မြန်မာ့ရိုးရာယဉ်ကျေးမှုအမွေအနှစ်တွေ မပျောက်ပျက်အောင် ထိန်းသိမ်းနိုင်ဖို့နဲ့ နောက်မျိုးဆက်တွေအနေနဲ့လည်း အိုးစည်ကိုချစ်မြတ်နိုး တန်ဖိုးထားတတ်အောင် ယှဉ်ပြိုင်တာဖြစ်ပါတယ် (ပြည့်ဖြိုးမော်)
(၂၅) ကြိမ်မြောက် ငွေရတုအထိမ်းအမှတ်
မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကို နေပြည်တော်၌ ခမ်းနားသိုက်မြိုက်စွာဖြင့်
ကျင်းပလျက်ရှိရာ ပြိုင်ပွဲသို့ ဝင်ရောက် ယှဉ်ပြိုင်ကြသည့် တိုင်းဒေသကြီးနှင့် ပြည်နယ်များမှ
ပြိုင်ပွဲဝင်များ၊ အုပ်ချုပ်သူများ၏ ရင်တွင်း ခံစားချက် စကားသံများကို စုစည်းဖော်ပြလိုက်ပါသည်။
ဦးမင်းဆွေ
အုပ်ချုပ်သူ၊ ပဲခူးတိုင်းဒေသကြီး
ကိုယ်စားပြုပြိုင်ပွဲဝင်အဖွဲ့
အခုပြိုင်ပွဲမှာ ပဲခူးတိုင်း ဒေသကြီး
ကိုယ်စားပြုအနေနဲ့ ပြိုင်ပွဲဝင်အားလုံးပေါင်း ၂၂၁ ယောက် ပါပါတယ်။ တခြားအုပ်ချုပ်ပံ့ပိုးနဲ့ မိဘအုပ်ထိန်းသူတွေရောပါဆိုရင်
၃၀၀ ကျော်လောက် ပါဝင်ပါတယ်။ ပြိုင်ပွဲဘာသာရပ်အနေနဲ့ကတော့ ၁၁၃ ခုပါဝင်ယှဉ်ပြိုင်နိုင်ပါတယ်။
ငွေရတု အခမ်းအနားမှာ ပြိုင်ပွဲတွေကလည်း ဘာသာရပ်အစုံယှဉ်ပြိုင်နိုင်အောင်၊ ရွှေတံဆိပ်ဆုတွေ
အများကြီးရရှိအောင် လိုအပ်တာတွေကို လိုက်ပံ့ပိုးပေးနေပါတယ်။ မြန်မာ့ယဉ်ကျေးမှုအနုပညာ
အဆို၊ အက၊ အရေး၊ အတီး အတတ်ပညာတွေဟာ လက်ရှိခေတ်ကာလအခြေအနေအရ ကမ္ဘာ့နိုင်ငံအသီးသီးကနေ
အနုပညာ ဂီတရသပေါင်းစုံ လွှမ်းမိုးမှုတွေဟာ ရှိနေမှာပဲ။ ရှိသော်ငြားလည်းပဲ ကိုယ့်ရဲ့ယဉ်ကျေးမှု
အနုသုခုမပညာတွေဟာ ပျောက်ဆုံးပျက်စီးမှုမရှိအောင် ထိန်းသိမ်းရမယ်၊ မျိုးဆက်သစ်တွေကို
မဖြစ်မနေမွေးထုတ်ရမယ်။ ရွက်ပုန်းသီးအနုပညာရှင်တွေ အများကြီးရှိတယ်၊ ဒါတွေကိုရှာဖွေဖော်ထုတ်ပြီးတော့
ဒီလိုပြိုင်ပွဲကြီးတွေမှာ လာရောက် ယှဉ်ပြိုင်နိုင်အောင် ပံ့ပိုးပေးရမှာ ဖြစ်ပါတယ်။
ဒီနေ့ ပဲခူးတိုင်းဒေသကြီး ကိုယ်စားပြုအနေနဲ့ ယှဉ်ပြိုင် သွားတဲ့ မောင်နှိုင်းမြတ်သူဆိုရင်
အတန်းပညာကိုလည်း သင်ယူနေတယ်။ သူ့မှာအာရုံကြော အားနည်းတာလေးရှိတယ် ဆိုသော်လည်း ကလေးရဲ့ဇွဲလုံ့လ
မလျှော့တဲ့စိတ်၊ သူ့ရဲ့ဝါသနာ၊ မိဘမျိုးရိုးမှာလည်း အဘိုးဖြစ်သူမယ်ဒလင်ပညာရှင်ဖြစ်တဲ့အတွက်
အနုပညာဗီဇ လည်းပါလာတယ်၊ ကြိုးလည်းကြိုးစားတဲ့အတွက် ပဲခူးတိုင်းဒေသကြီး ဝန်ကြီးချုပ်ကြီးကိုယ်တိုင်
မျိုးဆက်သစ်တွေ ပေါ်ထွန်းလာဖို့အတွက် သူ့အပေါ်မှာ ကရုဏာစိတ်နဲ့ပါ ပိုပြီးဖြစ်မြောက်စေချင်တဲ့
စေတနာတွေနဲ ပံ့ပိုးကူညီဆောင်ရွက်ပေးနေပါတယ်။
မယမင်းမြတ် (ကရင်ပြည်နယ်)
အဆို (အမျိုးဂုဏ်၊ ဇာတိဂုဏ်မြှင့်တင်ရေး
တေးသီချင်း) အဆင့်မြင့်ပညာ
မြန်မာ့ရိုးရာ အဆို၊ အက၊ အရေး၊ အတီး
ပြိုင်ပွဲကြီးကို ဝင်ပြိုင်ခဲ့တာ သုံးနှစ်ဆက်တိုက် ရှိသွားပါပြီ။ တစ်နှစ်မှတော့ဆုမရရှိသေးပေမယ့်
ဒီနှစ်မှာတော့ ရွှေတံဆိပ်ဆုကြီး ရနိုင်မယ်လို့ထင်ပါတယ်။ အဆိုပြိုင်ပွဲ (အမျိုးဂုဏ်၊
ဇာတိဂုဏ်မြှင့်တင်ရေး တေးသီချင်း) ပြိုင်ပွဲမှာ ယှဉ်ပြိုင်သွားမှာပါ။ ဒီနှစ်မှာ ထူးထူးခြားခြား
တိုင်းရင်းသားအားလုံး ပိုမိုပူးပေါင်းလုပ်ရတဲ့ ပြိုင်ပွဲတွေကိုမြင်ရတယ်။ ဥပမာအားဖြင့်
တိုင်းရင်းသားတူရိယာအစုံနဲ့ တီးခတ်တဲ့ဖွင့်ပွဲ အခမ်းအနားဖျော်ဖြေမှုတွေ၊ ချင်း ရိုးရာ
အကယှဉ်ပြိုင်မှု၊ တိုင်းရင်းသားရိုးရာတူရိယာတွေနဲ့ ယှဉ်ပြိုင်မှုနဲ့ တိုင်းရင်းသားရိုးရာ၊
ကျေးလက် ရိုးရာအက ယှဉ်ပြိုင်မှုတွေရှိတယ်။ အခုလိုတိုင်းရင်းသားအားလုံးရဲ့ ယဉ်ကျေးမှုတွေ
ဖော်ထုတ်နိုင်ခြင်းက ကျွန်မတို့နိုင်ငံရဲ့ အောင်မြင်မှုလမ်းစလို့ ယုံကြည်ပါတယ်။ ယဉ်ကျေးမှုတွေကို
အပြန်အလှန် တန်ဖိုးထားကြမယ်၊ ထိန်းသိမ်းကြမယ်ဆိုတဲ့အသိကိုလည်း ဆို၊ က၊ ရေး၊ တီးပြိုင်ပွဲကြီးကနေ
ရရှိ လာစေပါတယ်။
မောင်ဓနလင်း (ရခိုင်ပြည်နယ်)
အက (ဝါသနာရှင်၊ ဒုတိယတန်း)
ကျွန်တော်က မြန်မာအက ကနေရရင်ကို ပျော်ရွှင်နေတဲ့သူပါ။
မြန်မာအကကို တက္ကသိုလ်ဝင် တန်းမှာစပြီး စိတ်ဝင်စားမိပြီး လေ့ကျင်ခဲ့တယ်။ မြန်မာ့ရိုးရာ
အဆို၊ အက၊ အရေး၊ အတီး ပြိုင်ပွဲ ကြီးကို ဝင်ရောက်ခဲ့တာကတော့ (၂၃) ကြိမ်မြောက်က စတင်ခဲ့ပါတယ်။
(၂၄) ကြိမ်မှာလည်း ယှဉ်ပြိုင်ခဲ့ပါတယ်။ ဆုတော့မရရှိခဲ့ပါဘူး။ ဒါပေမယ့် ကျွန်တော် စိတ်ဓာတ်မကျပါဘူး၊
လာပြိုင်ခွင့်ရတာနဲ့တင် ကျေနပ်ပါတယ်။ ဒီနှစ်မှာလည်း ပြဋ္ဌာန်းသုံးပုဒ်မှာ အားအရဆုံးတီးလုံးနဲ့
ပြိုင်ခွင့်ရခဲ့လို့ ကျေနပ်မိတယ်။ ဆုလည်းမျှော်မှန်းပါတယ်။ အပိုင်နိုင်ဆုံး ကကွက်ကလည်း
နံပါတ်၂ တီးလုံးဆိုတော့ ကျွန်တော်ဒီနှစ် ကံကောင်းမယ်လို့ မျှော်လင့်ပါတယ်။ နံပါတ်၂
တီးလုံးရဲ့ ကကြိုးက လည်း ရုပ်သေးပါတော့ ကျွန်တော်ပိုင်နိုင်တဲ့ ကကြိုးကကွက်ဖြစ်ခဲ့တယ်။
အချိန်အားဖြင့် နှစ်လကျော် အပြင်းအထန် လေ့ကျင့်ခဲ့တာ ဖြစ်ပါတယ်။ (၂၅) ကြိမ်မြောက် ငွေရတုအထိမ်းအမှတ်
မြန်မာ့ ရိုးရာယဉ်ကျေးမှု အဆို၊ အက၊ အရေး၊ အတီး ပြိုင်ပွဲကြီးကျင်းပ ပေးတဲ့အတွက် ကျေးဇူးတင်မိသလို
ကျွန်တော်တို့လို မျိုးဆက်သစ်တွေကို နေရာပေး၊ ဖျော်ဖြေခွင့်၊ ယှဉ်ပြိုင်ခွင့်ရဖို့
စင်မြင့်ကြီး စီစဉ်ပေးလို့ အထူးဝမ်းသာမိတယ်။ ယဉ်ကျေးမှုကို ထိန်းသိမ်းဖို့ဆိုတာ လူကြီးတွေတင်သာမက
လူငယ်တွေမှာလည်း အပြည့်အဝတာဝန်ရှိတယ်လို့ ခံယူပြီး တစ်ထောင့်တစ်နေရာကနေ အားဖြည့်ခွင့်၊
တာဝန်ထမ်းဆောင်ခွင့်ရတယ်လို့ မှတ်ယူပြီး ဂုဏ်ယူမိပါတယ်ခင်ဗျာ။
မစမ်းသီတာအေး (ချင်းပြည်နယ်)
အဆို (ဝါသနာရှင်၊ ပထမတန်း ကာလပေါ်)
ငယ်စဉ်ကတည်းကနေ နှစ်တိုင်းနီးပါး အဆိုနဲ့
ပြိုင်ပွဲဝင်လာခဲ့တာပါ။ (၂၃) ကြိမ်မြောက် အဆို၊ အက၊ အရေး၊ အတီး ပြိုင်ပွဲမှာတော့ ဝါသနာရှင်
ဒုတိယနဲ့ ဝါသနာရှင် ပထမအဆိုပြိုင်ပွဲတွေနဲ့ ရွှေတံဆိပ် ရရှိခဲ့ဖူးပါတယ်။ ဒီနှစ်မှာ
ဝါသနာရှင် ပထမတန်းကာလပေါ်အနေနဲ့ ၃၈ ဖြာမင်္ဂလာတေးသီချင်းနဲ့ ယှဉ်ပြိုင်ခဲ့ပါတယ်။ ဓမ္မတေးအမျိုးအစားမို့
စာသားရော၊ သီချင်းအဝင်အထွက်ပါ မမှားယွင်းအောင် သတိထားပြီး သီဆိုယှဉ်ပြိုင်ခဲ့ပါတယ်။
အားရကျေနပ်မှုရှိပါတယ်။ အခုလို ပြိုင်ပွဲကြီး ဆက်လက် ရှင်သန်နေပါစေလို့လည်း ကျွန်မတို့လို
ဝါသနာရှင်တွေက အမြဲဆုတောင်းနေခဲ့တာပါ။ မြန်မာ့ ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကြီးက
ကျွန်မတို့လို မျိုးဆက်သစ်တွေအတွက် ပြိုင်စရာစင်မြင့်ဆိုတာထက် ပိုပါတယ်။ ကျွန်မဆိုရင်
ဘဝရပ်တည်မှုအတွက်ပါ အများကြီး အထောက်အပံ့ ဖြစ်စေခဲ့ပါတယ်။ အဆိုပွဲတွေမှာ သီဆိုခွင့်ရလာသလို
အများနဲ့ယှဉ်ရင် အဆို၊ အက၊ အရေး၊ အတီးပြိုင်ပွဲဝင် တစ်ယောက်၊ ရွှေတံဆိပ်ဆုရှင် တစ်ယောက်ဆိုတဲ့
လေးစားမှုနဲ့ အားပေးမှုကိုပါ ရရှိစေသလို ပိုပြီးလည်းကြိုးစားဖို့ တွန်းအားတစ်ရပ်ဖြစ်စေပါတယ်ရှင့်။
ကျွန်မတို့ ပြည်နယ်ကလည်း အထူးအားပေးပြီး အစစအရာရာ ပံ့ပိုးပေးသလို ပြိုင်ပွဲလာရောက်
တဲ့အချိန်မှာလည်း ဗဟိုကတာဝန်ရှိသူတွေက အကောင်းဆုံး စောင့်ရှောက်စီမံပေးလို့ ကျေးဇူး
တင်ပါတယ်။
မသွန်းသက်မှူးစံ(ရှမ်းပြည်နယ်)
ကဗျာလွတ်အက အခြေခံပညာ (အသက် ၁၀နှစ်မှ
၁၅နှစ်)
အထက ၁ ဗထူး (ရပ်စောက် မြို့နယ်) က Grade
6 ကျောင်းသူ ဖြစ်ပါတယ်။ ဒီနှစ်မှာ ပထမဆုံးအကြိမ်အနေနဲ့ လာရောက်ယှဉ်ပြိုင်ခွင့်ရတာပါ။
ကဗျာလွတ်ပြိုင်ပွဲ အောက်တိုဘာ ၂၀ ရက်နေ့မှာ ယှဉ်ပြိုင်ရမှာဆိုတော့ အခုတော့ အပြင်းအထန်လေ့ကျင့်နေပါတယ်။
အခုလို မြန်မာ့ရိုးရာ ယဉ်ကျေးမှု အဆို၊ အက၊ အရေး၊ အတီးပြိုင်ပွဲမှာ ပါဝင်ခွင့်ရလို့
အထူးဝမ်းသာပါတယ်။ မနေ့က ဖွင့်ပွဲနေ့အခမ်းအနားကိုလည်း တက်ရောက်ခွင့်ရခဲ့ပါတယ်။ အကြိုက်ဆုံးကတော့
တိုင်းရင်းသား တူရိယာမျိုးစုံနဲ့တီးခတ်တဲ့ သံစုံတီးဝိုင်းကြီး ဖျော်ဖြေမှုပါ။ တစ်ခါမှ
မကြုံဖူးတော့ ဝမ်းသာမိပြီး ကြည်နူးနေမိတယ်။ နောက်နှစ်တွေမှာလည်း ပြိုင်ပွဲကြီးမှာ ပါဝင်ယှဉ်ပြိုင်သွားမယ်လို့
ဆုံးဖြတ်ထားပါတယ်။ ဗမာပဲ ဖြစ်ဖြစ်၊ ရှမ်းပဲဖြစ်ဖြစ် ဘယ်တိုင်းရင်းသားမဆို ကိုယ်ပိုင်လက္ခဏာနဲ့
ကိုယ်ပိုင် ယဉ်ကျေးမှုတွေရှိပါတယ်။ တိုင်းရင်းသားအားလုံးရဲ့ ယဉ်ကျေးမှုအမွေအနှစ်တွေကို
ထုတ်ဖော်ပြသခွင့်ရတာ ဒီအခမ်းအနားပြိုင်ပွဲကြီးက အဓိကဖြစ်ပါတယ်။ ကဗျာလွတ်အကဆိုတာ မြန်မာအကရဲ့
အခြေခံဖြစ်ပြီး ခွင်ထိုင်ရတာကိုက တအားပင်ပန်းပါတယ်။ ဒါပေမယ့် အကရဲ့အကျိုး ကျေးဇူးတွေက
အများကြီးပါပဲ။ မြန်မာအက ကကြည့်ရတာကိုက ကျက်သရေရှိသလို ကျန်းမာရေး အတွက်လည်း ခန္ဓာကိုယ်သွယ်လျစေတယ်။
လှုပ်ရှားနေရလို့ လေ့ကျင့်ခန်းလုပ်နေရသလိုဖြစ်တာမို့ အမျိုးသမီးတိုင်းလည်း ယဉ်ကျေးမှုကို
ထိန်းသိမ်းရာရောက်စေသလို ခန္ဓာကိုယ်ကြံ့ခိုင်စေလို့ မြန်မာအကကို သင်ယူကြပါလို့ တိုက်တွန်းလိုပါတယ်။
ဒီနှစ်က ငွေရတုအထိမ်းအမှတ်ဖြစ်တာမို့ ထူးခြားတဲ့အစီအစဉ်တွေကိုလည်း ပြိုင်ပွဲကြီးမှာတွေ့ရ၊
မြင်ရလို့ စိတ်လှုပ်ရှားမိပါတယ်။ နောက်နှစ် မှာလည်း တိုင်းရင်းသားညီအစ်ကို မောင်နှမအသီးသီးနဲ့
ပြန်ဆုံတွေ့ ပြီး ပြိုင်ပွဲဝင်ချင်ပါသေးတယ်။
ပြည့်ဖြိုးမော် (မွန်ပြည်နယ်)
ကိုယ်စားပြု အိုးစည်ဝါသနာရှင် ပထမတန်းပြိုင်ပွဲဝင်
ကျွန်တော်တို့ ပြည့်ဖြိုးမော် အဖွဲ့သားတွေအနေနဲ့
အိုးစည်၊ ဒိုးပတ်၊ ဆိုင်းဝိုင်းကြီးအဖွဲ့လိုက် မြန်မာ့ရိုးရာ ယဉ်ကျေးမှု အဆို၊ အက၊
အရေး၊ အတီးပြိုင်ပွဲကို နှစ်စဉ် ဝင်ရောက်ယှဉ်ပြိုင် ဖြစ်ပါတယ်။ ရွှေတံဆိပ်ဆု ၁၅ ဆု
ရရှိထားပါတယ်။ (၂၅) ကြိမ်မြောက် ငွေရတု အထိမ်းအမှတ် အဆို၊ အက၊ အရေး၊ အတီး ပြိုင်ပွဲယှဉ်ပြိုင်ဖို့
နှစ်လ သုံးလလောက် လေ့ကျင့်ပြီး ပြင်ဆင်ခဲ့ပါတယ်။ အဓိက ပြိုင်ပွဲ တွေ ဝင်ရောက်ယှဉ်ပြိုင်ဖြစ်တာကလည်း
မြန်မာ့ရိုးရာယဉ်ကျေးမှု အမွေအနှစ်တွေ မပျောက်ပျက်အောင် ထိန်းသိမ်းနိုင်ဖို့နဲ့ နောက်မျိုးဆက်တွေအနေနဲ့လည်း
အိုးစည်ကို ချစ်မြတ်နိုး တန်ဖိုးထားတတ်အောင် ရည်ရွယ်ချက်နဲ့ ယှဉ်ပြိုင်တာဖြစ်ပါတယ်။
အနောက်တိုင်း တူရိယာ ရေစီးကြောင်းတွေ အရှိန်အဟုန်ပြင်းပြင်းနဲ့ စီးဆင်းနေပါစေ အခုခေတ်လူငယ်တွေအနေနဲ့
မြန်မာ့ရိုးရာယဉ်ကျေးမှု ဂီတအသံတွေ၊ အပြောတွေ၊ အဆိုတွေကိုလည်း ခေတ်ရေစီးကြောင်း နဲ့အတူ
လိုက်ပါစီးမျောပြီး ခံစား ပေးကြပါလို့ ပြောချင်ပါတယ်။
တွေ့ဆုံမေးမြန်း- ခင်ရတနာ၊ ဇင်ဦး၊
နွဲ့မွန်
ဓာတ်ပုံ- တင်စိုး၊ ဟိန်းထက်ဇော်
No comments