ပုဇွန်တောင်မြို့နယ်၌ ၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူခြင်းလုပ်ငန်း အခက်အခဲမရှိစေရေးအတွက် ကွင်းဆင်းကြည့်ရှုအားပေး

 

ပုဇွန်တောင် အောက်တိုဘာ ၁၁

 

ရန်ကုန်တိုင်းဒေသကြီး၊ ဗိုလ်တထောင်ခရိုင်၊ ပုဇွန်တောင်မြို့နယ်တွင် ၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းကောက်ယူလျက်ရှိရာ ယနေ့နံနက် ၇ နာရီက ဗိုလ်တထောင် ခရိုင်သန်းခေါင်စာရင်း ကော်မတီဥက္ကဋ္ဌ ဦးအောင်လွင်၊ ဗိုလ်တထောင်ခရိုင် သန်းခေါင်စာရင်းကော်မတီ အတွင်းရေးမှူး ဒုတိယညွန်ကြားရေးမှူး ဒေါ်မိုးမိုးအေး၊ မြို့နယ်သန်းခေါင်စာရင်းကော်မတီဥက္ကဋ္ဌ ဦးဇော်ဝင်းလှိုင်နှင့် တာဝန်ရှိသူများက သန်းခေါင်စာရင်းကောက်ယူရာ၌ အခက်အခဲမရှိစေရေးအတွက် ကွင်းဆင်းကြည့်ရှုအားပေးကာ လိုအပ်သည်များ ပေါင်းစပ်ညှိနှိုင်း ဆောင်ရွက်ပေးခဲ့သည်။

 

ပုဇွန်တောင်မြို့နယ်တွင် ရပ်ကွက် (၁၀) ရပ်ကွက်၊ ကောက်ကွက်ပေါင်း (၁၁၇) ကွက်ရှိပြီး အောက်တိုဘာ ၁ ရက်မှ ၁၅ ရက်အထိ ကောက်ယူသွားမည်ဖြစ်ကြောင်း၊ သန်းခေါင်စာရင်း ကောက်ယူရေးလုပ်ငန်းသည် နိုင်ငံဖွံ့ဖြိုးတိုးတက်ရေးစီမံကိန်းနှင့် မူဝါဒများ ချမှတ်ရန်အတွက် အရေးကြီးသော လူဦးရေနှင့် လူမှုစီးပွားဆိုင်ရာ အချက်အလက်များရနိုင်မည့် တစ်ခုတည်းသော စီမံကိန်း လုပ်ငန်းဖြစ်သည့်အတွက် အမျိုးသားရေးတာဝန်အဖြစ် အောင်မြင်အောင် အကောင်အထည်ဖော် ဆောင်ရွက်လျက်ရှိကြောင်း လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန မြို့နယ်ဦးစီးမှူးရုံးမှ သိရသည်။

 

ဟန်စုယဉ်