ပါကစ္စတန်ဝန်ကြီးချုပ်က အမေရိကန်၏ Project Freedom ဆောင်ရွက်ချက်များ ခေတ္တရပ်ထားရန် ဆုံးဖြတ်ချက်ကို ကြိုဆို

 

အစ္စလာမာဘတ်   မေ   ၇

ပါကစ္စတန်ဝန်ကြီးချုပ် ရှာဘက် ရှာရစ်ဖ်က ဟော်မုဇ်ရေလက်ကြား၌ ဖြတ်သန်းသွားသော   သင်္ဘော များကို လမ်းကြောင်းလိုက်လံပြသပေးသည့် အမေရိကန်စစ်ရေးဆောင်ရွက်မှု (Project Freedom) အစီအစဉ်ကို ခေတ္တရပ်ထားရန် အမေရိကန်သမ္မတ ထရမ့်၏ဆုံးဖြတ်ချက်ကို ကြိုဆိုကြောင်း ယမန်နေ့က ပြောကြားသည်။

အဆိုပါလှုပ်ရှားမှုသည်  ဒေသတွင်းတင်းမာမှုများဖြေလျှော့ရန် အပြုသဘောဆောင်သော ခြေလှမ်း တစ်ရပ်ဖြစ်ကြောင်း ၎င်းက ဆက်လက်ပြောကြားသည်။

ပါကစ္စတန်နှင့် ဆော်ဒီအာရေးဗီးယားအပါအဝင် အခြားနိုင်ငံများ၏ တောင်းဆိုချက်အပေါ် အမေရိကန်သမ္မတ ဒေါ်နယ်ထရမ့်၏  တုံ့ပြန်မှုသည်  ဒေသတွင်းငြိမ်းချမ်းရေး၊ တည်ငြိမ်ရေးနှင့် ပြန်လည်သင့်မြတ်ရေး အရှိန်အဟုန်မြင့်မားလာစေရန်အတွက် ကောင်းမွန်သောလမ်းကြောင်းတစ်ခု ဖြစ်ကြောင်း  ဝန်ကြီးချုပ် ရှာဘက် ရှာရစ်ဖ်က  ပြောကြားသည်။

တွေ့ဆုံဆွေးနွေးပွဲများကျင်းပခြင်း၊ သံခင်းတမန်ခင်း လမ်းကြောင်းမှတစ်ဆင့် ပဋိပက္ခများကို    ထိန်းထိန်းသိမ်းသိမ်း ဆောင်ရွက်ရန်နှင့် ငြိမ်းချမ်းစွာ ထိတွေ့ဆက်ဆံမှုသည် ရေရှည်တည်ငြိမ်မှု အတွက် မရှိမဖြစ်လိုအပ်ကြောင်း ၎င်းက ပြောကြားသည်။

အဆိုပါ Project Freedom ဆောင်ရွက်ချက်များကို  ရပ်တန့်ထားရန်နှင့် ဝါရှင်တန်နှင့်   တီဟီရန် ကြား ငြိမ်းချမ်းရေးသဘောတူညီချက်ဆိုင်ရာ ဆွေးနွေးမှုများကို ဆက်လက်စောင့်ကြည့်ရန်   လိုအပ် ကြောင်း သမ္မတထရမ့်က ယမန်နေ့တွင် ပြောကြားခဲ့သည်။

ကိုးကား - အင်န်အိတ်ချ်ကေ

ဘာသာပြန် - အောင်ကျော်ကျော်