တနင်္သာရီတိုင်းဒေသကြီး ရဲတပ်ဖွဲ့ရုံးက ဦးဆောင်၍ ပြည်သူ့အကျိုးပြုလုပ်ငန်းများဆောင်ရွက်

 

ထားဝယ် မေ ၂၅

 

ပြည်ထဲရေးဝန်ကြီးဌာန မြန်မာနိုင်ငံရဲတပ်ဖွဲ့ဌာနချုပ်၏ လမ်းညွှန်မှုဖြင့် အသွင်သဏ္ဌာန်နှင့် အနှစ်သာရ ပြုပြင်ပြောင်းလဲစေရန် လုပ်ငန်းတာဝန်(၄)ရပ်၊ လုပ်ငန်းစဉ်(၆)ရပ်တို့အား တနင်္သာရီတိုင်းဒေသကြီး ရဲတပ်ဖွဲ့ရုံးမှ အကောင်ထည်ဖော် ဆောင်ရွက်လျက်ရှိရာ ယမန်နေ့နံနက်ပိုင်းတွင် တိုင်းဒေသကြီးရဲတပ်ဖွဲ့မှူးရုံးက ဦးဆောင်၍ ထားဝယ်ခရိုင်/မြို့နယ် ရဲတပ်ဖွဲ့မှူးရုံးမှ တပ်ဖွဲ့ဝင်များက ထားဝယ်မြို့ သပြေချောင်းကျေးရွာရှိ အမှတ်(၅)အခြေခံပညာ အထက်တန်းကျောင်း၌ ပြည်သူ့အကျိုးပြုလုပ်ငန်းဖြစ်သည့် စုပေါင်းသန့်ရှင်းရေး လုပ်ငန်းများ ဆောင်ရွက်သည်။ 

 

ထို့နောက် တိုင်းဒေသကြီး ရဲတပ်ဖွဲ့မှူး ရဲမှူးကြီးမြင့်ထွန်း ဦးစီး၍ တပ်ဖွဲ့ဝင်များက ကျောင်းဝင်းအတွင်း သစ်ပင်ချုံနွယ်များ ခုတ်ထွင်ရှင်းလင်းခြင်း၊ မြက်ပင်နှင့် အမှိုက်များ ရှင်းလင်းခြင်း၊ ထွက်ရှိလာသော အမှိုက်များအား စနစ်တကျစွန့်ပစ်ခြင်းများကို စုပေါင်းဆောင်ရွက်ပေးခဲ့ကြောင်း သိရသည်။

ငွေဇင်ယော်(ထားဝယ်)