ချန်ပီယံလိဂ်ရှုံးထွက်အဆင့် ဒုတိယအကျော့တွင် အက်သလက်တီကိုမက်ဒရစ်၊ ကာဆယ်တို့ နိုင်ပွဲရပြီး အင်တာမီလန် ရှုံးနိမ့်

ယူအီးအက်ဖ်အေ ချန်ပီယံလိဂ်ရှုံးထွက် အဆင့် ဒုတိယအကျော့အဖြစ်  ဖေဖော်ဝါရီ ၂၅ ရက်  နံနက် ၂ နာရီခွဲက Stadio Giuseppe Meazza  ကွင်း၌ ယှဉ်ပြိုင်ကစားခဲ့သည့် အီတလီနာမည်ကြီး အင်တာမီလန်နှင့် နော်ဝေကလပ် ဘိုဒိုဂလင့်အသင်းပွဲစဉ်တွင် ဘိုဒိုဂလင့်အသင်းက  အကြိတ်အနယ်  ကစားပြီး နှစ်ဂိုး-တစ်ဂိုးဖြင့် နိုင်ပွဲရရှိခဲ့သည်။

ဘိုဒိုဂလင့်အသင်းသည် ဖေဖော်ဝါရီ ၁၉  ရက်က  ယှဉ်ပြိုင်ကစားခဲ့သည့် ပထမအကျော့တွင်လည်း အင်တာမီလန်အသင်းကို သုံးဂိုး-တစ်ဂိုးဖြင့် နိုင်ပွဲရရှိထားသည်။ ထို့ကြောင့် ဘိုဒိုဂလင့်အသင်းသည် နာမည်ကြီး အင်တာမီလန်အသင်းကို    နှစ်ကျော့ပေါင်းရလဒ်    ငါးဂိုး-နှစ်ဂိုးဖြင့် နိုင်ပွဲရရှိကာ နောက်တစ်ဆင့်သို့ တက်လှမ်းနိုင်ခဲ့ပြီဖြစ်သည်။

လက်ရှိ အီတလီစီးရီးအေအမှတ်ပေးဇယားတွင်လည်း မြို့ခံပြိုင်ဘက် အေစီမီလန်အသင်းကို ၁၀ ပြတ် ဦးဆောင်ထားသော အင်တာမီလန်အသင်းသည် ဘိုဒိုဂလင့်အသင်းကို ပွဲစတင်ကတည်းက တစ်ဖတ်သတ် ဖိအားပေးကစားနိုင်ခဲ့သော်လည်း ရှုံးပွဲကြုံတွေ့ကာ နောက်တစ်ဆင့် တက်လှမ်းခွင့် လွဲချော်ခဲ့ရပြီဖြစ်သည်။

ဘိုဒိုဂလင့်အသင်းသည်  ချန်ပီယံလိဂ်ပြိုင်ပွဲ   နောက်တစ်ဆင့်တွင် မန်စီးတီးနှင့် စပို့တင်းအသင်းတို့ ထဲမှ အနိုင်ရရှိမည့်အသင်းနှင့် ယှဉ်ပြိုင်ကစားရမည်ဖြစ်သည်။

အခြားပွဲစဉ်ရလဒ်များတွင် အက်သလက်တီကိုမက်ဒရစ်က ကလပ်ဘရုဂေးကို လေးဂိုး-တစ်ဂိုး၊ နယူးကာဆယ်က ကာရာဘတ်ကို သုံးဂိုး-နှစ်ဂိုးဖြင့် နိုင်ပွဲရရှိပြီး လေဗာကူဆင်နှင့် အိုလံပီယာ ကော့စ် အသင်းပွဲစဉ်တွင်   ဂိုးမရှိ  သရေကျခဲ့သည်။   ချန်ပီယံလိဂ်ရှုံးထွက်အဆင့် ဒုတိယ အကျော့ ပွဲစဉ်များမှ ဖေဖော်ဝါရီ ၂၅ ရက် နံနက်ပိုင်း  ယှဉ်ပြိုင်ကစားပြီး သည့်ပွဲစဉ်များတွင် ဘိုဒိုဂလင့်အသင်း နှင့်အတူ နှစ်ကျော့ပေါင်းရလဒ်ဖြင့် အက်သလက်တီကို မက်ဒရစ်၊ လေဗာကူဆင်နှင့် နယူး ကာဆယ် အသင်းတို့ နောက်တစ်ဆင့်သို့ တက်လှမ်းနိုင်ခဲ့သည်။                  

အောင်ဇော်