အဲဘတ်စ်ကုမ္ပဏီက လေယာဉ်ဆော့ဖ်ဝဲအဆင့်မြှင့်တင်ခြင်းများ ဆောင်ရွက်မှုကြောင့် လေကြောင်းခရီးစဉ်အများအပြား နှောင့်နှေးကြန့်ကြာလျက်ရှိ

လန်ဒန် နိုဝင်ဘာ ၂၉

 

ဥရောပလေကြောင်းကုမ္ပဏီကြီး အဲဘတ်စ်က လက်ရှိပြေးဆွဲနေသော ၎င်း၏ A320 Family ခရီးသည်တင် အမျိုးအစားလေယာဉ်များကို ဆော့ဖ်ဝဲအဆင့်မြှင့်တင်ခြင်းများ ချက်ချင်းဆောင်ရွက်ရသည့်အတွက် ကမ္ဘာတစ်ဝန်းရှိ လေကြောင်းခရီးစဉ်အများအပြား နှောင့်နှေးကြန့်ကြာလျက်ရှိကြောင်း သိရသည်။

 

ပြင်းထန်သော နေရောင်ခြည်ရောင်စဉ်ဖြာထွက်ခြင်းဖြစ်စဉ်သည် လေယာဉ်များ၏အရေးကြီးသော ထိန်းချုပ်မှုစနစ်ကို ထိခိုက်စေကြောင်း အဲဘတ်စ်ကုမ္ပဏီ၏ ကြေညာချက်တွင် ဖော်ပြထားသည်။

 

အဆိုပါဖြစ်စဉ်ဖြစ်ပွားခဲ့သည့် လေယာဉ်အမျိုးအစားများမှာ အဲဘတ်စ် A319၊ A320 နှင့် A321 တို့ဖြစ်သည်။

 

အဲဘတ်စ်ကုမ္ပဏီက လက်ရှိဖြစ်ပေါ်နေသော အဆင်မပြေမှုအတွက် ကမ္ဘာတစ်ဝန်းရှိ လေကြောင်းလိုင်းများကို တောင်းပန်ခဲ့သည်။

 

ပြီးခဲ့သည့်လနှောင်းပိုင်းက အမေရိကန်လေကြောင်းလိုင်းတစ်ခုမှ အဲဘတ်စ်လေယာဉ်တစ်စင်း အမြင့်မှ ရုတ်တရက်နိမ့်ဆင်းသွားခဲ့ရာ ခရီးသည်အများအပြား ထိခိုက်ဒဏ်ရာရရှိခဲ့ပြီးနောက် ပြင်းထန်သော နေရောင်ခြည်ရောင်စဉ်ဖြာထွက်မှုဖြစ်စဉ်ကို စတင်သတိထားမိခဲ့ခြင်းဖြစ်ကြောင်း အနောက်နိုင်ငံမီဒီယာများက သတင်းဖော်ပြသည်။

 

A320 Family လေယာဉ်ကို အသုံးပြုပြေးဆွဲသည့် လေကြောင်းလိုင်းများအနက် ဂျပန်နီပွန် လေကြောင်းလိုင်းလည်း ပါဝင်သည်။

 

ဆော့ဖ်ဝဲအဆင့်မြှင့်တင်မှုသည် လေယာဉ်တစ်စင်းလျှင် လေးနာရီခန့်ကြာမြင့်ပြီး ၎င်း၏ အဲဘတ်စ်ဂျက်လေယာဉ် ၃၄ စင်းကို စတင်လုပ်ဆောင်နေပြီဖြစ်ကြောင်း ဂျပန်နီပွန်လေကြောင်း လိုင်းက ပြောကြားသည်။

 

နိုဝင်ဘာ ၂၉ ရက်တွင် နီပွန်လေကြောင်းလိုင်းမှ ခရီးစဉ် ၉၅ ခုကို ဖျက်သိမ်းခဲ့ပြီး ခရီးသည် ၁၃၂၀၀ ခန့် ခရီးသွားလာမှု နှောင့်နှေးကြန့်ကြာခဲ့ရသည်။

 

ဆော့ဖ်ဝဲအဆင့်မြှင့်တင်မှုသည် နိုဝင်ဘာ ၃၀ ရက် နံနက်ပိုင်းတွင် အပြီးသတ်ရန် မျှော်လင့်ထားသော်လည်း ပြည်တွင်းလေကြောင်းခရီးစဉ် ခြောက်ခုကို ထိခိုက်စေမည်ဖြစ်ကြောင်း နီပွန်လေကြောင်းလိုင်းက ဆက်လက်ပြောကြားခဲ့သည်။

 

နောက်ဆုံးရသတင်းများကို အချိန်နှင့်တစ်ပြေးညီ စစ်ဆေးရန် လေယာဉ်ခရီးသည်များအား တိုက်တွန်းထားကြောင်း သိရသည်။

 

ကိုးကား - အင်န်အိတ်ချ်ကေ

ဘာသာပြန် - အောင်ကျော်ကျော်