ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်(နေပြည်တော်) ကျင်းပရေးဆိုင်ရာ ဖိတ်ကြားရေး၊ နေရာချထားရေးနှင့် ဧည့်ခံကျွေးမွေးရေး ဆွေးနွေး

 

နေပြည်တော် ဇန်နဝါရီ ၂၈

 

(၇၉)နှစ်မြောက် ပြည်ထောင်စုနေ့ကို ကြိုဆိုဂုဏ်ပြုသောအားဖြင့် ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်ကို နေပြည်တော်၌ စည်ကားသိုက်မြိုက်စွာ ကျင်းပမည်ဖြစ်ရာ ပွဲတော်ကျင်းပရေးဆိုင်ရာ ဖိတ်ကြားရေး၊ နေရာချထားရေးနှင့် ဧည့်ခံကျွေးမွေးရေးကော်မတီ၏ ညှိနှိုင်းအစည်းအဝေး (၁/၂၀၂၆)ကို ယနေ့မွန်းလွဲပိုင်းတွင် သိပ္ပံနှင့်နည်းပညာဝန်ကြီးဌာနဝန်ကြီးရုံး၌ ကျင်းပသည်။

 

ဦးစွာ ကော်မတီဥက္ကဋ္ဌ ဒုတိယဝန်ကြီး ဒေါက်တာအောင်ဇေယျက ပြည်ထောင်စုအဆင့် MSME ထုတ်ကုန်ပြပွဲနှင့် ဈေးရောင်းပွဲတော်(နေပြည်တော်) ကျင်းပရေး ဗဟိုကော်မတီ၏ ညွှန်ကြားချက်များအတိုင်း မိမိတို့ လုပ်ငန်းကော်မတီအနေဖြင့် လုပ်ငန်းတာဝန်များ ကျေပွန်အောင် ကြိုးပမ်းထမ်းဆောင်သွားရန်၊ ယမန်နှစ်က အတွေ့အကြုံများအပေါ် အခြေခံ၍ ဖိတ်ကြားရေး၊ နေရာချထားရေးနှင့် ဧည့်ခံကျွေးမွေးရေး အစီအစဉ်များဆိုင်ရာ အားသာချက်များကို ပိုမိုအားကောင်း စေရေးနှင့် အားနည်းချက်များကို လျော့နည်း ပပျောက်သွားစေရေးတို့အတွက် အလေးအနက် ကြိုးပမ်းဆောင်ရွက်သွားရန်၊ ဖွင့်ပွဲအခမ်းအနားနှင့် ပွဲတော်ကျင်းပစဉ်ကာလအတွင်း မိမိတို့၏ လုပ်ငန်းတာဝန်များကို ချို့ယွင်းချက်များနှင့် လစ်ဟင်းမှုများမရှိအောင် ကြိုတင် ပြင်ဆင်၍ အလေးထားကြိုးပမ်းဆောင်ရွက်သွားရန် တိုက်တွန်းမှာကြားသည်။

 

ယင်းနောက် အစည်းအဝေးသို့ တက်ရောက်လာကြသူများက သက်ဆိုင်ရာ ကဏ္ဍအလိုက် ဆွေးနွေးတင်ပြကြရာ ဒုတိယဝန်ကြီးက လိုအပ်သည်များကို ပေါင်းစပ်ညှိနှိုင်းပေးခဲ့ကြောင်း သိရသည်။

သတင်းစဉ်