ကမ္ဘာ့ဖလားနဂါးလှေလှော်ချန်ပီယံရှစ်လက်ရည်စစ်ပြိုင်ပွဲတွင် မြန်မာအသင်း ရွှေတံဆိပ်တစ်ခု၊ ငွေတံဆိပ်တစ်ခု ထပ်မံဆွတ်ခူး ကမ္ဘာ့အားကစားပြိုင်ပွဲ ချန်ပီယံရှစ်နဂါးလှေလှော်ပြိုင်ပွဲအတွက် ၀င်‌ရောက်ယှဉ်ပြိုင်ခွင့်ရ

ရန်ကုန် နို၀င်ဘာ ၃

အပြည်ပြည်ဆိုင်ရာ ကနူးလှေလှော်အဖွဲ့ချုပ်၏ ၂၀၂၄ ခုနှစ်၊ ကမ္ဘာ့ဖလား နဂါးလှေလှော်ပြိုင်ပွဲ (2024 ICF Dragon Boat World Cup ) ကို နို၀င်ဘာ ၂ ရက်‌နှင့် ၃ ရက်တို့တွင် ဖိလစ်ပိုင်သမ္မတနိုင်ငံ Puerto Princesa မြို့၌ ကျင်းပခဲ့ရာ မြန်မာလှေလှော် အားကစားအသင်း ရွှေတံဆိပ်တစ်ခု၊ ငွေတံဆိပ်တစ်ခု ဆွတ်ခူးရရှိခဲ့ကြောင်း သိရသည်။

မြန်မာ၊ အင်ဒိုနီးရှား၊ တရုတ် (တိုင်ပေ)၊ စပိန်၊ ဖိလစ်ပိုင်၊ ဟန်ဂေရီအသင်းတို့သည် နိုဝင်ဘာ ၂ ရက်က အမျိုးသား၊ အမျိုးသမီး မီတာ၂၀၀ (၁၀) တက်လှော်ဗိုလ်လုပွဲပြိုင်ပွဲ ယှဉ်ပြိုင်ခဲ့ရာ အင်ဒိုနီးရှားအသင်းက ပထမ (ရွှေတံဆိပ်)၊ မြန်မာအသင်းက ဒုတိယ (ငွေတံဆိပ်)၊ တရုတ် (တိုင်ပေ) အသင်းက တတိယ (ကြေးတံဆိပ်) ရရှိခဲ့ကြသည်။

အလားတူ မြန်မာ၊ ဟန်‌ဂေရီ၊ အင်ဒိုနီးရှား၊ ကိုရီးယား၊ တရုတ် (တိုင်ပေ)၊ ယူကရိန်းအသင်းတို့သည် နို၀င်ဘာ ၃ ရက်က အမျိုးသား၊ အမျိုးသမီး မီတာ ၅၀၀ (၁၀) တက်လှော်ဗိုလ်လုပွဲကို ယှဉ်ပြိုင်ခဲ့ရာ မြန်မာအသင်းက ပထမ (ရွှေတံဆိပ်)၊ ဟန်ဂေရီ အသင်းက ဒုတိယ (ငွေတံဆိပ်)၊ အင်ဒိုနီးရှားအသင်းက တတိယ (ကြေးတံဆိပ်)တို့ ရရှိခဲ့ ကြသည်။

မြန်မာနိုင်ငံလှေလှော်အဖွဲ့ချုပ်မှ အားကစားသမားများသည် အောက်တိုဘာ ၂၄ ရက်မှ နို၀င်ဘာ ၃ ရက်‌အထိ တရုတ်ပြည်သူ့သမ္မတနိုင်ငံ Yichang မြို့၌ ကျင်းပခဲ့သည့် ကမ္ဘာ့ဖလားနဂါးလှေလှော်ပြိုင်ပွဲတွင် ရွှေ‌တံဆိပ်‌ ငါးခု၊ ငွေတံဆိပ် နှစ်ခု ရရှိခဲ့ပြီး ယခု ကမ္ဘာ့ဖလား နဂါးလှေလှော်ပြိုင်ပွဲတွင် ရွှေ‌တံဆိပ်‌ တစ်ခု၊ ငွေတံဆိပ်တစ်ခု ထပ်မံ ရရှိခဲ့သည့်အတွက် လက်ရည်စစ်ပြိုင်ပွဲများအပြီးတွင် မြန်မာအသင်းအနေဖြင့် ရွှေ‌တံဆိပ်‌ ခြောက်ခု၊ ငွေတံဆိပ်သုံးခု ရရှိခဲ့ပြီးဖြစ်သည်။ 

လက်ရည်စစ်ပြိုင်ပွဲများဖြစ်သည့် အမျိုးသား (၁၀) တက်လှော် မီတာ၂၀၀၀ ၊ အမျိုးသား (၈) တက်လှော် မီတာ ၂၀၀၀ ၊ အမျိုးသား၊ အမျိုး သမီး (၈) တက်လှော် မီတာ ၂၀၀၀ ၊ အမျိုးသား၊ အမျိုးသမီး (၁၀) တက်လှော် မီတာ ၂၀၀ နှင့် အမျိုးသား၊ အမျိုးသမီး (၁၀) တက်လှော် မီတာ ၅၀၀ ပြိုင်ပွဲများတွင် အသင်း ၁၆ သင်းအား ၊ အုပ်စု‌လေးစုခွဲ၍ ကွာတားဖိုင်နယ်၊ ဆီမီးဖိုင်နယ်နှင့် ဖိုင်နယ်အဆင့်များအထိ အဆင့်ဆင့် ယှဉ်ပြိုင်ကြရကြောင်း သိရသည်။ 

ယင်းပြိုင်ပွဲမှ အကောင်းဆုံး အသင်း (၁၂) သင်းသည် တရုတ်ပြည်သူ့သမ္မတနိုင်ငံ၊ ချန်ဒူးမြို့၌ လာမည့် ၂၀၂၅ ခုနှစ် သြဂုတ် ၉ရက်နှင့် ၁၀ရက်တို့တွင် ကျင်းပသွားမည့် ကမ္ဘာ့အားကစားပြိုင်ပွဲ ချန်ပီယံရှစ် နဂါးလှေလှော်ပြိုင်ပွဲသို့ ဝင်ရောက်ယှဉ်ပြိုင်ရမည် ဖြစ်ပြီး မြန်မာ‌လှေလှော် အားကစားသမားများသည် ၀င်ရောက်ယှဉ်ပြိုင်ခွင့် ရရှိခဲ့ပြီကြောင်း သိရသည်။

သတင်းစဉ်