ဒုတိယဝန်ကြီး ဦးဗိုလ်ဗိုလ်ကျော် မအူပင်ခရိုင်အတွင်း ရေဘေးကာကွယ်ရေးလုပ်ငန်းများနှင့် ရေနုတ်မြောင်း တူးဖော်ခြင်းလုပ်ငန်းများ ကြည့်ရှုစစ်ဆေး

 

နေပြည်တော် ဇန်နဝါရီ ၁၃

 

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်သည် ဇန်နဝါရီ ၁၀ ရက် နံနက်ပိုင်းက ဧရာဝတီတိုင်းဒေသကြီး မအူပင်ခရိုင် ညောင်တုန်းမြို့နယ်ရှိ ပန်းလှိုင်ရေထိန်းတံခါးသို့ သွားရောက်စစ်ဆေးသည်။

 

ကြည့်ရှုစစ်ဆေးစဉ် ဒုတိယဝန်ကြီးက ညောင်တုန်းကျွန်းပတ်တာအတွင်း သီးနှံများစိုက်ပျိုးနိုင်သည့် မြေနေရာများတွင် စိုက်ပျိုးဧကများ လျော့နည်းမှုမရှိစေရေး၊ ရေပေးမြောင်းများ၊ ရေနုတ်မြောင်းများ၊ ရေတံခါးများ ကောင်းမွန်မှု ရှိစေရေး၊ ညောင်တုန်းကျွန်းပတ်တာအတွင်း မူလလျာထား စိုက်ဧကများအတိုင်း စိုက်ပျိုးနိုင်စေရေးနှင့် စာရင်းဇယားကိန်း ဂဏန်းများ တိကျမှန်ကန်စေရေး သက်ဆိုင်ရာဌာန တာဝန်ရှိသူများနှင့် ပူးပေါင်းဆောင်ရွက်ရန် ဆွေးနွေးမှာကြားကာ ပန်းလှိုင်ရေထိန်းတံခါးမြစ်ဘက် အထွက်မြောင်း သဲနုန်းတူးဖော်ခြင်း အခြေအနေကို ကြည့်ရှုစစ်ဆေးသည်။

 

ထို့နောက် ဒုတိယဝန်ကြီးသည် စိုက်ပျိုးရေးနှင့် မွေးမြူရေးတက္ကသိုလ်(မအူပင်)သို့ ရောက်ရှိပြီး ပါမောက္ခချုပ်များ၊ ဆရာ ဆရာမများနှင့်တွေ့ဆုံရာ တာဝန်ရှိသူများက ပထမနှစ်သင်တန်းများ စတင်သင်ကြားပို့ချလျက်ရှိသည့်အခြေအနေများ၊ သင်ကြားရေး ဆရာ ဆရာမ အင်အားဖြည့်တင်းနိုင်ရေး အခြေအနေများ၊ သင်ကြားရေးအထောက်အကူပြု လက်တွေ့ခန်းများအတွက် ဓာတ်ခွဲခန်းသုံး ပစ္စည်းများ ဖြည့်ဆည်းရန် စီမံထားရှိမှု အခြေအနေများ၊ ဘွဲ့လွန်သင်တန်းများ စတင်ဖွင့်လှစ်နိုင်ရေးနှင့် အပြည်ပြည်ဆိုင်ရာ သုတေသန အခြေပြုတက္ကသိုလ်များနှင့် ချိတ်ဆက်ကာ နားလည်မှု စာချွန်လွှာများ လက်မှတ်ရေးထိုးရေး ဆောင်ရွက်မည့် အခြေအနေများ စသည့်တက္ကသိုလ်ဖွံ့ဖြိုးတိုးတက်ရေး အစီအစဉ်များနှင့် တက္ကသိုလ် စိမ်းလန်းစိုပြည်ရေးအတွက် ဆောင်ရွက်သွားမည့် အစီအစဉ်များ ရှင်းလင်းတင်ပြမှုကို ဒုတိယဝန်ကြီးက လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

 

ယင်းနောက် ဝန်ကြီးဌာနအောက်ရှိ ခရိုင်ဦးစီးမှူးများနှင့် တွေ့ဆုံ၍ ဒုတိယဝန်ကြီးက မအူပင်မြို့အတွင်း သန့်ရှင်းသာယာလှပရေးနှင့် ရေနုတ်မြောင်းများ ရေစီးရေလာ ကောင်းမွန်စေရေး ရေတိုရေရှည် ဆောင်ရွက်ရမည့် ရေနုတ်မြောင်း တူးဖော်ခြင်း လုပ်ငန်းများနှင့် အခြားဆက်စပ်လုပ်ငန်းများအတွက် ကွင်းဆင်းဆောင်ရွက်သည့်နေရာ၌ မိုးရာသီကာလ ရွာသွန်းသည့် မိုးရေများကို ရေနုတ်မြောင်းများ၊ တံတားငယ်များနှင့် ပြွန်တံတားများ (Box Culvert) တို့မှ ကောင်းမွန်နိုင်နင်းစွာ ရေထုတ်နုတ်နိုင်ရေးအတွက် လိုအပ်သည့် ဒီဇိုင်းပုံစံများအတိုင်း လုံလောက်သည့်ပမာဏ ရရှိအောင် ဆောင်ရွက်နိုင်ရေးကို ပတ်သက်ဆက်စပ်သည့် ဌာနဆိုင်ရာများနှင့် ပူးပေါင်းညှိနှိုင်းပြီး အထူးအလေးထား ဆောင်ရွက်ရန်၊ အသေးစိတ် တိုင်းတာလေ့လာပြီးမှ သတ်မှတ်ဒီဇိုင်းပုံစံများနှင့်အညီ စနစ်တကျ ဆောင်ရွက်ကြရန်နှင့် ဦးစားပေးအစီအစဉ်များအလိုက် အချိန်မီပြီးစီးရေး ဆောင်ရွက်ကြရန် ဆွေးနွေးမှာကြားသည်။

 

ဆက်လက်၍ ဒုတိယဝန်ကြီးနှင့် တာဝန်ရှိသူများသည် စိုက်ပျိုးရေးနှင့် မွေးမြူရေးတက္ကသိုလ် (မအူပင်) ကျောင်းဝင်းအတွင်းရှိ ရေနုတ်မြောင်းများ တူးဖော်ဆောင်ရွက်ပြီးစီးမှု အခြေအနေများ၊ မြို့တွင်းရေနုတ်မြောင်းများ တူးဖော်ဆောင်ရွက်နေမှု အခြေအနေ၊ မြို့ပေါ်ရပ်ကွက်များအတွင်းရှိ ရေနုတ်မြောင်းများ၊ တံတားငယ်များ၊ ပြွန်တံတားများ (Box Culvert) နှင့် ရေတံခါးတပ်ဆင်ရန် လျာထားသည့် နေရာများကို ကြည့်ရှုစစ်ဆေးပြီး လိုအပ်သည်များ ဆွေးနွေးမှာကြားခဲ့ကြောင်း သိရသည်။

သတင်းစဉ်