ပြည်မြို့နယ်အတွင်း အားကစားကဏ္ဍနှင့် သဲကုန်းမြို့နယ်အတွင်း ဒေသခံပြည်သူများ၏ လူမှုစီးပွားဘဝများ ဘက်စုံမြှင့်တင်ပေးနိုင်ရေး ကွင်းဆင်းဆောင်ရွက်

ပြည် နိုဝင်ဘာ ၂၉

 

ပဲခူးတိုင်းဒေသကြီးဝန်ကြီးချုပ် ဦးမျိုးဆွေဝင်း၊ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးဇင်မင်းထက်တို့သည် ယမန်နေ့မွန်းလွဲပိုင်းက ပြည်မြို့နယ်အတွင်း အားကစားကဏ္ဍ ဘက်စုံမြှင့်တင်ပေးနိုင်ရေး ကွင်းဆင်းဆောင်ရွက်သည်။

 

ဦးစွာ တိုင်းဒေသကြီးဝန်ကြီးချုပ်နှင့် ဒုတိယဝန်ကြီးတို့သည် ပြည်မြို့ကမ်းနားလမ်းဘေးရှိ ခေတ္တရာဧရာပန်းခြံ ဘက်စုံအဆင့်မြှင့်တင်နေမှု၊ ကမ်းနားလမ်းတိုးချဲ့ဆောင်ရွက်နေမှု၊ နိုင်ငံတကာ အဆင့်မီ Coffee Shop များ တည်ဆောက်နေမှုနှင့် ဘူးခါးရိုးချောင်းအား လူကူးကြိုးတံတား တည်ဆောက်ရေးလုပ်ငန်းခွင်များသို့ ကွင်းဆင်းကြည့်ရှုစစ်ဆေးပြီး လိုအပ်သည်များ မှာကြားသည်။

 

ထို့နောက် ပြည်မြို့ရွှေဂူရပ်ကွက်ရှိ ခေတ္တရာပြည်သူ့ခန်းမ (ဘက်စုံသုံးအားကစားခန်းမ) နှင့် မြို့နယ်အားကစားကွင်းများကို ကွင်းဆင်းကြည့်ရှုစစ်ဆေးပြီး အားကစားကွင်းဧရိယာအတွင်း ကျူးကျော်မှုများမရှိစေရေး၊ အားကစားနှင့်သက်ဆိုင်သည့် အဆောက်အအုံများသာထားရှိရန်၊ ဘောလုံးကွင်းဧရိယာကို သန့်ရှင်းသပ်ရပ်မှုရှိစေရေး ဆောင်ရွက်ရန်နှင့် အားကစားပွဲကြည့်စင်များ ပြန်လည်တည်ဆောက်ရန် တာဝန်ရှိသူများအား မှာကြားသည်။

 

ယင်းနောက် ပြည်မြို့ ရွာဘဲရပ်ကွက်ရှိ ခရိုင်အားကစားကွင်းနှင့် ဆင်စုရပ်ကွက်၌ ဘက်စုံအားကစားကွင်းနှင့် အားကစားခန်းမ တည်ဆောက်နိုင်ရေး ကွင်းဆင်းကြည့်ရှုစစ်ဆေးပြီး ဘက်စုံအဆင့်မြှင့်တင်ပေးနိုင်ရေး၊ အားကစားကွင်းတစ်ခု၏ အင်္ဂါရပ်နှင့်အညီဖြစ်စေရေးနှင့် ဝန်ထမ်းအိမ်ရာများ သီးသန့်တည်ဆောက်ရန်၊ မြေယာပိုင်ဆိုင်မှုနှင့် မြေအသုံးချမှုများကို ကွင်းဆင်းတိုင်းတာ စိစစ်တင်ပြရန် တာဝန်ရှိသူများအား မှာကြားသည်။

 

ဆက်လက်၍ တိုင်းဒေသကြီးဝန်ကြီးချုပ်သည် နတ်တလင်းခရိုင် သဲကုန်းမြို့နယ် ဆင်မြီးဆွဲမြို့သို့ ရောက်ရှိကာ ဒေသခံပြည်သူများနှင့် တွေ့ဆုံ၍ တိုင်းဒေသကြီးအစိုးရအဖွဲ့အနေဖြင့် ပြည်သူများ၏ လူမှုစီးပွားဘဝများ ဘက်စုံဖွံ့ဖြိုးတိုးတက်စေရေး၊ မြို့ပြနှင့် ကျေးလက်ဖွံ့ဖြိုးတိုးတက်မှု ကွာဟချက်နည်းပါးစေရေး အလေးထားဆောင်ရွက်ပေးလျက်ရှိကြောင်း၊ မိမိတို့၏ ရပ်ရွာဒေသ ဖွံ့ဖြိုးတိုးတက်စေရေး ပွင့်ပွင့်လင်းလင်း တင်ပြပေးစေလိုကြောင်းနှင့် မိမိတို့၏ သားငယ်သမီးငယ်များသည် အနာဂတ်နိုင်ငံတော်ကြီးကို ဦးဆောင်ပုံဖော်ထုဆစ်မည့် ဗိသုကာပညာရှင်များဖြစ်၍ ပညာရေးကို ဦးစားပေးအလေးထားသင်ကြားပေးရန် ပြောကြားသည်။

 

ထို့နောက် တက်ရောက်လာသည့် ဒေသခံပြည်သူများ၏ တင်ပြချက်များအပေါ် သက်ဆိုင်ရာကဏ္ဍအလိုက် တိုင်းဒေသကြီးအဆင့် ဌာနဆိုင်ရာများက ပြန်လည်ဖြေကြားရှင်းလင်းပြီး တိုင်းဒေသကြီး ဝန်ကြီးချုပ်က လိုအပ်သည်များ ဖြည့်ဆည်းဆောင်ရွက်ပေးသည်။

 

ယင်းနောက် တိုင်းဒေသကြီးဝန်ကြီးချုပ်သည် ပေါင်းတည်မြို့နယ် ကြူတောကန်ကျေးရွာအုပ်စု၌ ပဲတီစိမ်း မျိုးသန့်စံပြစိုက်ခင်းသို့ သွားရောက်ကြည့်ရှုအားပေးကာ ပဲတီစိမ်းသီးနှံသည် ပြည်ပပို့ကုန်သီးနှံဖြစ်၍ ပိုးသတ်ဆေးသုံးစွဲမှုအပေါ် သတ်မှတ်ချက်များအတိုင်းသာ သုံးစွဲရန်နှင့် ပိုးသတ်ဆေးဓာတ်ကြွင်း ကင်းစင်စေရေး အသိပညာပေးခြင်းများ ကျယ်ကျယ်ပြန့်ပြန့်ဆောင်ရွက်ရန် တာဝန်ရှိသူများအား မှာကြားခဲ့ကြောင်း သိရသည်။

 

တိုင်းဒေသကြီး(ပြန်/ဆက်)