အာရှတွင် ၂၀၂၆ ခုနှစ် ဒုတိယဆွဲဆောင်မှုအရှိဆုံး ခရီးသွားနေရာအဖြစ် ကမ္ဘောဒီးယားနိုင်ငံ အန်ကောဝပ် ဘုရားကျောင်း ရပ်တည်

မေ ၄

ကမ္ဘောဒီးယားနိုင်ငံ အန်ကောဝပ်ဘုရားကျောင်းသည်၂၀၂၆ ခုနှစ် အာရှ၏ ဆွဲဆောင်မှုအရှိဆုံး ခရီးသွားနေရာများတွင် ဒုတိယနေရာ ရရှိခဲ့သည်ဟု ကမ္ဘောဒီးယား ခရီးသွားလုပ်ငန်းဝန်ကြီး Huot Hak က ယနေ့တွင် ပြောကြားခဲ့သည်။

အာရှ၏ ထိပ်တန်းခရီးသွားနေရာ ၂၅ ခုစာရင်းတွင် စင်ကာပူနိုင်ငံ Gardens by the Bay သည် ပထမနေရာနှင့် အိန္ဒိယနိုင်ငံ Taj Mahal တို့သည် တတိယနေရာ ရရှိခဲ့ကြောင်း ခရီးသွားလုပ်ငန်းဝန်ကြီးက ၎င်း၏တရားဝင် လူမှုမီဒီယာပလက်ဖောင်းများတွင် ရေးသားထားသည်။

TripAdvisor ၏ ဝက်ဘ်ဆိုက်တွင် အန်ကောဝပ်သည် ၎င်း၏ဗိသုကာလက်ရာနှင့် ရှုပ်ထွေးသော ထွင်းထုမှုများဖြင့် ကမ္ဘာ့အံ့ဖွယ်နေရာတစ်ခုဖြစ်ပြီး နေထွက်ချိန်တွင် လူအများအပြား လာရောက်လည်ပတ်ကြသည်ဟု ဖော်ပြထားသည်။

ယူနက်စကို ကမ္ဘာ့အမွေအနှစ်နေရာအဖြစ် စူးစမ်းလေ့လာပြီး ၎င်း၏ဗိသုကာလက်ရာနှင့် ရှုပ်ထွေးသော ထွင်းထုမှုများကို နှစ်သက်ကြသည်ဟု TripAdvisor က ဆိုသည်။

အန်ကောဝပ်သည် အနောက်မြောက်ပိုင်း ဆီရမ်ရိ ပြည်နယ်ရှိ ယူနက်စကို စာရင်းဝင် အန်ကောဝပ် ရှေးဟောင်းသုတေသနဥယျာဉ်ရှိ အဓိကဘုရားကျောင်းများထဲမှ တစ်ခုဖြစ်သည်။ ၄၀၁ စတုရန်းကီလိုမီတာ ကျယ်ဝန်းသော ဥယျာဉ်တွင် ၉ ရာစုမှ ၁၃ ရာစုအထိ တည်ဆောက်ခဲ့သော ရှေးဟောင်းဘုရားကျောင်း ၉၁ ခု ရှိသည်ဟု သိရသည်။

အရှေ့တောင်အာရှနိုင်ငံတွင် အထင်ရှားဆုံး ခရီးသွားနေရာဖြစ်သည့် ရှေးဟောင်းဥယျာဉ်သည် ၂၀၂၆ ခုနှစ် ပထမလေးလအတွင်း နိုင်ငံတကာခရီးသွားစုစုပေါင်း ၃၂၂၀၀၄ ဦးကို ဆွဲဆောင်နိုင်ခဲ့ပြီး လက်မှတ်ရောင်းချမှုမှ အမေရိကန်ဒေါ်လာ ၁၅ ဒသမ ၅ သန်းခန့် ဝင်ငွေရရှိခဲ့ကြောင်း နိုင်ငံပိုင် အန်ကောဝပ် အင်တာပရိုက်စ်မှ နောက်ဆုံးထုတ်ပြန်သော အစီရင်ခံစာတွင် ဖော်ပြထားသည်။

ကိုးကား-ဆင်ဟွာ

ဘာသာပြန်-မြင့်မြင့်ချို