ငြိမ်းချမ်းရေးအတွက် နုပျိုသည့် အားမာန်သစ် (မြန်မာ့အလင်း)

 

၅၁ ဒသမ ၃ သန်းကျော်သော နိုင်ငံ့လူဦးရေတွင် လူငယ်ဦးရေက သုံးပုံတစ်ပုံကျော်ရှိသည်။ မြန်မာနိုင်ငံတွင် အလုပ်လုပ်နိုင်သည့် အရွယ်ရှိသော လူဦးရေအချိုးအစားများပြားခြင်းကြောင့် လူဦးရေဆိုင်ရာဆုလာဘ်ကို ရရှိနေသည်ဟူ၍ပင် ၂၀၁၄ ခုနှစ်က ကောက်ယူခဲ့သည့် သန်းခေါင်စာရင်းတွင်ရော ၂၀၂၄ ခုနှစ် သန်းခေါင်စာရင်း အစီရင်ခံစာကပါဆိုထားသည်။ မြန်မာနိုင်ငံတွင် လူငယ်ဆိုသည်မှာ အသက် ၁၅ နှစ်မှ ၃၅ နှစ်အတွင်းအရွယ်ရှိ နိုင်ငံသားများကို ဆိုလိုခြင်းဖြစ်ရာ ဤမျှများပြားသည့် အားသစ်မာန်သစ်နှင့် တက်ကြွသည့် လူငယ်အင်အားများက နိုင်ငံအတွက် အဖိုးတန်အင်အားများပင်ဖြစ်သည်။

 

လက်ရှိအချိန်အခါသည် မိမိတို့နိုင်ငံအဖို့ သမိုင်းဝင်အကူးအပြောင်းကာလတစ်ရပ်ကို ရောက်ရှိနေသည်။ ၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲကို အပိုင်း (၃) ပိုင်းခွဲ၍ ကျင်းပလျက်ရှိရာ အပိုင်း (၁) နှင့် အပိုင်း (၂) တို့ကို အောင်မြင်စွာ ကျင်းပပြီးစီးခဲ့ပြီဖြစ်ပြီး မကြာမီ အပိုင်း (၃) ကျင်းပပြီးစီးပြီးနောက် လာမည့်မတ်လတွင် လွှတ်တော်များ ပေါ်ပေါက်လာတော့မည် ဖြစ်သည်။ ယင်းနောက် ဧပြီလတွင် ပြည်သူက ရွေးကောက်တင်မြှောက်ပေးလိုက်သည့် အစိုးရသစ်တစ်ရပ်ပေါ်ပေါက်လာခြင်းနှင့်အတူ နိုင်ငံနှင့် ပြည်သူတစ်ရပ်လုံးတို့သည်လည်း သမိုင်းစာမျက်နှာသစ်တစ်ရပ်ကို ရေးထိုးကြရမည်ဖြစ်သည်။ ဤတွင် သမိုင်းစာမျက်နှာသစ်ဟူသည် ပြီးခဲ့သည့် သမိုင်းစာမျက်နှာများ၏ အဆက်ပင်ဖြစ်ရာ မိမိတို့ဆောင်ရွက်ကြရမည့်လုပ်ငန်းများကို ကြိုတင်မှန်းဆကြည့်မည်ဆိုပါက နိုင်ငံဖွံ့ဖြိုးတိုးတက်ရေးလုပ်ငန်းစဉ်များကို အားထုတ်ကြိုးပမ်း ဆောင်ရွက်ခြင်းနှင့်အတူ မဖြစ်မနေလိုအပ်သည့် ငြိမ်းချမ်းရေးလုပ်ငန်းစဉ်များကို အားသွန်ခွန်စိုက် ဆောင်ရွက်ကြရမည် ဆိုသည်ကို တွေ့ရှိနိုင်သည်။ အဆိုပါလုပ်ငန်းစဉ်များကို တစ်မျိုးသားလုံးက ဆောင်ရွက်ကြရာတွင် နိုင်ငံလူဦးရေ၏ သုံးပုံတစ်ပုံရှိသော အင်အားစုကြီးဖြစ်သည့် လူငယ်များ မဖြစ်မနေပါဝင်ကြရမည်ဖြစ်သည်။

 

မဝေးတော့သည့် အနာဂတ်ကာလ၏ ငြိမ်းချမ်းရေးဖြစ်စဉ်နှင့် နိုင်ငံတည်ဆောက်ရေး လုပ်ငန်းစဉ်များတွင် လူငယ်များ ပါဝင်မှုကို မြှင့်တင်ပေးရန်အလို့ငှာ လူငယ်ငြိမ်းချမ်းရေးဖိုရမ်ကို ပြည်ထောင်စုနယ်မြေ၊ နေပြည်တော်တွင် ဇန်နဝါရီ ၁၃ ရက်မှ ၁၅ ရက်အထိ ကျင်းပခဲ့ရာ တိုင်းဒေသကြီးနှင့် ပြည်နယ် ၁၄ ခု နှင့် နေပြည်တော်ကောင်စီနယ်မြေမှ လူငယ်ကိုယ်စားလှယ်များအပြင် ပဋိပက္ခဘေးသင့်ရာဒေသများမှ လူငယ်များ၊ အဆင့်မြင့်ပညာရေး တက္ကသိုလ်များ၊ ပုဂ္ဂလိကအသင်းအဖွဲ့များနှင့် အရပ်ဘက်အဖွဲ့အစည်းများမှ လူငယ်များ တက်ရောက်ကြပြီး အနာဂတ်ကာလတွင် လူငယ်များပါဝင်နိုင်မည့် ကဏ္ဍများနှင့် လုပ်ငန်းများကို သုံးရက်ကြာရင်းနှီးပွင့်လင်းစွာ ဆွေးနွေးဖလှယ်ကြပြီး ကြေညာစာတမ်းတစ်ရပ် ထုတ်ပြန်ကြေညာခဲ့သည်။ နိုင်ငံတစ်ဝန်းရှိ လူငယ်များကို ငြိမ်းချမ်းရေးတည်ဆောက်ရေး၊ စည်းလုံးညီညွတ်ရေးနှင့် နိုင်ငံဖွံ့ဖြိုးတိုးတက်ရေးတို့တွင် စုပေါင်းပါဝင်လာရေးနှင့် စွမ်းရည်ပြည့်ဝသော ခေါင်းဆောင်များ ဖြစ်ပေါ်လာရန်အတွက် လူငယ်များအား ငြိမ်းချမ်းရေးအသိ မြှင့်တင်ပေးနိုင်ရန်ဟူသော ဖိုရမ်၏ဦးတည်ချက်လည်း အောင်မြင်ခဲ့သည်။

 

၂၀၂၆ ခုနှစ် လူငယ်ငြိမ်းချမ်းရေးဖိုရမ် ကြေညာစာတမ်းပါ သန္နိဋ္ဌာန် (၅) ရပ်အရ နိုင်ငံတော်၏ အနာဂတ်ကာလတွင် ဆက်လက်ဆောင်ရွက်မည့် ငြိမ်းချမ်းရေးလုပ်ငန်းစဉ်များတွင် ငြိမ်းချမ်းရေးကို ပြင်းပြစွာလိုလားကြသော လူငယ်များနှင့် ဖွဲ့စည်းထားသည့် လူငယ်ကွန်ရက်များ ပါဝင်ဆောင်ရွက်လာသည်ကို တွေ့မြင်ရမည်ဖြစ်သည်။ လူငယ်စွမ်းရည်မြှင့်တင်ရေးနှင့် လူငယ်ဆိုင်ရာစီမံကိန်းများ၊ စီမံချက်များပေါ်ထွက်လာပြီး မြန်မာနိုင်ငံ၏ ငြိမ်းချမ်းရေးဖြစ်စဉ်များနှင့် စပ်လျဉ်း၍ နိုင်ငံတကာနှင့် ပြည်တွင်းပြည်ပမီဒီယာရပ်တည်ချက်များကို ပြည်တွင်းလူငယ်များ၏ အမြင်နှင့် ပုံရိပ်တို့ပြောင်းလဲလာမည်ဖြစ်သည်။ အနာဂတ်နိုင်ငံတည်ဆောက်ရေးအတွက် လူငယ်နှင့် ငြိမ်းချမ်းရေးမူဝါဒဆိုင်ရာစာတမ်း (Youth Peace Policy Paper) တစ်ရပ်လည်း ပေါ်ထွက်လာမည်ဖြစ်သည်။

 

ငြိမ်းချမ်းရေးသည် နိုင်ငံ၏အနာဂတ်အတွက်ရောအနာဂတ်ကို ပိုင်စိုးသည့် လူငယ်များအတွက်ပါ လိုအပ်သည့်အရာဖြစ်သည်။ ငြိမ်းချမ်းသည့်နိုင်ငံ၊ ငြိမ်းချမ်းသည့် လူ့အဖွဲ့အစည်းကို တည်ဆောက်ရာတွင် စွမ်းရည်မြင့်မား၍ ထက်မြက်တက်ကြွသော လူငယ်အင်အားစုကြီး ပါဝင်လာခြင်းသည် ခရီးပန်းတိုင်ကို လျင်မြန်စွာရောက်ရှိရေးအတွက် ကြီးမားသည့် အင်အားကို ဖြစ်ထွန်းစေပါမည့်အကြောင်း။ ။