ကလိန်အောင်မြို့တွင် (၇၄) နှစ်မြောက် လွတ်လပ်ရေးနေ့အထိမ်းအမှတ် သတင်းစကား လက်ကမ်းစာ စောင်များ ဖြန့်ဝေ

ကလိန်အောင်  ဇန်နဝါရီ ၃

၂၀၂၂ခုနှစ်၊ ဇန်နဝါရီ (၄) ရက်တွင်  ရောက်ရှိမည့်  (၇၄)နှစ်မြောက်     လွတ်လပ်ရေးနေ့ အထိမ်းအမှတ် သတင်းစကား လက်ကမ်းစာစောင်များကို ဇန်နဝါရီ ၃ ရက် နံနက် ၈ နာရီက  ထားဝယ်ခရိုင်၊ ကလိန်အောင်မြို့  ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဝန်ထမ်းများက ကျောင်းသား၊ ကျောင်းသူများနှင့် ပြည်သူများအား အခမဲ့ဖြန့်ဝေပေးခဲ့ကြောင်း သိရသည်။

 

အဆိုပါလက်ကမ်းစာစောင်တွင် ယနေ့ခေတ် ကျောင်းသား၊ ကျောင်းသူ လူငယ်၊ လူရွယ်များ သိထားသင့်သည့် (၇၄) နှစ်မြောက် လွတ်လပ်ရေးနေ့အထိမ်းအမှတ် အမျိုးသားရေးဦးတည်ချက်(၄)ရပ်၊ မြန်မာ့လွတ်လပ်ရေး ကာလတစ်လျှောက် ချုပ်ဆိုခဲ့သောစာချုပ်များ၊  ဗိုလ်ချုပ်အောင်ဆန်း၏ အလယ်ပစ္စယံညီလာခံ၌ ပြောကြားသော မိန့်ခွန်းမှ ကောက်နုတ်ချက်၊ ၁၉၄၈ခုနှစ်၊ ဇန်နဝါရီ ၄ ရက် ပထမဆုံးသော လွတ်လပ်ရေးနေ့ အခမ်းအနားတွင် ဝန်ကြီးချုပ် ဦးနုပြောကြားခဲ့သည့် မိန့်ခွန်းမှ ကောက်နုတ်ချက်၊  နိုင်ငံတော်စီမံအုပ်ချုပ်ရေး ကောင်စီဥက္ကဋ္ဌ၊  နိုင်ငံတော်ဝန်ကြီးချုပ်  ဗိုလ်ချုပ်မှူးကြီး မင်းအောင်လှိုင်   နိုင်ငံတော်စီမံအုပ်ချုပ်ရေး ကောင်စီ၏ (၆) လပြည့်  နိုင်ငံတော်တာဝန်ထမ်းဆောင်ခဲ့မှုနှင့်ပတ်သက်၍   ပြောကြားသည့် မိန့်ခွန်းမှ ကောက်နုတ်ချက်၊ လွတ်လပ်ရေးနှင့်ဆိုင်သည့်  ကဗျာ၊   ဆောင်ပုဒ်များနှင့် ကာတွန်းတို့ကို ဝေဝေဆာဆာ ထည့်သွင်းဖော်ပြထားသည်။

မိုးမိုးခိုင်