဟန် ရွယ်လိုက်ရာ ငှက်ကြီးနှစ်ကောင်က ထ၍ပျံသွားလေတော့သည်။ ကျွန်တော်တို့ နှစ်ယောက်လုံး ရယ်မောမိကြ၏။ ထိုနေ့က ကမ္ဘာ့သတင်းမီဒီယာကောင်စီ၏ အစည်းအဝေးမပြုလုပ်မီ MCK မှ ဦးဆောင်ကျင်းပသည့် World Press Free-dom Day/ Media Summit သို့ ဦးစွာတက်ရောက်ရသည်။

ထိုအခမ်းအနားတွင် ကမ္ဘာ့သတင်းမီဒီယာ ကောင်စီ၏ ဥက္ကဋ္ဌ Dr. Sule Aker အပါအဝင် ပုဂ္ဂိုလ် ကိုးဦးတို့က  အဖွင့်အမှာစကားများ အသီးသီးပြောကြားကြသည်။ အခမ်းအနားမှူးမှာ (MCK) မှ Mr. Johnstone Mwakazi ဖြစ်လေသည်။ ထိုနေ့က အဖွင့်စကားပြော ကြားသူများမှာ Ms Judy Kaberia-Executive Director, Association of Media Women in Kenya (AMWIK), Ms Ito Misako-UNESCO Africa Advisor for Commun-ication and Information in Africa, Dr Evange-line Njoka-Secretary General/Chief Executive Officer, Kenya national Commission for UNESCO (KNATCOM UNESCO), Dr Sule Aker-President, World Association of Press Councils (WAPC), Mr Ezra Chiloba-Director General, Communications Authority of Kenya, Mr David Omwoyo-Chief Executive Officer, Media Council of Kenya, Mr Maina Muiruri-Chairman, Media Council of Kenya, Ms Esther Koimett-Principle Secretary, State Department of Broadcasting and Telecommunications, Ministry of ICT, Innovation and Youth Affairs, Honourable Joe Mucheru, EGH-Cabinet Secretary, Ministry of ICT, Innovation and Youth Affairs တို့ ဖြစ်ကြသည်။

 

(ဆက်လက်ဖော်ပြပါမည်)