တညင်းကုန်း မီးရထားလမ်းခုံးကျော်တံတားကို PC Girder ၊ Steel Box Girder များဖြင့် လေးလမ်းသွားအဖြစ် တည်ဆောက်မည်

 

နေပြည်တော် ဩဂုတ် ၂၀

 

တညင်းကုန်း မီးရထားလမ်း ခုံးကျော်တံတားကို PC Girder ၊ Steel Box Girder များဖြင့် လေးလမ်းသွားအဖြစ် တည်ဆောက်သွားမည်ဖြစ်ကြောင်း ဆောက်လုပ်ရေးဝန်ကြီးဌာနမှ သိရသည်။

 

တညင်းကုန်း မီးရထားလမ်း ခုံးကျော်တံတားကို ရန်ကုန်တိုင်းဒေသကြီး အင်းစိန်မြို့နယ် ရန်ကုန် - ပြည်မီးရထားလမ်းနှင့် ခရေပင်ကားလမ်းတို့ ဆုံရာတွင် တည်ဆောက်သွားမည်ဖြစ်ပြီး အဆိုပါ လမ်းပေါ်တွင် Express ယာဉ်၊ ကုန်တင်ယာဉ်၊ ခြောက်ဘီးအထက်ယာဉ်များနှင့် အိမ်စီးကား ၃၀၀၀ ကျော်ခန့်နှင့် ရန်ကုန်-ပြည် မီးရထားလမ်းတွင်လည်း မြို့ပတ်ရထားများအပါအဝင် အစုန်/အဆန် ရထား ၂၃ စင်း နေ့စဉ် ဖြတ်သန်းသွားလာလျက်ရှိသည့်အတွက် တံတားတည်ဆောက် ပြီးစီးပါက ယာဉ်ကြောပိတ်ဆို့မှုများကို များစွာဖြေရှင်းပေးနိုင်မည်ဖြစ်သည်။

 

အဆိုပါ တံတားတည်ဆောက်မည့် အခြေအနေကို ယနေ့နံနက်ပိုင်းက ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်သည် တာဝန်ရှိသူများနှင့်အတူ သွားရောက်ကြည့်ရှုစစ်ဆေးသည်။

 

ကြည့်ရှုစဉ် တံတားတည်ဆောက်မည့် စီမံကိန်းကာလတွင် လျှပ်စစ်/ဆက်သွယ်ရေးတိုင် ရွှေ့ပြောင်းရမည့် ကိစ္စရပ်များ၊ တညင်းကုန်းဈေး အဝင်လမ်း လမ်းလွှဲရန် ဆောင်ရွက်ရမည့် ကိစ္စရပ်များ စသည်တို့ကို သက်ဆိုင်ရာဌာနများနှင့် ပူးပေါင်း ညှိနှိုင်းဆောင်ရွက်သွားရန်၊ တံတားတည်ဆောက်ဆဲ ကာလတွင် ယာဉ်သွားလာမှု လမ်းကြောင်းများ၌ ယာဉ်ကြောပိတ်ဆို့မှုများ မဖြစ်ပေါ်စေရေး ကြိုတင်စီစဉ်ဆောင်ရွက်ထားရှိရန် မှာကြားသည်။

 

ထို့ပြင် ဟင်္သာတ - ဒူးယား - ဒေါင့်ကြီး - ဇလွန်လမ်းပိုင်းနှင့် ကြိမ်ပင်ဆယ် - စက္ကော့ - ဓနုဖြူ - ဇလွန် လမ်းပိုင်းတစ်လျှောက် လမ်းပြုပြင် ဆောင်ရွက်နေမှု၊ Oriental Highway ကုမ္ပဏီ လီမိတက်က B.O.T စနစ်ဖြင့် ဆောင်ရွက်လျက်ရှိသည့် ရန်ကုန်- ပုသိမ်လမ်း ပြုပြင်ထိန်းသိမ်းခြင်း လုပ်ငန်း ဆောင်ရွက်နေမှုတို့ကို ကြည့်ရှုစစ်ဆေးခဲ့ကြောင်း သိရသည်။

သတင်းစဉ်