တရုတ်-ရုရှားကုန်စည်ပြပွဲသို့ တရုတ်သမ္မတ ရှီကျင့်ဖျင်နှင့် ရုရှားသမ္မတ ဗလာဒီမာပူတင် ဝမ်းမြောက်ကြောင်းသဝဏ်လွှာများပေးပို့

 

ပေကျင်း   မေ   ၁၇

တရုတ်နိုင်ငံအရှေ့မြောက်ပိုင်း ဟေလုံကျန်းပြည်နယ်  ဟာဘင်းမြို့တွင် ကျင်းပသည့် (၁၀)ကြိမ် မြောက် တရုတ်-ရုရှားကုန်စည်ပြပွဲသို့ တရုတ်သမ္မတ ရှီကျင့်ဖျင်နှင့် ရုရှားသမ္မတ ဗလာဒီမာပူတင် တို့က ဝမ်းမြောက်ကြောင်း သဝဏ်လွှာများကို မေ ၁၇ ရက်တွင် အသီးသီးပေးပို့ခဲ့ကြောင်း သိရသည်။

ယခုနှစ်သည် တရုတ်-ရုရှား မဟာဗျူဟာမြောက် ညှိနှိုင်းဆောင်ရွက်ရေး မိတ်ဖက်အဖွဲ့အစည်း တည်ထောင်သည့် နှစ် ၃၀ ပြည့် အထိမ်းအမှတ်နှင့် တရုတ်-ရုရှား အိမ်နီးချင်းကောင်းနှင့် ချစ်ကြည် ရင်းနှီးစွာ ပူးပေါင်းဆောင်ရွက်ရေးစာချုပ်ချုပ်ဆိုသည့် ၂၅ နှစ်မြောက်ဖြစ်ပြီး နှစ်နိုင်ငံအကြား ကဏ္ဍ များစွာတွင် ပူးပေါင်းဆောင်ရွက်မှုများ ဆောင်ရွက်နိုင်ခဲ့ကာ အောင်မြင်မှုများရရှိခဲ့ကြောင်း တရုတ် သမ္မတ ရှီကျင့်ဖျင်က ပြောကြားသည်။

ယခုကျင်းပသည့် ပြပွဲသည် နှစ်နိုင်ငံ၏ ကဏ္ဍအသီးသီးအတွက် ၎င်းတို့၏ နယ်မြေများနီးကပ်မှုနှင့် အပြန်အလှန် အကျိုးပြုသည့် အားသာချက်များကို အသုံးချရန်၊ ဘက်စုံလက်တွေ့ကျသော ပူးပေါင်း ဆောင်ရွက်မှုကို  နက်ရှိုင်းစေရန်၊  စီးပွားရေးနှင့် လူမှုရေးဖွံ့ဖြိုးတိုးတက်မှုကို     ပိုမိုမြှင့်တင်ရန်နှင့် နှစ်နိုင်ငံပြည်သူများ၏အကျိုးကို စဉ်ဆက်မပြတ်မြှင့်တင်ရန် အခွင့်အလမ်းတစ်ခုအဖြစ်  ဆောင်ရွက် နိုင်လိမ့်မည်ဟု မျှော်လင့်ထားကြောင်း သမ္မတရှီက ပြောကြားခဲ့သည်။  တရုတ်-ရုရှား ဘက်စုံ မဟာဗျူဟာမြောက် ပေါင်းစပ်ညှိနှိုင်းဆောင်ရွက်မှု မိတ်ဖက်ဆက်ဆံရေးမှတစ်ဆင့်   ခေတ်သစ် တစ်ခုအတွက် တည်ငြိမ်ပြီး   ရေရှည်ဖွံ့ဖြိုးတိုးတက်မှုအတွက် ပံ့ပိုးကူညီမှုများ  ပြုလုပ်နိုင်လိမ့်မည် ဟု ယုံကြည်ကြောင်း ၎င်းက ပြောကြားသည်။

ယခုပြပွဲသည် နှစ်နိုင်ငံအကြား ဆွေးနွေးမှုများ ကျင်းပသည့် စင်္ကြံတစ်ခုအဖြစ် ဆောင်ရွက်ခဲ့ကြောင်း ရုရှားသမ္မတ ဗလာဒီမာပူတင်က ပြောကြားသည်။

ပြပွဲသည် အပြုသဘောဆောင်သော ရလဒ်များရရှိစေမည်ဖြစ်ပြီး နှစ်နိုင်ငံအကြား အပြန်အလှန် အကျိုးရှိသော ပူးပေါင်းဆောင်ရွက်မှု အလားအလာသစ်များ ဆောင်ကြဉ်းပေးမည်ဖြစ်ကာ  နှစ်နိုင်ငံ ပြည်သူများအတွက် အကျိုးကျေးဇူးများ ယူဆောင်လာပေးမည်ဟု ယုံကြည်ကြောင်း သမ္မတ ဗလာဒီမာပူတင်က ပြောကြားခဲ့သည်။

ကိုးကား-ဆင်ဟွာ

ဘာသာပြန် -စိုးသူရ