ထိုင်းနိုင်ငံ၌ ဉာဏ်ရည်တုနည်းပညာအခမဲ့ သုံးစွဲမှုမြှင့်တင်ဆောင်ရွက်

 

ဗန်ကောက်    ဩဂုတ်    ၃၁ 

ထိုင်းနိုင်ငံသည်  နိုင်ငံအတွင်း  ဉာဏ်ရည်တုနည်းပညာအခမဲ့သုံးစွဲမှုမြှင့်တင်ရေးစီမံကိန်းတစ်ခုအား  ဩဂုတ်  ၃၁  ရက်တွင် စတင်ဆောင်ရွက်ခဲ့ကြောင်း သိရသည်။

TH-AI Passport” project ဟု အမည်ရသည့် အဆိုပါစီမံကိန်းသည်  အသက် ၁၅ နှစ်နှင့်အထက်ရှိ နိုင်ငံသား  ငါးသန်းအား ဉာဏ်ရည်တုနည်းပညာ အခမဲ့သုံးစွဲမှုမြှင့်တင်ရန် အစိုးရက ကန်ဒေါ်လာ ၄၈ သန်းအကုန်အကျခံ ဆောင်ရွက်သည့်  စီမံကိန်းဖြစ်သည်။ လုပ်ငန်းပေါင်း ၁၄ ခုမှ ဉာဏ်ရည်တုနည်းပညာ မော်ဒယ် ၃၀ ကို သုံးစွဲနိုင်မည်ဖြစ်သည်။  အဆိုပါဝန်ဆောင်မှုအား အသုံးပြုရန်အတွက် နိုင်ငံသား ၁ ဒသမ ၃ သန်းက ကြိုတင်စာရင်းပေးခဲ့ကြောင်းနှင့် အဆိုပါစီမံကိန်းအရ   နိုင်ငံသားများဉာဏ်ရည်တု နည်းပညာသုံးစွဲမှုမြှင့်တင်ရေး ဆောင်ရွက်နိုင်မည်ဟုယုံကြည်ကြောင်း အစိုးရကပြောကြားသည်။ Microsoft AI Economy Institute၏  အစီရင်ခံစာအရ ထိုင်းနိုင်ငံ၏ ဉာဏ်ရည်တုနည်းပညာ အသုံးပြုမှုနှုန်းသည် ဇန်နဝါရီလမှ   မတ်လအတွင်း  ၁၂ ဒသမ ၄ ရာခိုင်နှုန်းအထိ   မြင့်တက်လာသော်လည်း ကမ္ဘာ့ပျမ်းမျှသုံးစွဲမှုရာခိုင်နှုန်းထက် နိမ့်ကျနေကြောင်း သိရသည်။

အာရပ်စော်ဘွားများပြည်ထောင်စုသည် ကမ္ဘာပေါ်တွင် AI အသုံးပြုမှုအမြင့်ဆုံးအဆင့် ၇၀ ဒသမ ၁ ရာခိုင်နှုန်းဖြင့် ပထမနေရာတွင်  ရပ်တည်နေပြီး စင်ကာပူသည် ၆၃ ဒသမ ၄ ရာခိုင်နှုန်းဖြင့် ဒုတိယနေရာတွင်ရှိနေကာ   နော်ဝေသည်  ၄၈ ဒသမ ၆ ရာခိုင်နှုန်းဖြင့် တတိယနေရာတွင် ရှိနေသည်။

ကိုးကား - အင်န်အိတ်ချ်ကေ

ဘာသာပြန် - စိုးသူရ