အမေရိကန်ပြည်ထောင်စုရှိ အိမ်ဖြူတော်အနီး၌ သေနတ်ပစ်ခတ်မှုဖြစ်ပွား

ဝါရှင်တန် နိုဝင်ဘာ ၂၉

 

အမေရိကန်ပြည်ထောင်စု အိမ်ဖြူတော်အနီး၌ သေနတ်ပစ်ခတ်မှုဖြစ်ပွားခဲ့ရာ အမျိုးသားအစောင့် တပ်ဖွဲ့ဝင်တစ်ဦး သေဆုံးပြီး တစ်ဦးပြင်းထန်စွာ ထိခိုက်ဒဏ်ရာရရှိခဲ့သည်။

 

ဖမ်းဆီးခံ သံသယရှိသူမှာ အသက် ၂၉ နှစ်အရွယ် အာဖဂန်နိုင်ငံသားဖြစ်ကြောင်း အမေရိကန် စုံစမ်းစစ်ဆေးရေး အာဏာပိုင်များက ပြောကြားခဲ့သည်။

 

အဆိုပါ သံသယရှိသူသည် အာဖဂန်နစ္စတန်တွင် အမေရိကန်တပ်ဖွဲ့အား ကူညီပေးသူများကို နိုင်ငံအတွင်းသို့ ဝင်ရောက်ခွင့်ပေးသည့် အစီအစဉ်တစ်ခုအရ အမေရိကန်သို့ ဝင်ရောက်ခဲ့ခြင်းဖြစ်ကြောင်း FBI ဒါရိုက်တာနှင့် ကိုလံဘီယာခရိုင်မှ အမေရိကန်ရှေ့နေတို့က သတင်းထောက်များအား ပြောကြားခဲ့သည်။

 

အာဖဂန်အမျိုးသားသည် ၎င်း၏ဇနီးနှင့် သားသမီးများနှင့်အတူ အနောက်ပိုင်း ဝါရှင်တန်ပြည်နယ်၌ နေထိုင်လျက်ရှိပြီး ဝါရှင်တန်မြို့တော်သို့ ကားမောင်းလာခဲ့ကြောင်း ၎င်းတို့က ပြောကြားခဲ့သည်။

 

ထို့ပြင် ၎င်းသည် အာဖဂန်နစ္စတန်ရှိ ဗဟိုထောက်လှမ်းရေး အေဂျင်စီနှင့် အတူတကွ အလုပ်လုပ်ဆောင်ခဲ့ကြောင်း အမေရိကန် မီဒီယာများက ဖော်ပြသည်။

 

စုံစမ်းစစ်ဆေးရေး အာဏာပိုင်များက အဆိုပါအမျိုးသား၏နေအိမ်ကို ရှာဖွေပြီး ၎င်း၏ ရည်ရွယ်ချက်ကို သိရှိရန် သူနှင့်ဆက်စပ်သူများကို စုံစမ်းမေးမြန်းမည်ဖြစ်ကြောင်း သိရသည်။

 

သေနတ်ပစ်ခတ်ခံရသည့် အစောင့်တပ်ဖွဲ့ဝင်နှစ်ဦးမှာ အသက် ၂၀ အရွယ် အမျိုးသမီးတစ်ဦးနှင့် အသက် ၂၄ နှစ်အရွယ် အမျိုးသားတစ်ဦးတို့ဖြစ်သည်။ သေဆုံးသူမှာ အမျိုးသမီးဖြစ်ကြောင်း သမ္မတ ဒေါ်နယ်ထရမ့်က ယနေ့ပြောကြားခဲ့သည်။

 

၎င်းတို့နှစ်ဦးအား ဝါရှင်တန်ဒီစီသို့ လုံခြုံရေးတာဝန်ထမ်းဆောင်ရန် သမ္မတထရမ့်က အမိန့်ပေးခဲ့ကြောင်း အာဏာပိုင်များက ပြောကြားခဲ့သည်။

 

ကိုးကား - အင်န်အိတ်ချ်ကေ

ဘာသာပြန် - အောင်ကျော်ကျော်