ပြည်ထောင်စုသမ္မတမြန်မာနိုင်ငံနှင့် တရုတ်ပြည်သူ့သမ္မတနိုင်ငံတို့အကြား တရုတ်-မြန်မာ အေးအတူပူအမျှ အသိုက်အဝန်း တည်ဆောက်မှု အရှိန်အဟုန်မြှင့်တင်ရေးဆိုင်ရာ ပူးတွဲကြေညာချက်

(၂၀၂၆ ခုနှစ်၊ ဇွန်လ ၁၇ ရက်)

၁။        တရုတ်ပြည်သူ့သမ္မတနိုင်ငံ၊ သမ္မတ မစ္စတာရှီကျင့်ဖျင်၏ ဖိတ်ကြားချက်အရ ပြည်ထောင်စု သမ္မတမြန်မာနိုင်ငံ၊ နိုင်ငံတော်သမ္မတ ဦးမင်းအောင်လှိုင်သည် ၂၀၂၆ ခုနှစ်၊ ဇွန်လ ၁၅ ရက် မှ ၁၉ ရက်အထိ တရုတ်ပြည်သူ့သမ္မတနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် (State Visit) သွားရောက်ခဲ့ပါသည်။

 

ခရီးစဉ်အတွင်း သမ္မတ မစ္စတာရှီကျင့်ဖျင်နှင့် နိုင်ငံတော်သမ္မတ ဦးမင်းအောင်လှိုင်တို့သည် တွေ့ဆုံဆွေးနွေးစဉ် တရုတ်-မြန်မာ“ဆွေမျိုးပေါက်ဖော်”ချစ်ကြည်ရေးကို ပိုမိုခိုင်မာစေရန်၊ ဘက်စုံမဟာ ဗျူဟာမြောက်ပူးပေါင်းဆောင်ရွက်မှုကို မြှင့်တင်ရန်နှင့် တရုတ်-မြန်မာ အေးအတူပူအမျှအသိုက် အဝန်းတည်ဆောက်ရေးကို ပိုမိုခိုင်မာလေးနက်မှုရှိစေရန် ကိစ္စရပ်များအပေါ် အမြင်ချင်းဖလှယ်ခဲ့ကြကာ အရေးကြီးသောသဘောတူညီချက်များ ရရှိခဲ့ကြပါသည်။ တရုတ်နိုင်ငံဝန်ကြီးချုပ် မစ္စတာလီချန်းနှင့် အမျိုးသားလွှတ်တော်ပြည်သူ့ကွန်ဂရက် အမြဲတမ်းကော်မတီဥက္ကဋ္ဌ မစ္စတာကျောက်လဲ့ကျိတို့သည်လည်း နိုင်ငံတော်သမ္မတ ဦးမင်းအောင်လှိုင်နှင့် သီးခြားစီ တွေ့ဆုံခဲ့ကြပါသည်။

 

၂။         တရုတ်နိုင်ငံနှင့် မြန်မာနိုင်ငံတို့သည် သံတမန်ဆက်ဆံရေး ထူထောင်ခဲ့သည့် လွန်ခဲ့သည့် (၇၆) နှစ်မှစတင်ကာ တစ်နိုင်ငံအပေါ်တစ်နိုင်ငံ စိတ်ရင်းမှန်ဖြင့် ယုံကြည်အားထားကြပြီး အပြန်အလှန်ပံ့ပိုး ကူညီကြသည့် အိမ်နီးချင်းကောင်း၊ မိတ်ဆွေကောင်း၊ မိတ်ဖက်ကောင်းများဖြစ်ခဲ့ကြကြောင်း နှစ်ဖက်လုံးကအလေးထားပြောကြားခဲ့ကြသည်။ နှစ်နိုင်ငံလုံးသည် တန်းတူရည်တူရှိမှုနှင့် အပြန်အလှန် အကျိုးဖြစ်ထွန်းစေမှုကို အစဉ်တစိုက်လိုက်နာကျင့်သုံးခဲ့ကြပြီး နိုင်ငံတော်၏ အချုပ်အခြာအာဏာ၊ လုံခြုံရေးနှင့်ဖွံ့ဖြိုးတိုးတက်မှု အကျိုးစီးပွားများ ကာကွယ်စောင့်ရှောက်ရေးတွင် တစ်နိုင်ငံကိုတစ်နိုင်ငံ ခိုင်မာစွာပံ့ပိုးကူညီခဲ့သည်။ ဒေသတွင်းနှင့် နိုင်ငံတကာ အခင်းအကျင်းတွင် ကြီးမားလေးနက်သော ပြောင်းလဲမှုများဖြစ်ပေါ်နေသည့် အခြေအနေကို ထောက်ရှု၍ နှစ်ဖက်လုံးသည် ငြိမ်းချမ်းစွာအတူ ယှဉ်တွဲ နေထိုင်ရေးမူကြီးငါးရပ်ကို စောင့်ထိန်းရန်၊ တရုတ်-မြန်မာ“ဆွေမျိုးပေါက်ဖော်”ချစ်ကြည်ရေးကို ပိုမို လက်ဆင့်ကမ်းသယ်ဆောင်ရန်၊ တန်းတူရည်တူရှိမှု၊ အပြန်အလှန်လေးစားမှု၊ ညှိနှိုင်းဆွေးနွေးမှုနှင့် နှစ်ဖက်အကျိုးဖြစ်ထွန်းမှုတို့အပေါ်အခြေခံ၍ ကဏ္ဍစုံတွင် လက်တွေ့ကျပြီး အပြန်အလှန်အကျိုးပြုသည့် ပူးပေါင်းဆောင်ရွက်မှုများကို တိုးမြှင့်ဖော်ဆောင်ရန်၊ တရုတ်-မြန်မာအေးအတူပူအမျှ အသိုက်အဝန်း တည်ဆောက်မှုကို ဆက်လက်မြှင့်တင်သွားရန်နှင့် နှစ်နိုင်ငံပြည်သူများအတွက် ပိုမိုကောင်းမွန်သော အကျိုးကျေးဇူးများဖော်ဆောင်ပေးရန် သဘောတူခဲ့ကြသည်။

 

၃။        နှစ်ဖက်လုံးက တစ်နိုင်ငံ၏ အဓိကအကျိုးစီးပွားနှင့် အလေးထားရမည့်အရေးကိစ္စရပ်များတွင် အပြန်အလှန်ခိုင်မာစွာ ဆက်လက်ပံ့ပိုးကူညီသွားကြမည်ဖြစ်ကြောင်း ထပ်လောင်းအတည်ပြုခဲ့ကြသည်။

မြန်မာနိုင်ငံ၌ အထွေထွေရွေးကောက်ပွဲ ကျင်းပခဲ့သည့်အပေါ် တရုတ်နိုင်ငံဘက်မှကြိုဆိုပြီး နိုင်ငံအတွင်း ရေရှည်တည်တံ့သော ငြိမ်းချမ်းရေး၊ တည်ငြိမ်ရေးနှင့်ဖွံ့ဖြိုးတိုးတက်ရေးတို့ဖော်ဆောင်ရန် မြန်မာနိုင်ငံ ဘက်မှကြိုးပမ်းအားထုတ်မှုများကို ဆက်လက်ထောက်ခံသွားမည်ဖြစ်ကြောင်း ထပ်လောင်း အတည်ပြုခဲ့သည်။

 

တရုတ်နိုင်ငံဘက်မှ မြန်မာနိုင်ငံအနေဖြင့် အမျိုးသားရေးအခြေအနေများနှင့်ကိုက်ညီပြီး ပြည်သူလူထုက ထောက်ခံအားပေးသည့် ဖွံ့ဖြိုးတိုးတက်မှုလမ်းကြောင်းအတိုင်း ဦးတည်သွားနေခြင်းကိုလည်းကောင်း၊ မြန်မာနိုင်ငံဘက်မှ နိုင်ငံ၏အချုပ်အခြာအာဏာ၊ လုံခြုံရေး၊ နယ်မြေတည်တံ့ခိုင်မြဲရေးနှင့် အမျိုးသားရေး ဂုဏ်သိက္ခာတို့ကို ကာကွယ်စောင့်ရှောက်ခြင်းကိုလည်းကောင်း၊ မြန်မာနိုင်ငံ၏ နိုင်ငံတော်တည်ငြိမ် အေးချမ်းရေး၊ အမျိုးသားပြန်လည်သင့်မြတ်ရေး၊ လူမှုစီးပွားဘဝဖြစ်ထွန်းရေးနှင့် ရေရှည်တည်တံ့သော ငြိမ်းချမ်းရေး ဖော်ဆောင်မှုကိုလည်းကောင်း ခိုင်မာစွာပံ့ပိုးကူညီသွားမည်ဖြစ်သည်။

 

မြန်မာနိုင်ငံဘက်မှ ကမ္ဘာပေါ်တွင် တရုတ်နိုင်ငံတစ်နိုင်ငံတည်းသာရှိကြောင်း၊ ထိုင်ဝမ်သည် တရုတ်နိုင်ငံ ပိုင်နက်၏ ခွဲခြား၍မရသော အစိတ်အပိုင်းတစ်ခုဖြစ်ကြောင်းနှင့် တရုတ်ပြည်သူ့သမ္မတနိုင်ငံအစိုးရသည် တရုတ်နိုင်ငံတစ်ခုလုံးကို ကိုယ်စားပြုသည့် တစ်ခုတည်းသောတရားဝင်အစိုးရဖြစ်ကြောင်း အသိအမှတ် ပြုလျက်၊ “တရုတ်နိုင်ငံတစ်နိုင်ငံတည်းမူဝါဒ”ကို ကိုင်စွဲထားသည့်အတိုင်း ဆက်လက်ရပ်တည်သွားမည် ဖြစ်ကြောင်း ထပ်လောင်းကတိပြုခဲ့သည်။ မြန်မာနိုင်ငံသည် မည်သည့်ပုံစံဖြင့်မဆိုပြုလုပ်သည့် “ထိုင်ဝမ် လွတ်လပ်ရေး” ဆောင်ရွက်မှုများကို ဆန့်ကျင်ပြီး၊ ထိုင်ဝမ်နှင့်မည်သည့်တရားဝင်ဆက်သွယ်မှုမျိုးကိုမျှ ပြုလုပ်မည်မဟုတ်ကြောင်းနှင့် ကုလသမဂ္ဂအထွေထွေညီလာခံဆုံးဖြတ်ချက်အမှတ် ၂၇၅၈ ၏ အာဏာ သက်ရောက်မှုသည် အငြင်းပွားဖွယ်ရာမရှိကြောင်း အလေးထားပြောကြားလျက် နိုင်ငံပြန်လည် ပေါင်းစည်းရေးအတွက် တရုတ်အစိုးရ၏ ကြိုးပမ်းဆောင်ရွက်ချက်အားလုံးကို ခိုင်မာစွာပံ့ပိုးကူညီသွား မည်ဖြစ်သည်။ မြန်မာနိုင်ငံသည် ဟောင်ကောင်၊ ရှင်ကျန်းနှင့် ရှီးကျန့်တို့နှင့်သက်ဆိုင်သည့်ကိစ္စရပ်များကို တရုတ်နိုင်ငံ၏ ပြည်တွင်းရေးအဖြစ်မှတ်ယူပြီး အဆိုပါကိစ္စရပ်များအပေါ် တရုတ်ဘက်၏ တရားမျှတသောရပ်တည်ချက်ကို ခိုင်မာစွာပံ့ပိုးကူညီသွားမည်ဖြစ်သည်။

 

မြန်မာနိုင်ငံအနေဖြင့် တရုတ်တစ်နိုင်ငံတည်းမူဝါဒအပေါ် ကာလရှည်ကြာစွာ တစ်စိုက်မတ်မတ်နှင့် မူဝါဒ ပိုင်းဆိုင်ရာ ကတိကဝတ်ပြုထားမှုအပေါ် တရုတ်နိုင်ငံဘက်မှ များစွာတန်ဖိုးထား အသိအမှတ်ပြုပါသည်။ တရုတ်နိုင်ငံ၏ အချုပ်အခြာအာဏာ၊ နယ်မြေတည်တံ့ခိုင်မြဲမှုနှင့် အမျိုးသားပြန်လည်ပေါင်းစည်းရေး ဆိုင်ရာကိစ္စရပ်များတွင် မြန်မာသိသည့် ထောက်ခံအားပေးမှုအပေါ် တရုတ်နိုင်ငံက ကျေးဇူးတင်ရှိ ကြောင်း ပြောကြားခဲ့သည်။

 

ထို့ပြင် မည်သည့်နိုင်ငံကမျှ ယင်းတို့၏နယ်မြေအား အခြားတစ်နိုင်ငံ၏ လုံခြုံရေးအကျိုးစီးပွားကို ထိခိုက် ပျက်စီးစေမည့် လုပ်ငန်းဆောင်ရွက်မှုများအတွက် အသုံးပြုခွင့်ပေးမည်မဟုတ်ကြောင်း နှစ်ဖက်လုံးက ထပ်လောင်းအတည်ပြုခဲ့ကြသည်။

 

၄။        မြန်မာနိုင်ငံဘက်မှ သမ္မတရှီကျင့်ဖျင်၏ လူသားမျိုးနွယ်စု တစ်ရပ်လုံးအတွက် အေးအတူပူအမျှ အသိုက်အဝန်း တည်ဆောက်ရေးအဆိုပြုချက်များအပြင် ကမ္ဘာလုံးဆိုင်ရာဖွံ့ဖြိုးတိုးတက်ရေးအစီအမံ၊ ကမ္ဘာလုံးဆိုင်ရာ လုံခြုံရေးအစီအမံ၊ ကမ္ဘာလုံးဆိုင်ရာလူသားယဉ်ကျေးမှုအစီအမံနှင့် ကမ္ဘာလုံးဆိုင်ရာ အုပ်ချုပ်မှုဆိုင်ရာ အစီအမံတို့အပေါ် အလေးအနက်တန်ဖိုးထားပါသည်။ မြန်မာနိုင်ငံအနေဖြင့် အဆိုပါမူဘောင်များသည် လူသားမျိုးနွယ်တစ်ရပ်လုံး၏ ဘုံအကျိုးစီးပွားကို ကာကွယ်စောင့်ရှောက်ပြီး ကမ္ဘာ့ငြိမ်းချမ်းရေးနှင့်တိုးတက်ဖြစ်ထွန်းမှုကို သိသာထင်ရှားစွာ အထောက်အကူပြုကြောင်း မှတ်တမ်းတင်အသိအမှတ်ပြုပါသည်။ နှစ်ဖက်လုံးက အထက်ဖော်ပြပါ အယူအဆများနှင့် အစီအမံများအကောင်အထည်ဖော်မှုကိုမြှင့်တင်ရန် ရည်မှန်းထားပြီး၊ ကဏ္ဍစုံတွင် ပူးပေါင်းဆောင်ရွက်မှုများ ဆောင်ရွက်သွားရန်နှင့် ကမ္ဘာ့ငြိမ်းချမ်းရေး၊ တည်ငြိမ်ရေး၊ ဖွံ့ဖြိုးတိုးတက်ရေးနှင့် သာယာဝပြောရေးတို့ကို မြှင့်တင်ရာတွင် တက်ကြွစွာပါဝင်ပံ့ပိုးသွားရန် သဘောတူညီခဲ့ကြသည်။

 

၅။        နှစ်ဖက်လုံးသည် နိုင်ငံရေးအရ ချစ်ကြည်ရင်းနှီးမှုနှင့် အပြန်အလှန်ယုံကြည်မှု၊ နှစ်ဖက်အပြန်  အလှန် အကျိုးဖြစ်ထွန်းစေမည့် ဖွံ့ဖြိုးတိုးတက်မှု၊ ဟန်ချက်ညီပြီး အပြန်အလှန်အားဖြည့်ပေးမည့် လုံခြုံရေးနှင့် အပြန်အလှန်ပေါင်းစည်းပေးမည့် ကူးလူးဆက်ဆံမှုများဖော်ဆောင်လျက်၊ အပြန်အလှန် အကျိုးစီးပွားဖြစ်ထွန်းစေမှု၊ တန်းတူရည်တူရှိရေးနှင့် နှစ်ဖက်အကျိုးဖြစ်ထွန်းစေသည့် ပူးပေါင်း ဆောင်ရွက်မှုဟူသော ရည်မှန်းချက်များအပေါ်အခြေခံ၍ “တရုတ်-မြန်မာ အေးအတူပူအမျှ အသိုက် အဝန်း” ကို အတူတကွပူးပေါင်းတည်ဆောက်သွားမည်ဖြစ်သည်။ နှစ်ဖက်လုံးက အဆင့်တိုင်းတွင် နီးကပ်သည့် ထိတွေ့ဆက်ဆံမှုများကို ဆက်လက်ထိန်းသိမ်းသွားရန်၊ အုပ်ချုပ်မှုဆိုင်ရာ အတွေ့အကြုံ ဖလှယ်မှုများကို တိုးမြှင့်သွားရန်နှင့် အစိုးရ၊ ဥပဒေပြုလွှတ်တော်နှင့် ဒေသန္တရအာဏာပိုင်အချင်းချင်း အကြား ထိတွေ့ဆက်ဆံမှုနှင့် ပူးပေါင်းဆောင်ရွက်မှုများကိုမြှင့်တင်သွားရန် သဘောတူညီခဲ့ကြသည်။

နှစ်ဖက်လုံးက ရပ်ဝန်းနှင့် ပိုးလမ်းမပူးပေါင်းဆောင်ရွက်ရေးအစီအစဉ်ကို အချိန်မီပြီးပြတ်စေရေး ဆောင်ရွက်ရန်နှင့် လက်မှတ်ရေးထိုးရန်အလေးထားကြပြီး အဆင့်သင့်ရှိကြောင်း ဖော်ပြခဲ့သည်။ နှစ်ဖက်လုံးသည် တရုတ်-မြန်မာ စီးပွားရေးစင်္ကြံအကောင်အထည်ဖော်မှုကိုမြှင့်တင်ရန်နှင့် ကျောက်ဖြူ ရေနက်ဆိပ်ကမ်းနှင့် မန္တလေး-မူဆယ်ရထားလမ်းကဲ့သို့သော အဓိကစင်္ကြံစီမံကိန်းများဆိုင်ရာ ပူးပေါင်း ဆောင်ရွက်မှုကို အရှိန်အဟုန်မပျက် ပုံမှန်တိုးမြှင့်ဆောင်ရွက်သွားရန် သဘောတူညီခဲ့ကြသည်။ ဤစီမံကိန်းများကို အပြန်အလှန်လေးစားမှု၊ အပြန်အလှန်အကျိုးဖြစ်ထွန်းမှု၊ စီးပွားရေးအရဖြစ်မြောက် နိုင်စွမ်းရှိမှု၊ ဘဏ္ဍာရေးဆိုင်ရာ ရေရှည်တည်တံ့နိုင်မှု စသည့် အခြေခံမူများဖြင့် လမ်းညွှန်ဆောင်ရွက်သွား မည်ဖြစ်ပြီး၊ နှစ်နိုင်ငံလုံး၏ ဥပဒေများ၊ လုပ်ထုံးလုပ်နည်းများနှင့် နိုင်ငံ၏ အခြေအနေရပ်များနှင့် အပြည့်အဝ ကိုက်ညီမှုရှိစေမည်ဖြစ်သည်။ ထို့ပြင် နှစ်ဖက်လုံးသည် တရုတ်-မြန်မာ ရေနံနှင့်သဘာဝ ဓာတ်ငွေ့ပိုက်လိုင်းများကို အကျိုးရှိစွာအသုံးပြုကာ၊ လျှပ်စစ်ဓာတ်အားလိုင်း အပြန်အလှန်ချိတ်ဆက်မှုကို အရှိန်အဟုန်မပျက် ပုံမှန်တိုးမြှင့် ဆောင်ရွက်သွားမည်ဖြစ်ပြီး၊ စီးပွားရေးနှင့်ပတ်ဝန်းကျင်ဆိုင်ရာ ရေရှည်တည်တံ့နိုင်စွမ်းသော စွမ်းအင်မိတ်ဖက်ဆက်ဆံရေးကို ရှာဖွေဖော်ထုတ်သွားမည်ဖြစ်သည်။ တရုတ်နိုင်ငံဘက်မှ စဉ်ဆက်မပြတ်ဖွံ့ဖြိုးတိုးတက်ရေး အထောက်အပံ့များ ဆက်လက် ပေးအပ်သွားရန် ဆန္ဒရှိကြောင်း ထပ်လောင်းပြောကြားခဲ့ပြီး၊ ယင်းအပေါ် မြန်မာနိုင်ငံဘက်မှ ကျေးဇူးတင်ရှိကြောင်း ပြောကြားခဲ့သည်။

 

နှစ်ဖက်လုံးက စီးပွားရေးအရ လက်တွေ့ကျသည့် အပြန်အလှန်ဖြည့်ဆည်းပေးနိုင်မှုများကို အမြင့်ဆုံး မြှင့်တင်ရန် သတ္တုတွင်း၊ ဒစ်ဂျစ်တယ်စီးပွားရေးနှင့် ဉာဏ်ရည်တုကဲ့သို့သောကဏ္ဍများတွင် လက်တွေ့ ကျသော ပူးပေါင်းဆောင်ရွက်မှုများကို ဆက်လက်လေးနက်စွာ ဆောင်ရွက်သွားရန်လည်း သဘောတူညီ ခဲ့ကြသည်။

 

နှစ်ဖက်လုံးက နှစ်ဖက်ဒေသခံပြည်သူများ၏ လူမှုစီးပွားဘဝများကို အထောက်အကူပြုစေရန် စိုက်ပျိုးရေး၊ သစ်တောရေးရာနှင့် မွေးမြူရေးကဏ္ဍများတွင် ပူးပေါင်းဆောင်ရွက်မှု တိုးမြှင့်ရန်၊ အရည်အသွေးမြင့် ထုတ်ကုန်များအတွက် ကန့်သတ်စောင့်ကြည့်စစ်ဆေးမှုဆိုင်ရာ ဝင်ရောက်ခွင့်များကို လွယ်ကူချောမွေ့စေရန်နှင့် နှစ်နိုင်ငံအကြား ခေတ်မီအကောက်ခွန်စီမံခန့်ခွဲမှုဆိုင်ရာများကို ရှာဖွေ ဖော်ထုတ်သွားရန် သဘောတူညီခဲ့ကြသည်။

 

နှစ်ဖက်လုံးသည် နှစ်နိုင်ငံအကြား အပြန်အလှန် နားလည်သဘောပေါက်မှု မြှင့်တင်ရန်နှင့် နှစ်ဖက်ရှိ ဒေသခံပြည်သူများ၏ လူမှုစီးပွားဘဝများကို အထောက်အကူပြုစေရန်အတွက် ပညာရေး၊ ယဉ်ကျေးမှုဆိုင်ရာခရီးသွားလာရေး၊ ကျန်းမာရေး၊ လူငယ်ရေးရာ၊ မီဒီယာနှင့် လူသားအရင်းအမြစ် လေ့ကျင့်ပျိုးထောင်ရေးကဏ္ဍတို့တွင် ပူးပေါင်းဆောင်ရွက်မှုများ တိုးမြှင့်လုပ်ဆောင်သွားရန် သဘောတူညီခဲ့ကြသည်။

 

ထို့ပြင် နှစ်ဖက်လုံးက နှစ်နိုင်ငံကုန်သွယ်မှု ပုံမှန်တိုးတက်လာမှုကို မှတ်တမ်းတင်ခဲ့ကြပြီး၊ ကုန်သွယ်မှုကဏ္ဍ ပိုမိုကျယ်ပြန့်လာစေရန်နှင့် ကဏ္ဍစုံအသွင် ပြောင်းလဲလာစေရန်အတွက် ကြီးမားသော အလားအလာများရှိကြောင်း အသိအမှတ်ပြုခဲ့ကြသည်။ နှစ်ဖက်လုံးက တရုတ်ယွမ်-မြန်မာကျပ် တိုက်ရိုက်ပေးချေမှုစနစ်ကို လက်တွေ့ အကောင်အထည်ဖော်ခြင်းဖြင့် ကုန်သွယ်မှုကို ပိုမိုလွယ်ကူ ချောမွေ့အောင်ဆောင်ရွက်သွားရန် သဘောတူညီခဲ့ကြသည်။ ထို့အတူ စိုက်ပျိုးရေးအခြေခံထုတ်ကုန် ထုတ်လုပ်ခြင်း၊ ရေနံနှင့်စွမ်းအင်ကဏ္ဍကဲ့သို့သော နှစ်ဖက်အကျိုးတူ ပူးပေါင်းဆောင်ရွက်နိုင်မည့် ကဏ္ဍများတွင် ပိုမိုနီးကပ်သည့် ကုန်သွယ်မှုနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေးအတွက် ပံ့ပိုးကူညီ သွားကြရန် ဆန္ဒပြုခဲ့ကြသည်။

 

နှစ်ဖက်လုံးသည် မြန်မာနိုင်ငံရှိ “တရုတ်နိုင်ငံရပ်ခြားစစ်ဆင်ရေးတပ်”(Chinese Expeditionary Force) အထိမ်းအမှတ် အဆောက်အအုံများ စနစ်တကျပြန်လည်တည်ဆောက်ရေးနှင့် စီမံခန့်ခွဲရေးတို့ကို သေချာစေရန် အတူတကွ ပူးပေါင်းဆောင်ရွက်သွားမည်ဖြစ်သည်။

 

တရုတ်နိုင်ငံဘက်မှ မြန်မာနိုင်ငံ၏ ငလျင်ဘေးအလွန် ပြန်လည်ထူထောင်ရေးလုပ်ငန်းများကို တက်ကြွစွာ ကူညီပံ့ပိုးပေးမည်ဖြစ်သည်။ ယခင်က ပံ့ပိုးကူညီခဲ့သည့် အရေးပေါ်လူသားချင်း စာနာထောက်ထားမှု ဆိုင်ရာ သဘာဝဘေးအန္တရာယ် ကူညီကယ်ဆယ်ရေးပံ့ပိုးမှုများအပြင် တတ်နိုင်သမျှကို ဆက်လက်ပံ့ပိုး ကူညီရန် ဆန္ဒရှိသည်။ နှစ်ဖက်လုံးသည် ရန်ကုန်မြို့ရှိ အောင်ဆန်းအားကစားကွင်းကဲ့သို့သော အထင်ကရအထိမ်းအမှတ်စီမံကိန်းများ ပြန်လည်မွမ်းမံတည်ဆောက်ရေးကို ပူးတွဲမြှင့်တင်သွားမည် ဖြစ်ပြီး၊ သဘာဝဘေးအန္တရာယ် ကာကွယ်ရေးနှင့် လျော့ပါးစေရေး၊ ဆေးဝါးနှင့်ကျန်းမာရေး ဝန်ဆောင်မှုများ၊ ပြည်သူလူထုဗဟိုပြု လူ့စွမ်းအား အရင်းအမြစ်ဖွံ့ဖြိုး တိုးတက်ရေးကဏ္ဍတို့တွင် ဖွံ့ဖြိုးတိုးတက်မှုဆိုင်ရာ ပူးပေါင်းဆောင်ရွက်မှုများကို တိုးမြှင့်သွားကာ၊ ပြည်သူများ၏ လူမှုစီးပွားဘဝကို အကျိုးပြုမည့် “သေးငယ်သော်လည်း ထိရောက် ကောင်းမွန်သော” (Small but Beautiful) အကူအညီ ပေးရေးစီမံကိန်းများကို ပိုမိုရှာဖွေ ဖော်ထုတ်သွားမည်ဖြစ်သည်။

 

မြန်မာနိုင်ငံဘက်မှ ငလျင်အပြီး ပြန်လည်ထူထောင်ရေးနှင့် ပြန်လည်တည်ဆောက်ရေး လုပ်ငန်းစဉ် များအတွက် တရုတ်နိုင်ငံ၏ ဆက်လက်ပံ့ပိုးကူညီမှုများနှင့် လူမှုစီးပွားဘဝ ဖွံ့ဖြိုးတိုးတက်မှုအတွက် ပါဝင်ပံ့ပိုးမှုများအပေါ် လှိုက်လှဲစွာကျေးဇူးတင်ရှိကြောင်း ပြောကြားခဲ့သည်။ ထို့ပြင် မြန်မာနိုင်ငံဘက်မှ နှစ်ဖက်သဘောတူညီထားသည့် ဖွံ့ဖြိုးတိုးတက်ရေး ပူးပေါင်းဆောင်ရွက်မှုစီမံကိန်းများမှတစ်ဆင့် တရုတ်နိုင်ငံ၏ ဆက်လက်ပံ့ပိုးကူညီမှုများကို ကြိုဆိုခဲ့သည်။ နှစ်ဖက်လုံးသည် စွမ်းအင်နှင့် လျှပ်စစ် ကဏ္ဍတို့တွင် ပူးပေါင်းဆောင်ရွက်မှုများ ပိုမိုခိုင်မာလေးနက်မှုရှိစေရန်နှင့် ရေရှည်တည်တံ့သောဖွံ့ဖြိုး တိုးတက်မှုကို မြှင့်တင်ရန်၊ ဒေသခံပြည်သူများ၏ လူမှုစီးပွားဘဝများကို မြှင့်တင်ရန်နှင့် နှစ်နိုင်ငံလုံး၏ ဘုံသာယာပြောရေးကို အထောက်အကူပြုစေရန် ရည်ရွယ်လျက်၊ မြန်မာနိုင်ငံ၏ ဖွံ့ဖြိုးတိုးတက်မှု ဦးစားပေးကဏ္ဍများနှင့်အညီ နှစ်ဖက်သဘောတူထားသည့် အခြေခံအဆောက်အအုံ၊ ပြည်သူ့ ဝန်ဆောင်မှုနှင့် စွမ်းဆောင်ရည်မြှင့်တင်ရေးစီမံကိန်းများကို အချိန်နှင့်တစ်ပြေးညီ အရှိန်အဟုန်မြှင့် အကောင်အထည်ဖော်ဆောင်ရွက်သွားရန် သဘောတူညီခဲ့ကြသည်။

 

နှစ်ဖက်လုံးသည် ကမ္ဘာလုံးဆိုင်ရာ လုံခြုံရေးအစီအမံကို အကောင်အထည်ဖော်ရန် နည်းလမ်းနှင့် နည်းစနစ်များကို ပူးတွဲလေ့လာရှာဖွေသွားမည်ဖြစ်ပြီး၊ ဘုံဖြစ်သော၊ ဘက်စုံလွှမ်းခြုံသော၊ ပူးပေါင်း ဆောင်ရွက်တတ်သော၊ ရေရှည်တည်တံ့သောလုံခြုံရေးအမြင်ကို ဆက်လက်စောင့်ထိန်းရန်၊ တရုတ်-မြန်မာလုံခြုံရေးဆိုင်ရာ မိတ်ဖက်ဆက်ဆံရေးထူထောင်နိုင်ရေးအတွက် ကြိုးပမ်းဆောင်ရွက်ရန်၊ ဆွေးနွေးပွဲများနှင့် လက်တွေ့ကျသော ပူးပေါင်းဆောင်ရွက်မှုများကို တိုးမြှင့်ရန်နှင့် ကမ္ဘာလုံးဆိုင်ရာ လုံခြုံရေးစီမံအုပ်ချုပ်မှုကို မြှင့်တင်ရန်အတွက် ပူးပေါင်းဆောင်ရွက်ရန်နည်းလမ်းများ ရှာဖွေသွားရန် သဘောတူညီခဲ့ကြသည်။ နှစ်ဖက်လုံးသည် တယ်လီဖုန်းနှင့် သတင်းအချက်အလက်နည်းပညာသုံး လိမ်လည်မှုတိုက်ဖျက်ရေး၊ အပြည်ပြည်ဆိုင်ရာ မဟာမိတ်အဖွဲ့ ဖွဲ့စည်းခြင်းကို ထောက်ခံကြသည်။ နှစ်ဖက်လုံးသည် အွန်လိုင်းလောင်းကစားမှု၊ တယ်လီဖုန်းနှင့် သတင်းအချက်အလက်နည်းပညာသုံး လိမ်လည်မှု၊ နယ်စပ်ဖြတ်ကျော်လောင်းကစားမှု၊ လူကုန်ကူးမှု၊ တရားမဝင်နယ်စပ်ဖြတ်ကျော်မှု၊ မူးယစ်ဆေးဝါး ထုတ်လုပ်မှုနှင့် အတုအပပြုလုပ်မှု၊ မှောင်ခိုကုန်သွယ်မှုနှင့် ငွေကြေးဆိုင်ရာ လိမ်လည်မှု များကဲ့သို့သော နယ်စပ်ဖြတ်ကျော်ပြစ်မှုဆိုင်ရာလှုပ်ရှားမှုများကို နှိမ်နင်းရန်အတွက် နှစ်နိုင်ငံနှင့် ဘက်စုံဥပဒေစိုးမိုးရေး ပူးပေါင်းဆောင်ရွက်မှုများကို တိုးမြှင့်လုပ်ဆောင်သွားမည်ဖြစ်သည်။ နှစ်ဖက်လုံးသည် မိမိတို့နိုင်ငံအသီးသီးအတွင်းရှိ တစ်ဖက်နိုင်ငံ၏ နိုင်ငံသားများနှင့်အဖွဲ့အစည်းများ၏ ဘေးကင်းလုံခြုံရေးအတွက် ကာကွယ်စောင့်ရှောက်မှုများကို တိုးမြှင့်သွားမည်ဖြစ်ပြီး၊ "ရပ်ဝန်းနှင့် ပိုးလမ်းမ" တည်ဆောက်မှုအတွက် လုံခြုံရေးပူးပေါင်း ဆောင်ရွက်မှုများကို မြှင့်တင်သွားမည်ဖြစ်သည်။ မြန်မာနိုင်ငံဘက်မှ နိုင်ငံအတွင်းရှိ တရုတ်စီမံကိန်းများ၏လုံခြုံရေးကို ကာကွယ်စောင့်ရှောက် မည်ဖြစ်ကြောင်း ထပ်လောင်းအတည်ပြုခဲ့သည်။

 

တရုတ်နိုင်ငံဘက်မှ မြန်မာနိုင်ငံအနေဖြင့် နိုင်ငံရေးအရ ဆွေးနွေးညှိနှိုင်းမှုများမှတစ်ဆင့် ပြည်တွင်း ငြိမ်းချမ်းရေးနှင့် အမျိုးသားပြန်လည်သင့်မြတ်ရေးလုပ်ငန်းစဉ်များကို ရှေ့ဆက်ဖော်ဆောင်နေခြင်းအပေါ် ပံ့ပိုးကူညီပေးသွားမည်ဖြစ်သည်။ မြန်မာနိုင်ငံဘက်ကလည်း ဤကိစ္စရပ်တွင် အထူးသဖြင့် မြန်မာနိုင်ငံ မြောက်ပိုင်း ငြိမ်းချမ်းရေးဆွေးနွေးပွဲများ ဖြစ်မြောက်စေရေးအတွက် တရုတ်နိုင်ငံ၏ အပြုသဘောဆောင် သည့် တက်ကြွသောအခန်းကဏ္ဍမှ ပါဝင်မှုအပေါ် ကျေးဇူးတင်ရှိကြောင်း ဖော်ပြခဲ့သည်။ နှစ်ဖက်လုံးက နှစ်နိုင်ငံနယ်စပ်ဒေသများတွင် ငြိမ်းချမ်းရေး၊ တည်ငြိမ်ရေးနှင့် ဘုံဖွံ့ဖြိုးတိုးတက်မှုတို့ကို ထိန်းသိမ်းရန် အတွက် ဆက်သွယ်ညှိနှိုင်းမှုများနှင့်ပေါင်းစပ်ညှိနှိုင်းမှုများကို တိုးမြှင့်လုပ်ဆောင်သွားရန် သဘောတူညီ ခဲ့ကြသည်။

 

၆။ နှစ်ဖက်လုံးသည် ကုလသမဂ္ဂကိုဗဟိုပြုသော နိုင်ငံတကာစနစ်၊ နိုင်ငံတကာဥပဒေကို အခြေခံသော နိုင်ငံတကာလုပ်ထုံးလုပ်နည်းနှင့် ကုလသမဂ္ဂပဋိညာဉ်စာတမ်းပါ ရည်ရွယ်ချက်များနှင့် အခြေခံမူများ အပေါ်အခြေခံသော နိုင်ငံတကာဆက်ဆံရေးဆိုင်ရာ အခြေခံစံနှုန်းများကို ခိုင်မာစွာစောင့်ထိန်းရန် သဘောတူညီခဲ့ကြသည်။ နှစ်ဖက်လုံးသည် အားလုံးပါဝင်နိုင်ပြီး မျှတ၍စနစ်ကျသော ကမ္ဘာ့အင်အားစု အများအပြားရှိသည့် (Multipolar) ကမ္ဘာကြီးဖြစ်ထွန်းလာစေရန်နှင့် အားလုံးအတွက် အကျိုးဖြစ်ထွန်း စေမည့် အားလုံးပါဝင်နိုင်သော စီးပွားရေး ကမ္ဘာလုံးဆိုင်ရာ ဖြစ်တည်မှုကိုမြှင့်တင်ရန် သဘောတူထား သည်။ နှစ်ဖက်လုံးသည် တစ်ဦးတည်း မူဝါဒကျင့်သုံးခြင်း၊ (Unilateralism)၊ မိမိစီးပွားရေးကိုသာ ကာကွယ်သောဝါဒ (Protectionism) ပုံစံအားလုံးကို ဆန့်ကျင်ကြပြီး၊ သီးသန့် "အစုအဖွဲ့ငယ်များ" (Small circles) ဖွဲ့စည်းခြင်း၊ အုပ်စုဖွဲ့ ထိပ်တိုက်ရင်ဆိုင်မှုများကို လှုံ့ဆော်ခြင်း၊ ဒေသတွင်း ငြိမ်းချမ်းရေးနှင့် တည်ငြိမ်ရေးကိုထိခိုက်စေသည့် စစ်ဝါဒအပေါ် ထောက်ခံအားပေးခြင်း (back of militarism)နှင့် အခြားသော ဒေသတွင်းငြိမ်းချမ်းရေးနှင့် တည်ငြိမ်ရေးကိုအန္တရာယ်ဖြစ်စေသည့် လုပ်ရပ်များကိုပယ်ချကာ၊ ဒုတိယကမ္ဘာစစ်၏ အောင်ပွဲနှင့် စစ်ပြီးခေတ်နိုင်ငံတကာ လုပ်ထုံးလုပ်နည်း များကို ခိုင်မာစွာ ကာကွယ်စောင့်ရှောက်သွားမည်ဖြစ်သည်။ နှစ်ဖက်လုံးသည် ဒေသတွင်းငြိမ်းချမ်းရေး၊ တည်ငြိမ်ရေးနှင့် သာယာပြောရေးတို့ကို ထိန်းသိမ်းမြှင့်တင်ရန် အရေးပါကြောင်းအလေးထား ပြောကြားခဲ့ကြပြီး၊ ဒေသတွင်းနှင့်ကမ္ဘာလုံးဆိုင်ရာစိန်ခေါ်မှုများကို ဖြေရှင်းရာတွင် ဆွေးနွေးမှု၊ အပြန်အလှန်လေးစားမှုနှင့် ပူးပေါင်းဆောင်ရွက်မှုတို့ကိုအခြေခံ၍ ချဉ်းကပ်ဆောင်ရွက်သင့်ကြောင်းနှင့် နိုင်ငံများအကြားတင်းမာမှုများကို ပိုမိုပြင်းထန်ထန်စေသည့် မည်သည့်လုပ်ရပ်မျိုးကိုမဆိုရှောင်ရှားရန် လိုအပ်ကြောင်းကိုလည်း အလေးအနက်ထား ပြောကြားခဲ့ကြသည်။

 

တရုတ်နိုင်ငံဘက်မှ မြန်မာနိုင်ငံအနေဖြင့် “ကမ္ဘာလုံးဆိုင်ရာ ဖွံ့ဖြိုးတိုးတက်ရေးအစီအမံ မိတ်ဆွေများ အဖွဲ့၊” (Group of Friends of the Global Development Initiative)သို့ ပါဝင်ခဲ့ခြင်းအပေါ် အသိအမှတ်ပြုပါသည်။ နှစ်ဖက်လုံးသည် ကုလသမဂ္ဂ၏ ၂၀၃၀ ပြည့်နှစ် ရေရှည်တည်တံ့သော ဖွံ့ဖြိုးတိုးတက်ရေးအစီအစဉ် အကောင်အထည်ဖော်မှုကို အရှိန်အဟုန်မြှင့်တင်ရန်အတွက် ကမ္ဘာလုံး ဆိုင်ရာ ဖွံ့ဖြိုးတိုးတက်ရေးအစီအမံအောက်တွင် ပူးပေါင်းဆောင်ရွက်မှုများ ပိုမိုနက်ရှိုင်းစေရန်အဆင့်ရှိကြ သည်။ တရုတ်နိုင်ငံက မြန်မာနိုင်ငံအနေဖြင့် “ကမ္ဘာလုံးဆိုင်ရာအုပ်ချုပ်မှု အစီအမံမိတ်ဆွေများအဖွဲ့” (Group of Friends of Global Governance)နှင့် “နိုင်ငံတကာစေ့စပ်ညှိနှိုင်းရေးအဖွဲ့”(International Organization for Mediation) သို့ ပါဝင်ခဲ့ခြင်းအပေါ် ကျေးဇူးတင်ရှိကြောင်း ဖော်ပြခဲ့သည်။

 

နှစ်ဖက်လုံးသည် စစ်မှန်သောနိုင်ငံစုံဝါဒကိုကျင့်သုံးရန်၊ နိုင်ငံတကာဆက်ဆံရေးကို ဒီမိုကရေစီစနစ်သို့ ရှေးရှုရန်နှင့် ပိုမိုမျှတပြီးကျိုးကြောင်းဆီလျော်သော ကမ္ဘာလုံးဆိုင်ရာစီမံအုပ်ချုပ်မှုစနစ် ဖြစ်ထွန်းလာ စေရန်အတွက် ကမ္ဘာလုံးဆိုင်ရာတရားမျှတမှုကို ပူးတွဲကာကွယ်စောင့်ရှောက်ရန် တောင်းဆိုကြသည်။

 

မြန်မာနိုင်ငံဘက်က ဉာဏ်ရည်တုဖွံ့ဖြိုးတိုးတက်မှုသည် အများပြည်သူ၏ ဘုံအကျိုးစီးပွားကို အထောက် အကူပြုစေရန်အတွက် “ကမ္ဘာလုံးဆိုင်ရာ ဉာဏ်ရည်တုဆိုင်ရာ ပူးပေါင်းဆောင်ရွက်ရေး အဖွဲ့”(World Artificial Intelligence Cooperation Organization) ဖွဲ့စည်းတည်ထောင်ရန် တရုတ်နိုင်ငံ၏ အဆိုပြုချက်အပေါ် ကြိုဆိုခဲ့သည်။ တရုတ်နိုင်ငံဘက်မှ မြန်မာနိုင်ငံအနေဖြင့် ကမ္ဘာလုံးဆိုင်ရာ ဉာဏ်ရည်တုအုပ်ချုပ်မှုနှင့် နိုင်ငံတကာ ပူးပေါင်းဆောင်ရွက်မှုများကို အတူတကွမြှင့်တင်ရန်အတွက် အဆိုပါအဖွဲ့သို့ဝင်ရောက်ရန် အပြုသဘောဖြင့် ထည့်သွင်းစဉ်းစားနေခြင်းကို ကြိုဆိုပါသည်။

 

နှစ်ဖက်လုံးသည် တန်းတူရည်တူရှိမှုနှင့် အပြန်အလှန်လေးစားမှုတို့အပေါ်အခြေခံ၍ လူ့အခွင့် အရေးဆိုင်ရာ ကိစ္စရပ်များတွင် အမြင်ချင်းဖလှယ်မှုများနှင့် ပူးပေါင်းဆောင်ရွက်မှုများ ပြုလုပ်ရန်လိုလား ကြပြီး၊ လူ့အခွင့်အရေးကိစ္စရပ်များကို နိုင်ငံရေးအမြတ်ထုတ်ခြင်း၊ လက်နက်သဖွယ်အသုံးပြုခြင်းနှင့် စံနှုန်းနှစ်မျိုးကျင့်သုံးခြင်းတို့ကို ပြတ်သားစွာဆန့်ကျင်သည့်အပြင်၊ လူ့အခွင့်အရေးကိုအကြောင်းပြ၍ အချုပ်အခြာအာဏာပိုင်နိုင်ငံများ၏ ပြည်တွင်းရေးကို ဝင်ရောက်စွက်ဖက်ခြင်းအား ပြတ်သားစွာ ဆန့်ကျင်ကြသည်။

 

၇။        နှစ်ဖက်လုံးသည် တရုတ်-အာဆီယံ ပူးပေါင်းဆောင်ရွက်မှုကို ပိုမိုခိုင်မာစေရန်၊ ငြိမ်းချမ်းသာယာ၍ စိတ်ချလုံခြုံမှုရှိပြီး သာယာဝပြောသည့် လှပနှစ်လိုဖွယ်ရာအိမ်ဂေဟာကို အတူတည်ဆောက်ရေး၊ ဒေသတွင်း စီးပွားရေးပေါင်းစည်းမှုကို ပိုမိုမြင့်မားသောအဆင့်သို့ မြှင့်တင်ရေး၊ သာတူညီမျှမှုနှင့် ဘုံအကျိုး စီးပွားရှိသော ပူးပေါင်းဆောင်ရွက်မှုများကိုအခြေခံ၍ ပိုမိုနီးကပ်သည့် တရုတ်-အာဆီယံ အေးအတူပူအမျှ အသိုက်အဝန်းတည်ထောင်ရေးတို့ကို ကြိုးပမ်းဆောင်ရွက်သွားရန် သဘောတူညီခဲ့ကြသည်။ နှစ်နိုင်ငံ လုံးသည် ဒေသတွင်းငြိမ်းချမ်းရေး၊ တည်ငြိမ်ရေး၊ သာယာဝပြောရေးနှင့် ရေရှည်တည်တံ့သော ဖွံ့ဖြိုးတိုးတက်မှုကို မြှင့်တင်ရေး၊ ဒေသတွင်းစီးပွားရေး ပေါင်းစည်းမှုကို ရှေ့ဆက်ဖော်ဆောင်ရေး၊ ဖွံ့ဖြိုးတိုးတက်မှု ကွာဟချက်များကို ကျဉ်းမြောင်းစေရေးနှင့် ပွင့်လင်းပြီးအားလုံးပါဝင်နိုင် သည့်ဒေသတစ်ခု ဖြစ်ပေါ်လာစေရေးပါဝင်ပံ့ပိုးရန် ကတိကဝတ်ကို ထပ်လောင်းအတည်ပြုခဲ့ကြသည်။

 

နှစ်ဖက်လုံးသည် လန်ချန်း-မဲခေါင်ပူးပေါင်းဆောင်ရွက်မှုကိုတိုးမြှင့်ရန်၊ (၅)ကြိမ်မြောက် လန်ချန်း - မဲခေါင် ပူးပေါင်းဆောင်ရွက်မှု ခေါင်းဆောင်များအစည်းအဝေး အောင်မြင်စွာကျင်းပနိုင်ရေးကို ပံ့ပိုးကူညီရန်၊ အဆင့်မြှင့်တင်ထားသော လန်ချန်း-မဲခေါင် ပူးပေါင်းဆောင်ရွက်မှု “၂.၀” (LMC 2.0)မူဘောင်ကို လက်တွဲတည်ဆောက်ရန်နှင့် လန်ချန်း-မဲခေါင်နိုင်ငံများအကြား ငြိမ်းချမ်း၊သာယာဝ ပြောသော အေးအတူပူအမျှအသိုက်အဝန်းတည်ဆောက်မှုကိုမြှင့်တင်ရန် သဘောတူညီ ခဲ့ကြသည်။

 

နှစ်ဖက်လုံးသည် ကုလသမဂ္ဂ၊ ရှန်ဟိုင်းပူးပေါင်းဆောင်ရွက်ရေးအဖွဲ့(SCO)၊ အာဆီယံ၊ ဘင်းမ်စတက် (BIMSTEC)နှင့် အက်ခမက်စ်(ACMECS) အပါအဝင် နိုင်ငံစုံမူဘောင်များတွင် အပြန်အလှန်ပံ့ပိုးကူညီမှုနှင့် ပူးပေါင်းဆောင်ရွက်မှုများကိုတိုးမြှင့်သွားရန် သဘောတူညီခဲ့ကြသည်။ မြန်မာနိုင်ငံ၏ တရားဝင် ရပိုင်ခွင့်များနှင့် အကျိုးစီးပွားများကို ကာကွယ်စောင့်ရှောက်ရန်အတွက် မြန်မာနိုင်ငံအနေဖြင့် အာဆီယံ ယန္တရားများနှင့် လုပ်ငန်းစဉ်အားလုံးတွင်လည်းကောင်း၊ ကုလသမဂ္ဂတွင်လည်းကောင်း၊ အပြည့်အဝ၊ တန်းတူရည်တူ ပါဝင်ဆောင်ရွက်နိုင်မှုကို တရုတ်နိုင်ငံက ထောက်ခံအားပေးသည်။

 

၈။        နှစ်ဖက်လုံးသည် ပို့ဆောင်ဆက်သွယ်ရေး၊ သိပ္ပံနှင့်နည်းပညာ၊ ဉာဏပစ္စည်းမူပိုင်ခွင့်၊ လူ့စွမ်းအား အရင်းအမြစ် ဖွံ့ဖြိုးတိုးတက်ရေး၊ ပြည်သူ့ကျန်းမာရေးနှင့် မီဒီယာအစရှိသည့်ကဏ္ဍများတွင် ပူးပေါင်း ဆောင်ရွက်ရေးဆိုင်ရာ စာရွက်စာတမ်းများစွာကို လက်မှတ်ရေးထိုးခဲ့ကြသည်။

 

၉။ နိုင်ငံတော်သမ္မတ ဦးမင်းအောင်လှိုင်သည် ကိုယ်စားလှယ်အဖွဲ့အား နွေးထွေးစွာကြိုဆိုဂုဏ်ပြုခဲ့သည့် သမ္မတ ရှီကျင့်ဖျင်၊ တရုတ်အစိုးရနှင့် တရုတ်ပြည်သူများအား လှိုက်လှဲစွာကျေးဇူးတင်ရှိကြောင်း ပြောကြားခဲ့ပြီး၊ သမ္မတရှီကျင့်ဖျင်အား နှစ်ဦးနှစ်ဖက်အဆင်ပြေမည့်ကာလတွင် မြန်မာနိုင်ငံသို့ လာရောက်လည်ပတ်ပါရန် ရင်းနှီးလှိုက်လှဲစွာဖြင့် ဖိတ်ကြားခဲ့သည်။