ပြည်ထောင်စုဝန်ကြီး ဦးမင်းနောင် နေပြည်တော်ကောင်စီနယ်မြေ ပတ်ဝန်းကျင်ရှိ ဆည်တမံများ ကြံ့ခိုင်ရေးနှင့် ရေကြီးရေလျှံသည့် နေရာများမှ ရေထုတ်နုတ်မှုမြန်ဆန်စေရေး ကွင်းဆင်းဆောင်ရွက်

နေပြည်တော်၊ စက်တင်ဘာ ၁၅

 စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် ဒုတိယဝန်ကြီး ဦးဗိုလ်ဗိုလ်ကျော်၊ တာဝန်ရှိသူများနှင့်အတူ ယနေ့မွန်းလွဲပိုင်းတွင် ရေကြီးရေလျှံမှကြောင့် မိုးသီးနှံများ ထိခိုက်ပျက်စီးခဲ့သည့် ပုဗ္ဗသီရိမြို့နယ်နှင့် ဇေယျာသီရိမြို့နယ်တို့မှ တောင်သူများနှင့်တွေ့ဆုံပြီး စိုက်ပျိုးထွန်ယက်ခြင်းနှင့် သီးနှံအစားထိုး စိုက်ပျိုးခြင်းဆိုင်ရာ နည်းပညာများကို ရှင်းလင်းဆွေးနွေးသည်။ 

ထိုသို့တွေ့ဆုံစဉ် ပြည်ထောင်စုဝန်ကြီးက ဘမတ်ပဲသီးနှံစိုက်ပျိုးမည့် တောင်သူများအနေဖြင့် ဆီထွက်နေကြာသီးနှံကို လျာထားဧကအတိုင်း တွဲဘက်စိုက်ပျိုးရန်လိုအပ်ပြီး နေကြာသီးနှံ အစေ့အဆံ အောင်မြင်စေရန် ဝတ်မှုန်ကူးပျား မွေးမြူခြင်းအတွက် မွေးမြူရေးနှင့်ကုသရေး ဦးစီးဌာနက စီမံဆောင်ရွက်ပေးသွားမည်ဖြစ်ကြောင်း၊ မတ်ပဲနှင့် နေကြာသီးနှံ တွဲဘက်စိုက်ပျိုးရာ၌ အဓိကကြုံတွေ့ရသည့် မတ်ပဲစိုက်ခင်းကို ပိုးသတ်ဆေးသုံးစွဲခြင်းနှင့် နေကြာပန်းပွင့်ချိန် ဝတ်မှုံကူးကာလတွင် ပိုးသတ်ဆေး အသုံးမပြုရန်ကိစ္စအပါအဝင် စိုက်ပျိုးရေး နည်းပညာရပ်များကို စိုက်ပျိုးရေးဦးစီးဌာနပညာရှင်များက ကွင်းဆင်းဆွေးနွေး ကူညီပေးသွားမည်ဖြစ်၍ သီးနှံများ ပန်းတိုင်အထွက်နှုန်းရရှိရေး ကြိုးပမ်းပေးကြရန် တိုက်တွန်းပြောကြားသည်။

ထို့နောက် ဒုတိယဝန်ကြီးက ရေကြီးရေလျှံမှုများ ဖြစ်ပေါ်ရသည့်အခြေအနေနှင့် နွေသီးနှံအတွက် နွေစပါး တိုးချဲ့စိုက်ပျိုးရန် လျာထားဆောင်ရွက်နေမှုကိုလည်းကောင်း၊ ညွှန်ကြားရေးမှူးချုပ် ဒေါက်တာရဲတင့်ထွန်းနှင့် ဒေါက်တာရဲထွန်းဝင်းတို့က ရာသီချိန်မီ စိုက်ပျိုးနိုင်ရေးနှင့် သီးနှံများ ဖြစ်ထွန်းအောင်မြင်ရေး ပျားမွေးမြူရေး ကိစ္စရပ်များအပါအဝင် ကူညီဆောင်ရွက်ပေးသွားမည့် လုပ်ငန်းစဉ်များကိုလည်းကောင်း ရှင်းလင်းဆွေးနွေးကြသည်။

နေပြည်တော်ကောင်စီနယ်မြေ စုစုပေါင်းမိုးသီးနှံ ဧက ၃၄၅၀၀၀ စိုက်ပျိုးခဲ့ပြီး ဧက ၄၇၀၀၀ ကျော် ရေကြီးနစ်မြုပ်ခဲ့ကာ ယနေ့အထိ ဧက ၂၈၀၀၀ ပြန်ပေါ်ခဲ့ပြီး  ထိခိုက်မှု ဧက ၁၇၀၀၀ ကျော်တွင် ဧက ၃၉၀၀ ကျော် သီးနှံပျက်စီးခဲ့ကြောင်း၊ ပျက်စီးခဲ့သည့် စိုက်ပျိုးမြေများတွင် ရာသီအချိန်မီ ပြန်လည်စိုက်ပျိုးနိုင်ရေးနှင့် ထိခိုက်ခဲ့သည့် သီးနှံစိုက်ခင်းများကို အထွက်နှုန်းနှင့် သီးနှံအရည်အသွေး ထိခိုက်မှုသက်သာစေရေး၊  ရေကြီးရေလွှမ်းပြီးနောက် သီးနှံစိုက်ခင်းများတွင် ကျရောက်တတ်သည့် သီးနှံပိုးမွှားရောဂါများ ကာကွယ်နှိမ်နင်းရေးအတွက် နည်းပညာနှင့် အကူအညီများ ပံ့ပိုးပေးနိုင်ရန် စီမံဆောင်ရွက်လျက်ရှိသည်။

ထို့နောက် ပြည်ထောင်စုဝန်ကြီးသည် နေပြည်တော်ကောင်စီဥက္ကဌနှင့်အတူ ဇေယျာသီရိ မြို့နယ်ရှိ ပေါင်းလောင်းရေလှောင်တမံ အတွင်းရေဝင်ရောက်မှု၊ တမံကြံ့ခိုင်မှုနှင့် ရေပိုလွှဲ မှ ရေကျော်မှုအခြေအနေကို ကြည့်ရှုစစ်ဆေးပြီး ပြည်ထောင်စုဝန်ကြီးက တမံဘေးကင်း လုံခြုံရေး ဂရုပြုဆောင်ရွက်ရန်နှင့် ဆည်တမံများနှင့်ပတ်သက်သည့် ကောလဟာလများကြောင့် ပြည်သူများစိုးရိမ်ထိတ်လန့်မှု မဖြစ်ပေါ်စေရေးအတွက် လိုအပ်သော အသိပေးထုတ်ပြန်ချက်များ၊ အသိပညာပေးဆွေးနွေးခြင်းများ ဆောင်ရွက်ပေးရန် ဆွေးနွေးမှာ ကြားသည်။

ဆက်လက်၍ ပြည်ထောင်စုဝန်ကြီသည် ပေါင်းလောင်းရေလွှဲဆည် (အဝေရာဆည်) သို့ သွားရောက်ပြီး ရေဖြတ်သန်းစီးဆင်းမှုအခြေအနေကို လည်းကောင်း၊ ဥတ္တရသီရိမြို့နယ်ရှိ ငလိုက်ရေလှောင်တမံအတွင်း ရေဝင်ရောက်မှု၊ တမံကြံ့ခိုင်မှုနှင့် ဘဲနှုတ်သီးသဏ္ဍာန် ရေပိုလွှဲမှ ရေကျော်မှုအခြေအနေများကို လည်းကောင်း ကြည့်ရှုစစ်ဆေးကာ လုပ်ငန်းဆိုင် ရာ လိုအပ်ချက်များ ဆွေးနွေးမှာကြားသည်။

နိုင်ငံတစ်ဝှမ်းရှိ ဆည်ရေလှောင်တမံများအားလုံး ကြံ့ခိုင်မှုကောင်းမွန်ပြီး ရေပိုလွှဲများမှ ရေကျော်ကျနေမှုများအပေါ်  စိုးရိမ်ရန်မရှိကြောင်း သတင်းရရှိသည်။

သတင်းစဉ်