တောင်ကိုရီးယားသွင်းကုန်ပြပွဲ ၂၀၂၆ တွင် မြန်မာပြခန်း ပါဝင်ပြသ

 

ဆိုးလ် ဇွန် ၂၆

 

တောင်ကိုရီးယားသွင်းကုန်ပြပွဲ (Korea Import Expo 2026 - KIE 2026) ကို ဇွန် ၂၃ ရက်မှ ၂၅ ရက်အထိ တောင်ကိုရီးယားနိုင်ငံ ဆိုးလ်မြို့ရှိ COEX (Hall B) ၌ ကျင်းပရာ မြန်မာသံရုံး ဆိုးလ်မြို့၏ အစီအစဉ်ဖြင့် မြန်မာပြခန်း (Myanmar Pavilion) ပါဝင်ပြသပြီး ကုန်သွယ်မှု၊ ရင်းနှီးမြှုပ်နှံမှုနှင့် ခရီးသွားလာမှု မြှင့်တင်ရေးဆိုင်ရာလုပ်ငန်းများကို ဆောင်ရွက်ခဲ့သည်။

 

KIE 2026 ပြပွဲကို တောင်ကိုရီးယားနိုင်ငံ ကုန်သွယ်မှု၊ ရင်းနှီးမြှုပ်နှံမှုနှင့် စွမ်းအင်ဝန်ကြီးဌာန၊ Korea Trade-Investment Promotion Agency (KOTRA) နှင့် ဆိုးလ်မြို့ရှိ နိုင်ငံခြားသံရုံးများ၏ ပူးပေါင်းပါဝင်မှုဖြင့် Korea Importers Association (KOIMA) က ကြီးမှူးကျင်းပခဲ့ခြင်းဖြစ်သည်။

 

ပြပွဲဖွင့်ပွဲအခမ်းအနားကို ဇွန် ၂၃ ရက် နံနက်ပိုင်းတွင် ကျင်းပရာ KOIMA ဥက္ကဋ္ဌ၊ ဆိုးလ်မြို့ရှိ သံရုံးများမှ သံအမတ်ကြီးများနှင့် သံရုံးတာဝန်ခံများ၊ ASEAN-Korea Centre (AKC) အတွင်းရေးမှူးချုပ်၊ AKC မှတာဝန်ရှိသူများ၊ စီးပွားရေးလုပ်ငန်းရှင်များနှင့်အတူ မြန်မာသံရုံး ဆိုးလ်မြို့မှ သံရုံး ယာယီတာဝန်ခံ/ သံအမတ်ကြီး ဦးမျိုးမြင့်မောင် တက်ရောက်သည်။ KIE 2026 ပြပွဲတွင် ကမ္ဘာ့နိုင်ငံပေါင်း ၃၀ ကျော်မှ နိုင်ငံကိုယ်စားပြု ပြခန်းများ၊ ကုမ္ပဏီများနှင့် ကုန်သွယ်မှုမြှင့်တင်ရေးအဖွဲ့အစည်းစုစုပေါင်း ၅၅ ခုတို့က ပြခန်းပေါင်း ၁၆၆ ခန်းဖြင့် ပါဝင်ပြသသည်။

 

မြန်မာပြခန်းကို ပြခန်းအမှတ် F06 ၌ ဖွင့်လှစ်ပြသပြီး မြန်မာ့ပေါ်ဆန်းမွှေးဆန်၊ ကော်ဖီ၊ ပဲအမျိုးမျိုး၊ အသင့်စား စားသောက်ကုန်များ၊ ထောပတ်သီးဆီ (Avocado Extra Virgin Oil)နှင့် မြန်မာ့လက်မှုပစ္စည်းများဖြစ်သည့် ယွန်းထည်နှင့် ကြိမ်ထည်ပစ္စည်းများကို ခင်းကျင်းပြသသည်။ ထို့ပြင် မြန်မာနိုင်ငံ၏ ခရီးသွားဆွဲဆောင်မှုဒေသများနှင့် ခရီးစဉ်များကို Digital Display ဖြင့် ပြသထားရာ စိတ်ပါဝင်စားစွာ ကြည့်ရှုအားပေးခဲ့ကြကြောင်း သိရသည်။

သတင်းစဉ်