(၁၃)ကြိမ်မြောက် အာဆီယံ မသန်စွမ်းအားကစားပြိုင်ပွဲသို့ ဝင်ရောက်ယှဉ်ပြိုင်မည့် မသန်စွမ်း အားကစားအဖွဲ့များ လေ့ကျင့်ပြင်ဆင်
ရန်ကုန် ဇန်နဝါရီ ၁၄
မြန်မာနိုင်ငံအိုလံပစ်ကော်မတီဥက္ကဋ္ဌ အားကစားနှင့်လူငယ်ရေးရာဝန်ကြီးဌာနနှင့် ဟိုတယ်နှင့်ခရီး သွားလာရေးဝန်ကြီးဌာန ပြည်ထောင်စုဝန်ကြီး Jeng Phang နော်တောင်သည် အားကစားနှင့် ကာယပညာဦးစီးဌာန ညွှန်ကြားရေးမှူးချုပ်နှင့်အတူ ယမန်နေ့ညနေပိုင်းတွင် ဒဂုံမြို့သစ်မြောက်ပိုင်းရှိ မြန်မာနိုင်ငံ မသန်စွမ်းအားကစားအဖွဲ့ချုပ်သို့ သွားရောက်၍ (၁၃)ကြိမ်မြောက် အာဆီယံမသန်စွမ်း အားကစားပြိုင်ပွဲသို့ ဝင်ရောက်ယှဉ်ပြိုင်မည့် မသန်စွမ်း အားကစားအဖွဲ့များ၏ လေ့ကျင့်နေမှုများကို လိုက်လံ ကြည့်ရှုအားပေးသည်။
ကြည့်ရှုအားပေး
ဦးစွာ ပြည်ထောင်စုဝန်ကြီးနှင့်အဖွဲ့သည် (၁၃)ကြိမ်မြောက် အာဆီယံမသန်စွမ်း အားကစားပြိုင်ပွဲသို့ ဝင်ရောက်ယှဉ်ပြိုင်ရန်အတွက် အားကစားနည်းအလိုက် လေ့ကျင့်နေမှုကို ကြည့်ရှုအားပေးပြီး မိမိတို့ မျှော်မှန်းထားသည့်အတိုင်း ရွှေတံဆိပ်ဆုများ ရရှိအောင် အစွမ်းကုန် ကြိုးစားသွားကြစေလိုကြောင်း၊ ပြိုင်ပွဲယှဉ်ပြိုင်ရာ၌ နောက်ဆုံးအချိန်အထိ မလျှော့သောဇွဲ၊ စိတ်ဓာတ်ဖြင့် ကြိုးစားသွားစေလိုကြောင်း၊ မသန်ပေမယ့် စွမ်းဆောင်နိုင်သူများဖြစ်ပြီး နိုင်ငံ့ဂုဏ်ကို အားကစားဖြင့် စွမ်းဆောင်နိုင်သူများ ဖြစ်အောင် အစွမ်းကုန်ကြိုးစားသွားရန် တိုက်တွန်း မှာကြားသည်။
ယနေ့မွန်းလွဲပိုင်းတွင် ပြည်ထောင်စုဝန်ကြီးသည် အားကစားနှင့်ကာယပညာသိပ္ပံ (ရန်ကုန်) စားရိပ်သာသို့ရောက်ရှိကာ အားကစားနှင့် ကာယပညာသိပ္ပံ(ရန်ကုန်) ကျောင်းသား ကျောင်းသူများအား ရင်းရင်းနှီးနှီး လိုက်လံနှုတ်ဆက်ပြီး အတူတကွ နေ့လယ်စာ စားသုံးသည်။
ယင်းနောက် အားကစားနှင့်ကာယပညာသိပ္ပံ(ရန်ကုန်)ရှိ ပြည်ထောင်စုခန်းမ၌ အားကစားနှင့် ကာယပညာဦးစီးဌာန အားကစားနှင့်ကာယပညာသိပ္ပံ(ရန်ကုန်)မှအရာထမ်း၊ အမှုထမ်းများ၊ အားကစားနှင့် ပညာရေး ပေါင်းစပ်အထက်တန်းကျောင်းမှ ကျောင်းအုပ်ဆရာမကြီး၊ ဆရာ ဆရာမများအား ရင်းရင်းနှီးနှီးတွေ့ဆုံ၍ အားကစားကဏ္ဍ၊ ပညာရေး ကဏ္ဍများနှင့်ပတ်သက်ပြီး အားကစားသမားများ၏ လေ့ကျင့်နေမှုများနှင့် အောင်မြင်မှုများ ရရှိစေရေး၊ တက္ကသိုလ်ဝင်စာမေးပွဲ အောင်ချက်မြင့်မားစေရေး ပူးပေါင်းဆောင်ရွက်ပေးသွားရန် တိုက်တွန်းမှာကြား သည်။
ထို့နောက် တက်ရောက်လာကြသည့် ဌာနခွဲအလိုက် ဝန်ထမ်းများက သက်ဆိုင်ရာ ကဏ္ဍများအလိုက် လုပ်ငန်းဆောင်ရွက်နေမှု အခြေအနေနှင့် လိုအပ်ချက်များကို တင်ပြဆွေးနွေးရာ အားကစားနှင့် ကာယပညာဦးစီးဌာန ညွှန်ကြားရေးမှူးချုပ်က ပြန်လည်ရှင်းလင်းဖြေကြား၍ လိုအပ်သည်များကို ဖြည့်စွက်ဆွေးနွေးပြောကြားကာ ပြည်ထောင်စုဝန်ကြီးက နိဂုံးချုပ်အမှာစကား ပြောကြားခဲ့ကြောင်း သိရသည်။
သတင်းစဉ်
No comments