ငွေဆောင်လူရည်ချွန်စခန်းမှ ဧကာဒသမတန်းလူရည်ချွန်မောင်မယ်များ၊ လူရည်ချွန်ဟောင်းကြီးများ၏ ရင်တွင်းစကားသံများ

 ​​​​​​​       

                                

ဧရာဝတီတိုင်းဒေသကြီး ငွေဆောင်မြို့ လူရည်ချွန်စခန်း (ငွေဆောင်)၌ မြန်မာတစ်နိုင်ငံလုံးမှ ၂၀၂၅-၂၀၂၆ ပညာသင်နှစ် ဧကာဒသမတန်း လူရည်ချွန်မောင်မယ် ၁၃၃ ဦးနှင့် ကြီးကြပ်ဆရာ ဆရာမများသည် မေ ၆ ရက်မှ မေ ၉ ရက်အထိ ယာယီစခန်းချ၍ လူရည်ချွန်ဟောင်းကြီးများနှင့် ရင်းနှီးနွေးထွေးစွာတွေ့ဆုံခြင်း၊ ဒေသန္တရဗဟုသုတလေ့လာခြင်း၊ ကမ်းခြေတွင် အပန်းဖြေခြင်းတို့ကို ဆောင်ရွက်လျက်ရှိသည်။ အဆိုပါလူရည်ချွန်စခန်းတွင် ရောက်ရှိနေသည့် လူရည်ချွန်ဟောင်းကြီးများ၊ ၂၀၂၅-၂၀၂၆ ပညာသင်နှစ် ဧကာဒသမတန်း လူရည်ချွန်မောင်မယ်များ၏ ရင်တွင်းစကားသံများကို ပြည်သူများ သိရှိနိုင်ရန်အတွက် ဖော်ပြ အပ်ပါသည်။

မရွှေယွန်းမီ (နှစ်ထပ်ကွမ်း လူရည်ချွန်၊ ကယားပြည်နယ်)

သမီးကတော့ ကယားပြည်နယ် လွိုင်ကော်ခရိုင် လွိုင်ကော်မြို့ရဲ့ အမှတ်( ၁ )အခြေခံပညာ အထက်တန်းကျောင်းမှာ ပညာသင်ကြားနေတဲ့ ဧကာဒသမတန်း ကျောင်းသူ (နှစ်ထပ်ကွမ်း လူရည်ချွန် )မရွှေယွန်းမီဖြစ်ပါတယ်။ သမီးက အရင်က ငွေဆောင်ကို တစ်ခါမှ မရောက်ခဲ့ဖူးပါဘူးရှင့်။ ငွေဆောင် ကမ်းခြေကို ရောက်တဲ့အခါမှာ ကြည်လင်တဲ့ ပင်လယ်ရေနဲ့ ကမ်းခြေအလှကို တွေ့လိုက်ရတဲ့ အခါမှာတော့ အလွန်ကို အမောပြေသွားတယ် ၊ ခေါင်းမူးတာတွေလည်း ပျောက်သွားပါတယ်ရှင့်။ ပြီးတော့ ကြိုနေတဲ့ သူတွေကြောင့်လည်း တကယ် အားတက်ရပါတယ်။ သူတို့ကို ကြည့်ပြီးတော့ အလွန်ကို ပီတိဖြစ်မိပါတယ်ရှင့်။ ကမ်းခြေတွေကတော့ သမီး social media ပေါ်မှာ အများကြီး မြင်ဖူးတွေ့ဖူးပါတယ်။ အခြားနိုင်ငံက ကမ်းခြေတွေဆိုရင်လည်း တော်တော်များများ လှကြပါတယ်။ ဒါပေမဲ့ သမီးတို့ နိုင်ငံကလည်း အခြားနိုင်ငံတွေနဲ့ ယှဉ်နိုင်တယ်။ နိမ့်ကျမနေပါဘူး။ ငွေဆောင် ကမ်းခြေက အလွန်လှတဲ့ ကမ်းခြေ တစ်ခုဖြစ်ပါတယ်။ သမီးတို့ နိုင်ငံမှာလည်း အခုလိုမျိုး အလွန် လှပတဲ့ ကမ်းခြေတွေရှိတဲ့အတွက် ကိုယ့်မြန်မာနိုင်ငံကို လည်း အလွန်ဂုဏ်ယူမိပါတယ်။ သမီးတို့ လူရည်ချွန်တစ်ယောက်ဖြစ်လာပြီ ဆိုရင် နိုင်ငံတော်အတွက် ဘယ်အချိန်မဆို အဆင်သင့် ရှိနေပေးရပါမယ်။ သမီးတို့ လူရည်ချွန်တွေကို နိုင်ငံတော်က ယုံယုံကြည်ကြည်နဲ့ ရွေးချယ်ပေး ထားတာဖြစ်တဲ့အတွက် နိုင်ငံတော် အတွက်ဆိုရင် အမြဲအသင့်ရှိနေရပါမယ်။ သမီးအနေနဲ့လည်း နိုင်ငံတော်အတွက် ကျရာကဏ္ဍ ကနေပြီးတော့ အစွမ်းကုန်ကြိုးစား ပြီး ပံ့ပိုးပေးသွားမှာပါရှင့်။ သမီးရဲ့ ရည်မှန်းချက်ကတော့ Grade - 12 စာမေးပွဲဖြေဆိုပြီးသွားရင် နိုင်ငံခြားဘာသာမှာ အထူးပြုဘာသာ တစ်ရပ်ကို သင်ကြားပေးတဲ့ ကထိကတစ်ယောက် ဖြစ်ချင်ပါတယ်ရှင့်။

ဒေါက်တာအေးအေးမြင့်

(၁၉၇၇ ခုနှစ် လူရည်ချွန်၊

၁၉၆၄ - ၁၉၈၈ လူရည်ချွန်အဖွဲ့ )

ကျွန်မ နာမည်ကတော့ ဒေါက်တာ အေးအေးမြင့်ပါ။ ကျွန်မက ၁၉၇၇ခုနှစ်မှာ လူရည်ချွန် တစ်ယောက် ဖြစ်ခဲ့ပါတယ်ရှင်။ လူရည်ချွန် တစ်ယောက်ဖြစ်ဖို့ အတွက် စာတော်ရုံတစ်ခုတည်း မဟုတ်ဘဲ ဘက်စုံထူးချွန်မှရပါ မယ်။ စိတ်ဓာတ်၊ စည်းကမ်း၊ ကာယပညာ ကျွန်မတို့ခေတ်က အကုန်ဖြေရပါတယ်။ အဲဒါအပြင် လူရဲ့ စိတ်ထားကောင်းမွန်မှု၊ သွက်လက်ချက်ချာမှု အားလုံးကို ကြည့်ပြီး အဆင့်ဆင့်ဖြေဆိုပြီးမှ Outstanding Student ဆိုတဲ့ လူရည်ချွန်အဖြစ် ရွေးချယ်ခံရ တာဖြစ်ပါတယ်။ အဲဒီလို ရွေးချယ်ခံရပြီးတဲ့နောက် ပညာရေး တက္ကသိုလ်မှာ ငါးနှစ်အထိ ကျောင်းတက်ခဲ့ပါတယ်။ ပြီးတော့ ဆရာချွန်တွေကို မွေးထုတ်တဲ့ ဆရာမအဖြစ် အ.ထ.က( ၄)အလုံ မှာ အထက်တန်းပြနဲ့ ၁၀ နှစ်ကြာ အင်္ဂလိပ်စာ သင်ကြားပြသပေးခဲ့ပါတယ်။ မဟာပညာရေးဘွဲ့ပြီးတဲ့အခါမှာ ကျွန်မက ပညာရေး သုတေသနမှာ သုတေသန လက်ထောက်အဖြစ် ဆောင်ရွက်ရင်းနဲ့ ပညာရေးတက္ကသိုလ်ကို နည်းပြအဖြစ်နဲ့ ပြောင်းရွှေ့ခဲ့ပါ၏တယ်။ ပြောင်းရွှေ့ပြီး နည်းပြကနေ တစ်ဆင့် ပညာရေးတက္ကသိုလ်မှာ စာမေးပွဲဝင်ဖြေရင်းနဲ့ ဂျပန် ပညာတော်သင်ဆုကို ရပါတယ်။ ဂျပန်နိုင်ငံရဲ့ University  of  Tokyo ကနေ Ph.D Education ပညာရေး ပါရဂူဘွဲ့ကို ရရှိခဲ့ပါတယ်။ အဲ့ဒါက လူရည်ချွန်ဆိုတဲ့ လူငယ်ဘဝက စလိုက်ပြီးတော့ ကြိုးစားမှုအရှိန်ကြောင့် ကျွန်မက အသိပညာပိုင်း၊ အတတ်ပညာပိုင်း အောင်မြင်လာတဲ့အပြင် ပညာရေးတက္ကသိုလ်မှာ ပါမောက္ခချုပ်အဖြစ် ၂၀၁၉ ခုနှစ်အထိ ထမ်းဆောင်နိုင်ခဲ့ပါတယ်။ ကျွန်မက လူငယ်လူရည်ချွန်တွေကို ပြန်လည်မွေးထုတ်ပေးတဲ့ ဆရာချွန်တွေ၊ ဆရာမချွန်တွေကို မွေးထုတ်ပေးတဲ့ ကဏ္ဍမှာတာဝန် ယူခဲ့တဲ့သူ တစ်ဦးလည်းဖြစ်ပါတယ်။  ငွေဆောင်လူရည်ချွန်စခန်းမှာက Grade - 11 လူငယ်လေး ဖြစ်ကြတယ်ဆိုတော့ ကျွန်မရဲ့ စိတ်ထဲမှာ ငွေဆောင်လူရည်ချွန် စခန်းကို သွားပြီးတော့ အခြေခံပညာက လူရည်ချွန်တွေကို အားပေးချင်စိတ် ဂုဏ်ပြုချင်စိတ် ပေါ်လာတဲ့အတွက် ဒီနေ့ပွဲကို လာရောက်ရခြင်းပဲ ဖြစ်ပါတယ်ရှင့်။

မောင်ခန့်ညီရှင်းသန့်

(၂၀၂၅ - ၂၀၂၆ ပညာသင်နှစ်၊ ဧကာဒသမတန်းလူရည်ချွန်၊

ရှမ်းပြည်နယ်)

ကျွန်တော်ကတော့ ရှမ်း ပြည်နယ်(တောင်ပိုင်း) တောင်ကြီး ခရိုင်ကနေပြီးတော့ ၂၀၂၅ - ၂၀၂၆ ပညာသင်နှစ်မှာ လူရည်ချွန်ဆုကို ရရှိခဲ့တဲ့ ဧကာဒသမတန်း ကျောင်းသား မောင်ခန့်ညီရှင်းသန့် ဖြစ်ပါတယ်ခင်ဗျာ။ ကျွန်တော် လက်ရှိ ပညာသင်ယူနေတဲ့ ကျောင်းကတော့ အ.ထ.က( ၅) တောင်ကြီး ဖြစ်ပါတယ်ခင်ဗျာ။ ကျွန်တော့်ရဲ့ အစ်ကိုတွေအစ်မတွေ ကလည်း လူရည်ချွန်တွေဖြစ်တဲ့ အတွက် ငယ်ငယ်ကတည်းက လူရည်ချွန် ဖြစ်ချင်စိတ်က ကိန်းအောင်းနေခဲ့ပါတယ်။ Grade - 11 မှာတော့ ကျွန်တော့်ရဲ့ လူရည်ချွန် ဖြစ်ချင်စိတ်က အထမြောက်ခဲ့ပါ တယ်။ အတော်လည်းကြိုးစားခဲ့ရပါတယ်။ ကျွန်တော် Grade - 12 စာမေးပွဲ ဖြေဆိုပြီးသွားရင် ဆေးပညာကို ဆက်လက်သင်ယူမယ်လို့ ရည်ရွယ်ချက်ရှိပါတယ်။ဆရာဝန်တစ်ယောက်ဖြစ်လာရင် နိုင်ငံတော်အတွက်၊ ပြည်သူတွေ အားလုံးအတွက် အားထားရတဲ့ ဆရာဝန်ကောင်း တစ်ယောက် ဖြစ်စေရမယ်လို့ ခံယူထားပါတယ် ခင်ဗျာ။

မခင်နှင်းသက်စံ( ၂၀၂၅ - ၂၀၂၆ ပညာသင်နှစ်၊ ဧကာဒသမတန်း လူရည်ချွန်၊ ရခိုင်ပြည်နယ်)

သမီးကတော့ ရခိုင်ပြည်နယ် စစ်တွေခရိုင် စစ်တွေမြို့ အ.ထ.က (၂) စစ်တွေမှာ ပညာသင်ကြားနေတဲ့ ဧကာဒသမတန်း လူရည်ချွန် မခင်နှင်းသက်စံ ဖြစ်ပါတယ်ရှင့်။ ရခိုင်ပြည်နယ်ကဆိုရင် သမီး တစ်ယောက်တည်း ပါလာတာ ဖြစ်လို့ တိုင်းနဲ့ပြည်နယ်အသီးသီး က လူရည်ချွန်တွေနဲ့ တွေ့ဆုံခွင့်ရလို့ အလွန်ကို ပျော်ရွှင်မိပါတယ်။ ငွေဆောင် လူရည်ချွန်စခန်းကို လာခဲ့ရတဲ့ လမ်းတစ်လျှောက်မှာ လည်း အလွန်ကို ပျော်ရွှင်ခဲ့ရသလို ပေါင်းသင်းဆက်ဆံရေး skill လည်း တိုးတက်လာခဲ့ပါတယ်။ ငွေဆောင် လူရည်ချွန်စခန်းကို ရောက်တဲ့အခါမှာ ကြိုနေကြတဲ့ သူတွေကိုကြည့်ပြီး အလွန်ကို အမောပြေရပါတယ်။ လေ့လာရေး ခရီးသွားတဲ့အခါမှာ ပုသိမ်ထီး လုပ်ငန်းကို သေသေချာချာ လေ့လာသွားပါမယ်။ လေ့လာခဲ့တဲ့ အကြောင်းအရာတွေကို သူငယ်ချင်းတွေနဲ့ ပြန်လည်မျှဝေ သွားပါမယ်။ သမီးက ဆရာဝန် ကောင်းတစ်ယောက် ဖြစ်ချင်ပါတယ်။ နိုင်ငံခြားမှာ ​ပါရဂူဘွဲ့ရတဲ့ အထိ ဆေးကျောင်းတက်ပြီးတော့ မြန်မာနိုင်ငံကို ပြန်လာပြီး ပြည်သူ တွေကို ဆေးကုသပေးပါမယ်။ နိုင်ငံအတွက် အားထားရတဲ့ ဆရာဝန်ကောင်း တစ်ယောက် ဖြစ်စေရမယ်လို့ ရည်မှန်းထားပါတယ်ရှင့်။

တိုင်းဒေသကြီး(ပြန်/ဆက်)