ချစ်ခြင်းတရားနှောင်ကြိုးမှသည် ခိုင်မာအားကောင်းမှုအရပ်ရပ်ဆီ (ကြေးမုံ)

မိုးကေနိုင်

 

ယနေ့ Multipolar, Multilateral ကမ္ဘာကြီးမှာ ငြိမ်းချမ်းရေး၊ ဖွံ့ဖြိုးတိုးတက်ရေးကိုဦးတည်ပြီး တစ်နိုင်ငံနှင့်တစ်နိုင်ငံ မိတ်ဆွေဖြစ်ရန် ကြိုးစားလာကြသည်။ ယခုလိုကာလမျိုး ပဋိပက္ခ၊ သဘာဝဘေး၊ ရောဂါမျိုးစုံ၊ ဘေးဒုက္ခအစုံနှင့်ပြည့်နေသည့် ကမ္ဘာကြီးတွင် ရန်ဘက်အသွင်ပြောင်း နိုင်ငံများအကြား နိုင်ငံတကာ မိတ်ဖက်အသိုက်အဝန်းတစ်ခု ဖန်တီးဖို့ဆိုသည်မှာ ခက်ခက်ခဲခဲကြိုးပမ်းမှ ရလာနိုင်သည့် အခြေအနေမျိုးဖြစ်သည်။ အကျိုးစီးပွားပဓာနနိုင်ငံများ၊ အတ္တကြီးမားခေါင်းဆောင်များကြောင့် စိန်ခေါ်မှုများရှိမြဲရှိနေငြား မြန်မာနှင့် ဘယ်လာရုစ် နှစ်နိုင်ငံအကြား ချစ်ကြည်ရင်းနှီးမှု၊ ပူးပေါင်းဆောင်ရွက်မှုများက အရှိန်တစ်ခုတွင် ခပ်သွက်သွက်ဖြစ်လာသည်။ နှစ်နိုင်ငံအကြား ချစ်ကြည်ရင်းနှီးမှုသည် မိသားစုပမာ၊ ညီအစ်ကိုရင်းပမာ ညီညွတ်သောမဟာမိတ်အသွင် ပို၍ထင်ရှားလာနေသည်။

 

အပြုသဘောမှန်သမျှ အပေါင်းလက္ခဏာ ဆောင်ပါသည်

 

ယခုလိုအခြေအနေမျိုးတွင် ပြည်ထောင်စုသမ္မတမြန်မာနိုင်ငံနှင့် အရှေ့ဥရောပကုန်းတွင်းပိတ် ဘယ်လာရုစ်သမ္မတနိုင်ငံတို့အကြား ခေါင်းဆောင်များ အပြန်အလှန်လည်ပတ်မှု၊ အစိုးရနှင့် ပြည်သူအချင်းချင်း ဘက်စုံပူးပေါင်းဆောင်ရွက်မှုဆိုသည်က နှစ်နိုင်ငံအကျိုးစီးပွားအတွက်သာမက ဒေသတွင်း အကျိုးစီးပွားမှသည် ကမ္ဘာ့ငြိမ်းချမ်းရေးအထိ သက်ရောက်မှုရှိသည်ဆိုလျှင် ငြင်းပယ်ရန် အကြောင်းမရှိပါ။ အပြုသဘောဆောင် ပူးပေါင်းဆောင်ရွက်မှုမှန်သမျှက အပေါင်းလက္ခဏာ ဆောင်ခဲ့သည်ချည်း ဖြစ်သည်။ နိုင်ငံ​တော်ယာယီသမ္မတ ဗိုလ်ချုပ်မှူးကြီးမင်းအောင်လှိုင်၏ ဖိတ်ကြားချက်အရ ၂၇ - ၁၁- ၂၀၂၅ ရက်မှ ၂၈ - ၁၁- ၂၀၂၅ ရက် အထိ မြန်မာနိုင်ငံသို့ လာရောက်လည်ပတ်ခဲ့သည့် ဘယ်လာရုစ်နိုင်ငံ သမ္မတကြီးအလက်ဇန္ဒားလူကာရှန်ကို၏ ခရီးစဉ်ကိုပင်ကြည့်ပါ။ ပြည်သူနှစ်ရပ်လုံးနှင့် နှစ်နိုင်ငံအကျိုးစီးပွားအတွက် ဘယ်လိုဖြစ်ထွန်းနိုင်ပသလဲ သက်သေပြရာရောက်ခဲ့သည်။ ကမ္ဘာ့ငြိမ်းချမ်းရေးအတွက်လည်း ကူညီရာရောက်သည်ဟု သုံးသပ်နိုင်ပါသည်။ ယခု ဘယ်လာရုစ်သမ္မတကြီး၏ ခရီးစဉ်ကြောင့် နှစ်နိုင်ငံခေါင်းဆောင်များ၊ ပြည်သူများအကြား ယခင်ကတည်းက ချစ်ကြည်ရင်းနှီးမှုအနှစ်က တိုး၍ပင် ခိုင်မြဲသွားသည်ကို တွေ့လိုက်ရသည်။

 

ရိုးသားမှု၊ မျှတမှုနှင့် မေတ္တာတရားအပေါ်အခြေခံသည့် အပြန်အလှန် အသိအမှတ်ပြုမှု

 

အသက်အရွယ်အားဖြင့် ၇၁ နှစ်ရှိပြီဖြစ်သော ဘယ်လာရုစ်သမ္မတကြီးသည် သမိုင်းဘာသာရပ်နှင့် ဘွဲ့ရရှိခဲ့ပြီး စိုက်ပျိုးရေး၊ စီးပွားရေး၊ စစ်ဘက်၊ နိုင်ငံရေးဘက်၊ စီမံခန့်ခွဲရေးနယ်ပယ်မျိုးစုံတွင် တာဝန်ထမ်းဆောင်ခဲ့ဖူးသူလည်းဖြစ်သည်။ ၁၉၉၄ ခုနှစ်မှ ယခုအချိန်အထိ ခုနစ်ဆက်မြောက် သမ္မတတာဝန်ထမ်းဆောင်နေသည့် ဘယ်လာရုစ်ပြည်သူတို့၏ ခေါင်းဆောင်ကြီးတွင် မှတ်သားလောက်သည့် ဆိုရိုးစကားများစွာရှိသည်ကို လေ့လာဖူးပါသည်။ နိုင်ငံရေးနယ်ပယ်တွင် မျှတမှုနှင့် ရိုးသားမှုမရှိလျှင် ဘယ်တော့မျှအောင်မြင်မှုရမည်မဟုတ်ဟူသော အခြေခံသဘောတရားမှာ မှတ်သားလောက်သည်။ သူ့နိုင်ငံနှင့် နိုင်ငံသားများအတွက် အဂတိတရားကင်းစွာဖြင့် သူ့နောက်ဆုံးထွက်သက်အထိ အလုပ်အကျွေးပြုမည့်သူ၏ သန္နိဋ္ဌာန်မှာ ရိုးသားမှုဂုဏ်နှင့် မျှတမှုအပေါ်တွင် မည်မျှအခြေခံနေကြောင်း ပေါ်လွင်နေသည်။

 

ထို့ကြောင့်လည်း ယခုနှစ် မတ်လ ၇ ရက်နေ့ တွင် မြန်မာနိုင်ငံတော်အကြီးအကဲက နိုင်ငံ၏ ဂုဏ်ထူးဆောင်ဘွဲ့တစ်မျိုးဖြစ်သည့် “အဂ္ဂမဟာ သရေစည်သူဘွဲ့” ကို သမ္မတလူကာရှန်ကိုအား ဂုဏ်ပြုအပ်နှင်းခဲ့သည်ကို ပြန်လည်အမှတ်ရမိသည်။ အပြန်အလှန် အသိအမှတ်ပြုမှုများက အမှန်တကယ် ထိရောက်မှုရှိခဲ့ပါသည်။ မတ်လ ၂၈ ရက်နေ့က မြန်မာနိုင်ငံတွင်ဖြစ်ပွားခဲ့သည့် မန္တလေးမြေငလျင်ဘေးကြီးတွင် ဘယ်လာရုစ်နိုင်ငံက လူသားချင်းစာနာထောက်ထားမှု အကူအညီများ လျင်လျင်မြန်မြန် ထိထိရောက်ရောက်ပေးခဲ့သည့်အတွက် မြန်မာနိုင်ငံအစိုးရနှင့် ပြည်သူများက များစွာကျေးဇူးတင်ခဲ့ရသည်။ ထို့ပြင် ပြုလုပ်တော့မည့် ပါတီစုံဒီမိုကရေစီ အထွေထွေရွေးကောက်ပွဲကိုလည်း ဘယ်လာရုစ်နိုင်ငံက လှိုက်လှိုက်လှဲလှဲ ထောက်ခံခဲ့ပြီး ရွေးကောက်ပွဲ အကဲခတ်အဖွဲ့များကိုပင် စေလွှတ်မည့်အစီအစဉ်များ တွေ့ရသည်။

 

ကမ္ဘာကြီးက ယခုအချိန်အခါ ငြိမ်းချမ်းသော အနေအထားတွင် ရှိမနေပါ၊၊ တိုးတက်မှုက အားနည်းနေသည်။ ဒီကြားထဲ အမုန်းကနေ အမုန်းမျိုးစေ့များချနေသမျှ ဘယ်လိုမျှ ခရီးမရောက်နိုင်ဆိုသည်ကို နှစ်နိုင်ငံခေါင်းဆောင်များ သိထားကြသည်၊၊ နှစ်နိုင်ငံ ပြည်သူအားလုံး နားလည်ထားသည်က မေတ္တာသည်သာ အခရာပါ၊၊ တစ်ဦးမေတ္တာ တစ်ဦးမျှ၍ အနေဝေးသော်လည်း နှလုံးသားချင်းနီးစပ်အောင် လုပ်နိုင်ရမည်ဟု ခံယူထားကြသည်။ ခံယူထားသည့်အတိုင်းလည်း ခရီးရောက်နေကြပါပြီ။ ယုံကြည်မှုများတိုးလာခြင်း၊ နားလည်မှုများရှိလာခဲ့ခြင်းကပင် ခရီးရောက်မှုတစ်ခုဖြစ်သည်။

 

လမ်းပြမြေပုံအတိုင်း သွားကြရန်ဖြစ်သည်

 

၁၉၉၉ ခုနှစ်တွင် နှစ်နိုင်ငံ သံတမန်ဆက်ဆံရေးကို စတင်ထူထောင်ခဲ့ကြပြီး ၂၀၁၁ ခုနှစ်တွင် ဘယ်လာရုစ်နိုင်ငံဝန်ကြီးချုပ်နှင့် ၂၀၁၅ ခုနှစ်တွင် ထိုစဉ်က မြန်မာနိုင်ငံ အမျိုးသားလွှတ်တော်ဥက္ကဋ္ဌ တို့၏ နှစ်နိုင်ငံချစ်ကြည်ရေးခရီးစဉ်များ အပြန်အလှန်ရှိခဲ့ကြဖူးပါသည်။ နှစ်နိုင်ငံ နိုင်ငံခြားရေးဝန်ကြီးများလည်း အပြန်အလှန်ခရီးစဉ်များရှိခဲ့ကြသည်။ ထို့နောက် ၂၀၂၅ ခုနှစ်အတွင်း ဇွန်လနှင့် အောက်တိုဘာလတို့တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်၏ ဘယ်လာရုစ်နိုင်ငံခရီးစဉ် နှစ်ကြိမ်တိုင်ရှိခဲ့သည်။ ပထမတစ်ကြိမ်ခရီးစဉ်သည် စတုတ္ထအကြိမ် ဥရောပ-အာရှစီးပွားရေးဖိုရမ် ( EEF-2025 ) သို့ တက်ရောက်ခဲ့ခြင်းဖြစ်၍ ထိုခရီးစဉ်မှ EAEU အဖွဲ့ ဝင်နိုင်ငံများနှင့် ပူးပေါင်းဆောင်ရွက်နိုင်မည့် အခွင့်အလမ်းများ ရရှိခဲ့ပါသည်။

 

ထိုခရီးစဉ်များမှစ၍ နှစ်နိုင်ငံအကြား ချစ်ကြည်ရင်းနှီးမှု ပိုမိုခိုင်မာလာခဲ့ပြီး နယ်ပယ်စုံပူးပေါင်း ဆောင်ရွက်မှုများ ပိုမိုအားကောင်းလာခဲ့ကာ ယခုတစ်ကြိမ် မြန်မာနိုင်ငံတွင် ခေါင်းဆောင်နှစ်ဦး ထပ်မံတွေ့ဆုံခွင့်ရခြင်းကပင် ပူးပေါင်းဆောင်ရွက်မှုအားလုံးကို ဆက်လက်တိုးချဲ့ဖန်တီးခွင့်ကို ရရှိသွားစေသည်။ အရှိန်အဟုန်တစ်ခု ဖြစ်သွားအောင်လည်း ခေါင်းဆောင်နှစ်ဦးနှင့် သက်ဆိုင်ရာ Stakeholders အားလုံး၏ စိတ်ဝင်တစား ကျယ်ကျယ်ပြန့်ပြန့် ပူးပေါင်းဆောင်ရွက်မှုများက အဓိကတွန်းအားများဖြစ်ခဲ့ရသည်။ အားလုံးက နှစ်နိုင်ငံအကျိုးစီးပွား၊ နှစ်နိုင်ငံပြည်သူများအတွက် သာဖြစ်၍ ယခုခရီးစဉ်အတွင်း ဖွံ့ဖြိုးမှုပူးပေါင်းဆောင်ရွက်မှုမြှင့်တင်ရေးဆိုင်ရာ လမ်းညွှန်ချက် လမ်းပြမြေပုံ ( ၂၀၂၆-၂၀၂၈)ကို လက်မှတ်ရေးထိုးနိုင်ခဲ့ကြသည်။ လမ်းပြမြေပုံအတိုင်းသွားကြရန် ခိုင်ခိုင်မာမာ ဆုံးဖြတ်ပြီးလည်းဖြစ်ပါသည်။

 

နယ်ပယ်စုံသဘောတူညီမှု ၁၆ ခု

 

မြန်မာနှင့် ဘယ်လာရုစ်တို့၏ ပူးပေါင်းဆောင်ရွက်မှုသည် မဟာဗျူဟာမြောက် ပူးပေါင်းဆောင်ရွက်မှု ဖြစ်သည်။ နယ်ပယ်စုံဖွံ့ဖြိုးတိုးတက်ရေးကို ဦးတည်သည်။ ထို့ကြောင့်လည်း သမ္မတကြီး ခရီးစဉ်မစမီကတည်းက ဘယ်လာရုစ်စီးပွားရေး ပညာရှင်များ၊ ဝန်ကြီးအဆင့် အစိုးရအဖွဲ့ဝင်များက ကြိုတင်ရောက်ရှိနှင့်ပြီး ရန်ကုန်မြို့ LOTTE ဟိုတယ်တွင် မြန်မာ-ဘယ်လာရုစ်စီးပွားရေးဖိုရမ်တစ်ခုကို ကျင်းပနိုင်ခဲ့သည်။ ဘယ်လာရုစ်ဘက်မှ BelCCI နှင့် မြန်မာနိုင်ငံဘက်မှ UMFCCI အပါအဝင် တာဝန်ရှိပုဂ္ဂိုလ်များက သက်ဆိုင်ရာကဏ္ဍအလိုက် အသေးစိတ် ကြိုတင်ဆွေးနွေးခဲ့ကြပြီး ပြည်ဝင်ဗီဇာ ကင်းလွတ်ခွင့်ပေးရေးဆိုင်ရာ သဘောတူညီချက် အပါအဝင် စုစုပေါင်းစာချုပ် ၁၆ ခုကို ချုပ်ဆိုနိုင်ခဲ့ကြပါသည်။ စာချုပ်များတွင် ရင်းနှီးမြှုပ်နှံမှု၊ စီးပွားရေးနှင့် ကုန်သွယ်ရေး၊ စိုက်ပျိုးမွေးမြူရေးနှင့် စိုက်ပျိုးရေးအခြေခံစက်မှုကုန်ထုတ်လုပ်မှု၊ ကျန်းမာရေး၊ ပညာရေး၊ အားကစား၊ သိပ္ပံနှင့်နည်းပညာ၊ ခရီးသွားနှင့်ဆက်သွယ်ရေး၊ သယ်ယူပို့ဆောင်ရေး၊ လူသားချင်းစာနာထောက်ထားမှုဆိုင်ရာ၊ ဘဏ်နှင့် ငွေကြေးကဏ္ဍများ နယ်ပယ်အစုံပါဝင်သည်ကို တွေ့ရသည်။

 

ရင်းနှီးမြှုပ်နှံမှုနှင့်ဖက်စပ်လုပ်ငန်းများ ဖြစ်ထွန်းလာမည့်သဘောရှိသည်။ မြန်မာနိုင်ငံမှ ဆန်၊ ရော်ဘာ၊ အခွံမာသီး၊ သစ်သီးဝလံနှင့် ကော်ဖီကို တင်ပို့နိုင်မည့်အခွင့်အလမ်းများ တွေ့မြင်နေရပါပြီ။ စက်မှုကဏ္ဍတွင် ပူးပေါင်းဆောင်ရွက်မှု အလားအလာများ ရှိလာပါမည်။ MSME ထုတ်ကုန်များ အတွက် စျေးကွက်အလားအလာများ မြင်တွေ့နေရသည်။ ကျန်းမာရေးကဏ္ဍ၌ ကင်ဆာရောဂါရှင်များ အတွက် အားရဖွယ်အလားအလာများ ရှိလာပါပြီ။ နောင်တွင်လည်း ဝန်ကြီးအဆင့် ဌာနဆိုင်ရာတာဝန် ရှိသူများ၏ နောက်ဆက်တွဲ အပြန်အလှန်ခရီးစဉ်များလည်း ရှိလာပါလိမ့်မည်။

 

နားလည်မှုစာချွန်လွှာများ

 

နှစ်နိုင်ငံ နိုင်ငံတော်အကြီးအကဲများ တွေ့ဆုံဆွေးနွေးမှုများတွင် အပြန်အလှန်နားလည်မှုနှင့် ယုံကြည်မှုကိုအခြေခံသည့် ပြောကြားချက်များ ပါဝင်သည်ကို သတိထားမိသည်။ စေတနာပါသည့် ပူးပေါင်းဆောင်ရွက်မှုနှင့် အပြန်အလှန် အသိအမှတ် ပြုမှုများကို တွေ့ရသည်။ ရင်းနှီးပွင့်လင်းစွာ အမြင်များ ဖလှယ်နိုင်ခဲ့ကြသည်မှာ အားရစရာဖြစ်သည်။ အထူးသဖြင့် နယ်စပ်ဒေသ အွန်လိုင်းလောင်းကစားနှင့် လိမ်လည်မှုများကို အမျိုးသားရေးတာဝန် တစ်ရပ်အနေဖြင့် အပြီးတိုင် တိုက်ဖျက်နေမှုများနှင့် လုံခြုံရေးဆိုင်ရာစိန်ခေါ်မှုများ၊ အနာဂတ်ပါတီစုံ ဒီမိုကရေစီ အ​ထွေ​ထွေ ရွေးကောက်ပွဲအခြေအနေများအပေါ် အမြင်များဖလှယ်နိုင်ခဲ့ကြသည်။ ထို့နောက် နိုင်ငံ့အကြီးအကဲများ ရှေ့မှောက်တွင်ပင် နားလည်မှုစာချွန်လွှာများကို လက်မှတ်ရေးထိုး လဲလှယ်ကြသည့်အခါ သိပ္ပံနှင့်နည်းပညာဆိုင်ရာပူးပေါင်းဆောင်ရွက်မှု၊ အကောက်အခွန်ဆိုင်ရာ ကိစ္စရပ်များ ပူးပေါင်းဆောင်ရွက်ရေးဆိုင်ရာ၊ ပို့ကုန်ချေးငွေ မူဘောင်သဘောတူညီချက်နှင့် နိုင်ငံတော်အဆင့် စံချိန်စံညွှန်းသတ်မှတ်ခြင်း၊ အရည်အသွေး ကိုက်ညီမှုစစ်ဆေးခြင်း၊ တိကျစွာတိုင်းတာခြင်းနှင့် အသိအမှတ်ပြုခြင်းနယ်ပယ်တို့တွင် ပူးပေါင်းဆောင်ရွက်ရေး၊ နှစ်နိုင်ငံပူးပေါင်းဆောင်ရွက်မှု မြှင့်တင်ရေးဆိုင်ရာ လမ်းပြမြေပုံ၊ ကုန်သွယ်ရေး၊ စီးပွားရေး၊ သိပ္ပံ၊ နည်းပညာနှင့် ယဉ်ကျေးမှုဆိုင်ရာ ပူးပေါင်းဆောင်ရွက်မှု၊ တရားမဝင်နှင့် ကူးသန်းရောင်းဝယ်ရေးဆိုင်ရာ ကိစ္စရပ်များတွင် ဥပဒေရေးရာအပြန်အလှန် အကူအညီပေးရေး သဘောတူစာချုပ်နှင့် ရင်းနှီးမြှုပ်နှံမှုမြှင့်တင်ရေးဆိုင်ရာ နားလည်မှုစာချွန်လွှာများပါဝင်ကြောင်း သိရှိရသည်။

 

ထူးခြားလေးနက်မှုများစွာဖြင့်

 

ယခုခရီးစဉ်မှ ကောင်းသောလက္ခဏာများစွာကို မြင်တွေ့ခဲ့ရပါပြီ။ ခရီးစဉ်က အဓိပ္ပာယ်များစွာရှိခဲ့သည်။ ကော်ဇောနီခင်း၊ တိုင်းရင်းသားရိုးရာအလှ အကများနှင့် နှစ်နိုင်ငံအလံများအောက်တွင် ခမ်းနားသောကြိုဆိုဧည့်ခံမှုများနှင့် အထူးအဆင့်အတန်း ထားရှိမှုများကို လေ့လာတွေ့ရှိရပါသည်။ ၂၀၂၁ အလွန် ပထမဦးဆုံးလာရောက်လည်ပတ်သော ဘယ်လာရုစ်နိုင်ငံသမ္မတကြီး မြန်မာ့လေပိုင်နက်ထဲရောက်သည်နှင့် မြန်မာ့တပ်မတော်(လေ)မှ စတုတ္ထမြောက်မျိုးဆက်လွန် SU-30 SME ဘက်စုံသုံး ဂျက်တိုက်လေယာဉ်သုံးစင်း လိုက်ပါခြံရံ၍ ကြိုဆိုဂုဏ်ပြုမှုနှင့် လိုက်ပါပို့ဆောင်နှုတ်ဆက်ခြင်းများက အလွန်ထူးခြားခဲ့ပါသည်။ နိုင်ငံတကာဆက်ဆံရေးတွင် အရေးပါမှုတစ်ခု၊ စစ်ရေးစွမ်းရည်ပြသရာ စစ်ယဉ်ကျေးမှုတစ်ခု၊ လုံခြုံရေးအပေါ် အလေးထားမှုနှင့်အတူ ယုံကြည်မှုဖြင့် ချစ်ကြည်ရေးကို တည်ဆောက်ပြီး အမြင့်ဆုံးသော ဂုဏ်ပြုမှုတစ်ခုဖြစ်ခဲ့ပါသည်။ ဂုဏ်ပြုမြင်းတပ်ဖွဲ့ဖြင့် ချီးမြှောက်ဂုဏ်ပြုခြင်းကလည်း ဧည့်သည်တော်ကြီး၏ အရေးပါမှုနှင့် အလေးအနက်ထားမှုကို ဖွင့်ဟရာရောက်ခဲ့သည်။ မြန်မာနိုင်ငံ၏ သမိုင်းနှင့်ချီသည့် ခွန်အားပါသော ယဉ်ကျေးမှု၊ သစ္စာရှိမှုနှင့် ကျေးဇူးတရားသိမှု ထုံးတမ်းအစဉ်အလာတစ်ခုကို ထိန်းသိမ်းဖော်ပြရာလည်း ရောက်ပါသည်။ လေးစားမှုကိုပြသည်၊ ချစ်ခြင်းမေတ္တာနှင့် နွေးထွေးမှုကိုပြသခြင်းဖြင့် ထူးခြားလေးနက်မှုများစွာရှိခဲ့ပါသည်။

 

ဤနေ့ ဤရက် သမိုင်းဝင်လေးနက်ခဲ့ပါသည်

 

ခရီးစဉ်တစ်ခုလုံးတွင် ထူးခြားလေးနက်မှု များစွာရှိခဲ့ရာ ၂၈- ၁၁- ၂၀၂၅ ရက်သည် နှစ်နိုင်ငံလုံးအတွက် သမိုင်းဝင်နေ့ရက်တစ်ခု ဖြစ်ခဲ့ရသည်။ မြန်မာပြည်သူ ဗုဒ္ဓဘာသာဝင်တို့ အလေးအမြတ်ထားရာ အထွတ်အမြတ်တစ်ခုဖြစ်သည့်  နေပြည်တော် မာရဝိဇယဗုဒ္ဓရုပ်ပွားတော်မြတ်ကြီးသို့ ဧည့်သည်တော်သမ္မတကြီး လာရောက်ဖူးမြော်ကြည်ညို၍ ကုသိုလ်ပြုခဲ့သည့်အတွက်ဖြစ်သည်။ ထို့အတွက် ဗုဒ္ဓဘာသာဝင်အားလုံး ဝမ်းသာပီတိ ဂုဏ်ယူရပါသည်။ ထို့နောက် နေပြည်တော်ရှိ တစ်ချိန်က BIMSTEC အဖွဲ့ဝင် နိုင်ငံအကြီးအကဲများ စိုက်ပျိုးခဲ့သည့် အထိမ်းအမှတ်သစ်ပင်များ တည်ရှိရာ အမျိုးသားပရဆေးဥယျာဉ်၌ နှစ်နိုင်ငံခေါင်းဆောင်များ အမှတ်တရ ကံ့ကော်ပင်စိုက်ပျိုးခဲ့သည့် အထိမ်းအမှတ် အခမ်းအနားတစ်ခုသည်လည်း နှစ်နိုင်ငံချစ်ကြည်ရေး အဓွန့်ရှည်ရေးအုတ်မြစ်တစ်ခု စိုက်ထူလိုက်ခြင်းမည်ပါသည်။ နောက်ထပ်ထူးခြားမှုတစ်ခုက နေပြည်တော် သီရိရတနာအဆင့်မြင့်စျေးရှေ့ လမ်းတစ်ခုကို ဘယ်လာရုစ်နိုင်ငံ မြို့တော် မင့်စ်မြို့ကိုအစွဲပြုကာ မင့်စ်လမ်းဟူ၍ အမည်ပေးခဲ့ခြင်းပင် ဖြစ်သည်။ မြန်မာနိုင်ငံက လမ်းတစ်ခုကို နိုင်ငံခြားမှ မြို့တော်တစ်ခုအမည်ကိုပေးခြင်းကား သမိုင်းဝင် ထူးခြားမှုတစ်ခုပင် ဖြစ်သည်။

 

နှစ်နိုင်ငံကြား ချစ်ခြင်းတရားကား ဘောင်ခတ်ထားခြင်းအလျှင်းမရှိ၊ နယ်နိမိတ်မခြား၊ အဆီးအတားမရှိ တိုးတက်ဖြစ်ထွန်းခဲ့ပါပြီ။ တစ်ဦးနှင့်တစ်ဦး မဟာဗျူဟာမြောက် အကျိုးစီးပွားမိတ်ဖက်များ အဖြစ်လည်း ပို၍ထင်ရှားခဲ့ပါပြီ။ ဘယ်လာရုစ်နိုင်ငံသည် မြန်မာနိုင်ငံ၏ လိုအပ်ချက်များအတွက် တကယ့်မိတ်ဆွေအစစ်အမှန် အနာဂတ်အတွက် စံပြတစ်ခုဖြစ်ခဲ့ပါပြီ။ မြန်မာနိုင်ငံအနေဖြင့် အနာဂတ်တွင် BRICS အဖွဲ့ဝင်၊ SCO အဖွဲ့ဝင်၊ EAEU အဖွဲ့ဝင်ဖြစ်လာရေး ကြိုးပမ်းအားထုတ်မှုများတွင် အားသာချက်များအဖြစ် ပေါ်လွင်လာမည်ဟု ယူဆပါသည်။ ရေရှည်လက်တွဲမည့် မဟာမိတ်များပီပီ နိုင်ငံတကာမျက်နှာစာတွင် ဘယ်လာရုစ်နိုင်ငံ၏ ထောက်ခံအားပေးမှုသည် ပို၍ခိုင်မာလာတော့မည်ဟု ယုံကြည်ပါသည်။ မြန်မာ-ဘယ်လာရုစ်ဆက်ဆံ ရေးအတိတ်သမိုင်းလှခဲ့သလို ပစ္စုပ္ပန်လည်း ထို့အတူ၊ အနာဂတ်သမိုင်းလည်း လှနေတော့မှာ မလွဲပါဟူ၍ ဂုဏ်ပြုအပ်ပါသည်။ ။