ဥပ‌ဒေရေးရာဝန်ကြီးဌာန၏ ၂၀၂၆ ခုနှစ်၊ မြန်မာသက္ကရာဇ် ၁၃၈၈ ခုနှစ် မဟာသင်္ကြန်အကြို စတုဒိသာ ကျွေးမွေးခြင်းနှင့် ပျော်ပွဲရွှင်ပွဲများကျင်းပ

နေပြည်တော် ဧပြီ ၁၂

 

ဥပဒေရေးရာဝန်ကြီးဌာန နေပြည်တော်တွင် တာဝန်ထမ်းဆောင်လျက်ရှိသော အရာထမ်း၊ အမှုထမ်းများ၏ ၂၀၂၆ ခုနှစ် မြန်မာသက္ကရာဇ် ၁၃၈၈ ခုနှစ် မဟာသင်္ကြန်အကြို စတုဒိသာ ကျွေးမွေးခြင်းနှင့် ပျော်ပွဲရွှင်ပွဲအခမ်းအနားကို ယနေ့နံနက်ပိုင်းက ဥပဒေရေးရာဝန်ကြီးရုံးရှေ့၌ ကျင်းပသည်။

 

ဦးစွာ ပြည်ထောင်စုဝန်ကြီးနှင့် ပြည်ထောင်စုရှေ့နေချုပ် ဒေါက်တာသီတာဦးက မဟာသင်္ကြန် ပွဲတော်သည် မြန်မာ့ယဉ်ကျေးမှုကို မဏ္ဍိုင်ပြု၍ သင်္ကြန်ရေပက်ဖျန်းခြင်း အလေ့အထနှင့် နှစ်ဟောင်းမှ အညစ်အကြေးများကို ရေစင်ရေသန့်တို့နှင့် ပက်ဖျန်းခြင်းဖြင့် စိတ်ကြည်လင် လန်းဆန်းအေးမြစေရန် ဖြစ်ကြောင်း၊ နှစ်သစ်တွင် ပျော်ရွှင်ကျန်းမာကြပါစေကြောင်း၊ စိတ်သစ်ကိုယ်သစ်ဖြင့် နိုင်ငံ့တာဝန်၊ မိသားစုတာဝန်များကို ကျေပွန်စွာထမ်းဆောင်နိုင်သူများ ဖြစ်ကြပါစေကြောင်း၊ ကမ္ဘာသူကမ္ဘာသား အားလုံးနှင့် မြန်မာနိုင်ငံသားအားလုံးလည်း ဘေးအန္တရာယ်အပေါင်းမှကင်းဝေးပြီး ချမ်းသာသုခနှင့် ပြည့်စုံကြပါစေကြောင်း နှစ်သစ်ဦးမင်္ဂလာစကား ပြောကြားသည်။

 

ယင်းနောက် ဒုတိယဝန်ကြီးနှင့် ဒုတိယရှေ့နေချုပ် ဒေါက်တာထိန်လင်းဦး၊ ဝန်ကြီးရုံး၊ အမြဲတမ်း အတွင်းဝန်နှင့် ဦးစီးဌာနအသီးသီးမှ ညွှန်ကြားရေးမှူးချုပ်များကလည်း နှစ်သစ်အတွက် ဆုတောင်း စကား ပြောကြားကြသည်။

 

ထို့နောက် ပြည်ထောင်စုဝန်ကြီးနှင့် ပြည်ထောင်စုရှေ့နေချုပ်နှင့်အဖွဲ့သည် ဥပဒေရေးရာဝန်ကြီးဌာနရှိ အရာထမ်း၊ အမှုထမ်းများကို စတုဒိသာကျွေးမွေးနေမှုများ၊ သင်္ကြန်တေးသီချင်းများဖြင့် သီဆိုဖျော်ဖြေမှုများ၊ ၁၀ ဦးယိမ်းအဖွဲ့၊ ၁၆ ဦး ယိမ်းအဖွဲ့များ၏ ကပြဖျော်ဖြေနေမှုများကို ကြည့်ရှု အားပေးကာ ဂုဏ်ပြုဆုငွေများ ပေးအပ်ချီးမြှင့်သည်။

 

အဆိုပါအခမ်းအနားသို့ ဝန်ကြီးရုံး၊ အမြဲတမ်းအတွင်းဝန်နှင့် ဦးစီးဌာနများမှ ညွှန်ကြားရေးမှူးချုပ်များ၊ ဒုတိယ ညွှန်ကြားရေးမှူးချုပ်များ၊ ညွှန်ကြားရေးမှူးများနှင့် အရာထမ်း၊ အမှုထမ်းများ တက်ရောက်ကြပြီး အခမ်းအနားကို ညနေပိုင်းတွင် အောင်မြင်စွာ ရုပ်သိမ်းခဲ့ကြောင်း သိရသည်။  

 

သတင်းစဉ်