ချန်ပီယံလိဂ်ပြိုင်ပွဲ အာဆင်နယ် ရာနှုန်းပြည့်နိုင်ပွဲဆက် အင်တာမီလန်၊ လီဗာပူး၊ စပါးတို့ ရှုံးပွဲကြုံ



ယူအီးအက်ဖ်အေ ချန်ပီယံလိဂ်ပြိုင်ပွဲအဖြစ် နိုဝင်ဘာ ၂၇ ရက် နံနက်ပိုင်းက ယှဉ်ပြိုင်ကစားခဲ့သည့် အာဆင်နယ်နှင့် ဘိုင်ယန်မြူးနစ်အသင်းပွဲစဉ်တွင် အာဆင်နယ်အသင်းက အကြိတ်အနယ်ကစားကာ သုံးဂိုး - တစ်ဂိုးဖြင့် နိုင်ပွဲရရှိပြီး ရာနှုန်းပြည့်နိုင်ပွဲ ဆက်လက်ထိန်းသိမ်းနိုင်ခဲ့သည်။

 

ဘိုင်ယန်မြူးနစ် အသင်းသည် ဟာရီကိန်း၊ ဂနာဘရီ၊ အိုလစ်၊ ကားလ်စသည့် အဓိကကစားသမား အများစုဖြင့် အာဆင်နယ်အသင်းကို ရင်ဆိုင်လာခဲ့သော်လည်း ခြေစွမ်းပြသနိုင်ခြင်းမရှိဘဲ ဂိုးပြတ်ရှုံးပွဲ ကြုံတွေ့ခဲ့ရသည်။ အာဆင်နယ်အသင်းအတွက် ဦးဆောင်ဂိုးကို ဂျူရီယန်တင်းဘားက သွင်းယူနိုင်ခဲ့သော်လည်း အသက် ၁၇ နှစ် အရွယ် လန်းနာ့သ်ကားလ်က ဘိုင်ယန်မြူးနစ်အသင်း အတွက် ချေပဂိုးသွင်းယူနိုင်ခဲ့သည့်အတွက် ပထမပိုင်းတွင် တစ်ဖက်တစ်ဂိုးစီဖြင့် အဆုံးသတ်ခဲ့သည်။

ဒုတိယပိုင်းတွင် အာဆင်နယ်အသင်းက ဂိုးရရှိနိုင်သည့် အခွင့်အရေးဖန်တီးမှု ခြောက်ကြိမ်နှင့်အတူ ဘိုင်ယန်မြူးနစ်အသင်းကို ပွဲချိန်အများစု တစ်ဖတ်သတ် ဖိအားပေးကစားနိုင်ခဲ့ပြီး အနိုင်ဂိုးများ သွင်းယူနိုင်ခဲ့သည်။ အာဆင်နယ်အသင်းအတွက် အနိုင်ဂိုးများကို မာဒူကီနှင့် မာတင်နယ်လီတို့က သွင်းယူပေးခဲ့သည်။

 

အဆင့်(၃)တွင် ရပ်တည်

 

အာဆင်နယ်အသင်းသည် ယခုအနိုင်ပွဲကြောင့် ချန်ပီယံလိဂ်ပြိုင်ပွဲတွင် ငါးပွဲကစားပြီး ငါးပွဲစလုံး နိုင်ပွဲရရှိကာ ရမှတ် ၁၅ မှတ်ဖြင့် အမှတ်ပေးဇယားကို အမှားအယွင်းမရှိ ဦးဆောင်ထားသည်။ ပြိုင်ဘက်ဘိုင်ယန်မြူးနစ်အသင်းက ချန်ပီယံလိဂ်ပြိုင်ပွဲတွင် ပထမဆုံး ရှုံးပွဲကြုံတွေ့ခဲ့ပြီး ရမှတ် ၁၂ မှတ်ဖြင့် အဆင့် (၃) တွင် ရပ်တည်နေသည်။

 

အခြားနာမည်ကြီးပွဲစဉ်ရလဒ်များတွင် အက်သလက်တီကိုမက်ဒရစ်က အင်တာမီလန်အသင်းကို နှစ်ဂိုး- တစ်ဂိုး၊ ပီအက်စ်ဗွီက နာမည်ကြီး လီဗာပူးကို လေးဂိုး-တစ်ဂိုး၊ ရီးရဲမက်ဒရစ်က အိုလံပီယာကော့စ်ကို လေးဂိုး- သုံးဂိုး၊ ပီအက်စ်ဂျီက စပါးကို ငါးဂိုး-သုံးဂိုး၊ စပို့တင်းက ကလပ်ဘရုဂေး အသင်းကို သုံးဂိုး-ဂိုးမရှိဖြင့် အသီးသီးနိုင်ပွဲရရှိခဲ့သည်။

 

အောင်ဇော်

No comments

Powered by Blogger.