သင်္ကြန်အကြတ်နေ့တွင် မန္တလေးမြို့ရှိ လမ်းလျှောက်သင်္ကြန်များနှင့် မဏ္ဍပ်များ၌ သင်္ကြန်ချစ်သူ ပြည်သူများဖြင့် ကြိတ်ကြိတ်တိုးစည်ကား

မန္တလေး ဧပြီ ၁၅

 

ယနေ့ကျရောက်သည့် မြန်မာ့ရိုးရာ မဟာသင်္ကြန်အကြတ်နေ့တွင် မန္တလေးမြို့ရှိ လမ်းလျှောက် သင်္ကြန်များနှင့် မဏ္ဍပ်များ၌ သင်္ကြန်ချစ်သူ ပြည်သူများဖြင့် ကြိတ်ကြိတ်တိုး စည်ကားလျက်ရှိ သည်။

 

နံနက်ပိုင်းမှစတင်ကာ မန္တလေးမြို့တော် မဟာသင်္ကြန်မဏ္ဍပ်၌ နိုင်ငံကျော် တေးသံရှင်များ၏ သင်္ကြန် တေးသီချင်းများဖြင့် သီဆိုဖျော်ဖြေမှု၊ ဝန်ကြီးဌာနနှင့် ဝါသနာရှင် ယိမ်းအကအဖွဲ့များ၏ ယိမ်းအကအလှများဖြင့် ကပြဖျော်ဖြေမှုတို့ကို သင်္ကြန်ချစ်သူ ပြည်သူအများအပြားက အားပေးကြည့်ရှုရင်း အတူလိုက်ပါ သီဆိုကခုန်ကာ သင်္ကြန်အကြတ်နေ့ကို ပျော်ရွှင်စွာဆင်နွှဲကြသည်။

 

ထို့ပြင် သင်္ကြန်ချစ်သူ ပြည်သူများသည် တိုင်းရင်းသားများ၏ ရိုးရာရေကစားမဏ္ဍပ်များ၌ ပျော်ရွှင်စွာ ရေကစားကြရင်း တိုင်းရင်းသားတိုင်းရင်းသူများ၏ တိုင်းရင်းသားရိုးရာ အကအလှများဖြင့် ဖျော်ဖြေမှုများကို ကြည့်ရှုအားပေးပြီး စတုဒိသာအဖြစ် ကျွေးမွေးသည့် ဒေသအစားအစာများကို နှစ်သက်စွာသုံးဆောင်ကြသည်။

 

ကျုံးပတ်လည်တစ်လျှောက် မြန်မာ့ရိုးရာယဉ်ကျေးမှု အစဉ်အလာများနှင့်အညီ ထူးခြားဆန်းသစ်စွာ ပုံဖော်တည်ဆောက်ထားသည့် သင်္ကြန်မဏ္ဍပ်များ၌လည်း မိသားစုအလိုက်၊ အစုအဖွဲ့အလိုက် အေးချမ်းပျော်ရွှင်စွာ ရေကစားကြပြီး မင်္ဂလာမန္တလေး လမ်းလျှောက်သင်္ကြန်ရှိ Floating Street ဇုန်၊ Star Light Streetဇုန်၊ Flower Street ဇုန်နှင့် Water Street ဇုန်စသည့် ဇုန်များတွင် အေးချမ်းပျော်ရွှင်စွာ လာရောက်ဆင်နွှဲကြသည့်  ပြည်သူများဖြင့် ပြည့်နှက်စည်ကားလျက်ရှိသည်။

 

မင်္ဂလာမန္တလေး လမ်းလျှောက်သင်္ကြန်သို့ လာရောက်လည်ပတ် ပါဝင်ဆင်နွှဲကြသည့် ဒေသခံများနှင့် အနယ်နယ်အရပ်ရပ်မှ ပြည်သူများ ရေသဘင်ပွဲဆင်နွှဲရင်း အမောပြေသုံးဆောင်နိုင်ရန်အတွက် စတုဒိသာ အကျွေးအမွေးများကိုလည်း လှူဒါန်းကျွေးမွေးလျက်ရှိသည်။

 

ထို့အတူ မန္တလေးကျုံးအနောက်ဘက်ရှိ ဈေးချိုသူ ရေကစားမဏ္ဍပ်တွင် ပရိသတ်အကြိုက် ဖျော်ဖြေရေး အစီအစဉ်များဖြင့် မြူးမြူးကြွကြွ ဖျော်ဖြေတင်ဆက်လျက်ရှိသည့်အတွက် လာရောက်ပါဝင်ဆင်နွှဲ ကြသည့် ပြည်သူများဖြင့် စည်ကားခဲ့သည်။

 

အလားတူ မြို့နယ်၊ ရပ်ကွက်များအတွင်းရှိ မဏ္ဍပ်ငယ်များတွင် လူငယ်များ၊ ကလေးငယ်များက ရေကစားခြင်း၊ စတုဒိသာကျွေးမွေးခြင်းတို့ဖြင့် အေးချမ်းပျော်ရွှင်စွာ သင်္ကြန်အကြတ်နေ့ကို ပါဝင်ဆင်နွှဲလျက်ရှိသည်။

 

ညပိုင်းတွင် မန္တလေးမြို့‌တော် မဟာသင်္ကြန်မဏ္ဍပ်၌ ယိမ်းအကများ၊ တေးသီချင်းများဖြင့် သင်္ကြန် ချစ်သူပြည်သူများကို ဖျော်ဖြေတင်ဆက်ပေးလျက် ရှိကြောင်း သိရသည်။

 

မင်းထက်အောင်(မန်းကိုယ်ပွား)