ဂါဇာဒေသ အပစ်အခတ်ရပ်စဲရေး အီဂျစ်သမ္မတနှင့် စပိန်ဘုရင်တို့တိုက်တွန်း

ကိုင်ရို   စက်တင်ဘာ  ၁၈

အီဂျစ်သမ္မတ   အဗ္ဗဒယ်  ဖာတာ့ အယ်စီစီနှင့်  စပိန်ဘုရင် ဖိလစ် ၆ တို့သည်  ဂါဇာကမ်းမြောင် ဒေသ၌   အပစ်အခတ်ရပ်စဲရေး၊  ဓားစာခံများပြန်လွှတ်ရေးနှင့် လူသားချင်းစာနာထောက်ထားမှု ဆိုင်ရာအကူအညီများ  အတားအဆီးမရှိ   ပေးပို့နိုင်ရေးအတွက်  တောင်းဆိုခဲ့ကြသည်ဟု စက်တင် ဘာ ၁၇ရက်တွင် အီဂျစ်သမ္မတရုံးက ပြောသည်။

အယ်-အစ်တီဟာဒီယာ သမ္မတနန်းတော်၌ ကျင်းပသည့်တံခါးပိတ်ဆွေးနွေးပွဲတွင် ပါလက်စတိုင်း များကို အတင်းအကျပ်ဖိအားပေး၍ ရွှေ့ပြောင်းခိုင်းခြင်းသည်  ဒေသတွင်းမတည်ငြိမ်မှုကို ပို၍ ဆိုးရွားစေပြီး ဥရောပသို့ တရားမဝင်ရွှေ့ပြောင်းနေထိုင်မှုများကို ပို၍ဆိုးရွားစေသည်ဟု ခေါင်းဆောင်နှစ်ဦးစလုံးက ပြောသည်။

အရှေ့အလယ်ပိုင်းဒေသငြိမ်းချမ်းရေးအတွက် စပိန်နိုင်ငံ၏ ထောက်ခံမှုကို  အီဂျစ်သမ္မတက ချီးကျူး ခဲ့သည်။    စပိန်ဘုရင်  ဖိလစ်  ၆  ကလည်း   ဂါဇာဒေသ အပစ်အခတ်ရပ်စဲရေးနှင့် ပြန်လည် တည်ဆောက်ရေးအစီအစဉ် ပြင်ဆင်ခြင်းတို့အတွက်   နှစ်နှစ်တာကာလအတွင်း အီဂျစ်၏ ကြိုးပမ်း အားထုတ်မှုများကို အသိအမှတ်ပြုခဲ့သည်။  စပိန်ဘုရင် ဖိလစ် ၆ နှင့် မိဖုရား လက်တီဇီယာတို့အား  အီဂျစ်သမ္မတ အယ်စီစီက ဧည့်ခံပွဲဖြင့် တရားဝင်ကြိုဆိုခဲ့သည်။ 

စပိန်ဘုရင်၏ ယခုခရီးစဉ်သည် စပိန်ဘုရင်တစ်ပါးအနေဖြင့် အီဂျစ်သို့ ပထမဦးဆုံးအကြိမ် လာရောက်ခြင်းဖြစ်ပြီး   ဖေဖော်ဝါရီလအတွင်းက  မက်ဒရစ်မြို့သို့ အီဂျစ်သမ္မတ စီစီ လာရောက်ပြီး နောက် နှစ်နိုင်ငံမဟာဗျူဟာ မြောက်ဆက်ဆံရေးကို မြှင့်တင်သည့်အနေဖြင့်  အီဂျစ်နိုင်ငံသို့ လာရောက်ခြင်းဖြစ်သည်။

ဆင်ဟွာ