မဂွေဇ-ခေါင်လန်ဖူး ၆၅ မိုင် ၄ ဖာလုံ လမ်းဖောက်လုပ်ခြင်းစီမံကိန်း၊ ခေါင်လန်ဖူးမြို့သို့ တစ်ကြောင်းထိုး ကားလမ်း ဖောက်လုပ်ရောက်ရှိ

 

နေပြည်တော် စက်တင်ဘာ ၅

 

ခေါင်လန်ဖူးဒေသသည် မြန်မာနိုင်ငံ၏ မြောက်ဖျားပိုင်းတွင် တည်ရှိပြီး ဆိုးရွားသော ရာသီဉတုနှင့် မြေမျက်နှာပြင် ခက်ခဲကြမ်းတမ်းကာ မြင့်မားမတ်စောက်​သော တောင်ပေါ်ဒေသ၊ ​ကျောက်​တောင်/ ကျောက်ကမ်းပါးယံနှင့် မြစ်ချောင်းလျှိုမြောင်များ ပေါများသည့်် ဒေသဖြစ်ခြင်း၊ ​ရေခဲတောင်နှင့် ဆီးနှင်းများကြောင့် စိုက်ပျိုးမြေနည်းပါးခြင်း စသည်တို့ကြောင့် ​ခေါင်လန်ဖူးဒေသရှိ ဒေသခံပြည်သူများသည် နှစ်စဉ် စားနပ်ရိက္ခာ ရှားပါး၊ ပြတ်တောက်လေ့ရှိသဖြင့် နိုင်ငံ​တော်နှင့် တပ်မတော်က စားနပ်ရိက္ခာနှင့် အ​ခြေခံစား​သောက်ကုန်ပစ္စည်းများကို အခက်အခဲဖြစ်ပေါ်ချိန်တွင် ရဟတ်ယာဉ်များဖြင့် ပို့ဆောင်ထောက်ပံ့ ကူညီပေးနေရသော ​ဒေသဖြစ်သည်။

ခေါင်လန်ဖူးနှင့် အနီးပတ်ဝန်းကျင်တွင် နေထိုင်ကြသည့် ဒေသခံပြည်သူများအနေဖြင့် ပညာရေး၊ ကျန်းမာရေး၊ လူမှုစီးပွားရေးကိစ္စရပ်များအတွက် ပူတာအိုသို့ မဖြစ်​မနေ သွားရောက်ရန် လိုအပ်ပါက  ​ခေါင်လန်ဖူးမှ မဂွေဇအထိ ၆၅ မိုင်အကွာအဝေးအား ခြေလျင်ခရီး၊ ဝန်တင်လား/မြင်း များဖြင့် ၈ ညအိပ် ၉ ရက်ခန့်ဖြင့်လည်း​ကောင်း၊ မ​ဂွေဇမှ ပူတာအိုအထိ ၆၇ မိုင်အား ဆိုင်ကယ်/ကား များဖြင့်် ၂ ရက်ခန့် ဆက်လက်သွားရောက်ကြရသဖြင့် ခရီးလမ်းတစ်လျှောက်တွင် အသက်အန္တရာယ် အထိ အခက်ခဲ​ပေါင်း များစွာတွေ့ကြုံရပြီး အချိန်နှင့်ကုန်ကျစားရိတ် များပြားခြင်းများကို ခံစားခဲ့ကြရ သည်။

သို့ဖြစ်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ လမ်းညွှန်မှုဖြင့် နယ်စပ်ရေးရာဝန်ကြီးဌာနက ၂၀၁၅ ခုနှစ်မှ စတင်ပြီး မဂွေဇ-ခေါင်လန်ဖူးလမ်းစီမံကိန်းအတွက် မြေပြင်အနေအထား၊ သဘာဝရာသီဉတု အ​ခြေအ​နေတို့ အပါအဝင် အခြေခံအချက်အလက်များကို ​ကွင်းဆင်းလေ့လာသုံးသပ်ကာ နိုင်ငံ​တော်အစိုးရသို့တင်ပြ၍ လုပ်ငန်းခွင့်ပြုချက်နှင့် ရန်ပုံငွေ လျာထားရေးဆိုင်ရာ ကိစ္စရပ်များကို စီမံ​ဆောင်ရွက်ခဲ့သည်။

မဂွေဇ-ခေါင်လန်ဖူး ကားလမ်း​ဖောက်လုပ်​နိုင်​ရေးအတွက် ၂၀၁၆ ခုနှစ် ဇွန်လတွင် ခွင့်ပြုချက် ရရှိပြီးနောက် နယ်စပ်ရေးရာဝန်ကြီးဌာနမှ အင်ဂျင်နီယာများ၊ တပ်မ​တော်အင်ဂျင်နီယာတပ်ရင်းမှ အရာရှိ/စစ်သည်များ၊ ဌာနေပြည်သူ့စစ်များ ပူးပေါင်း၍ Feasibility survey ​ဆောင်ရွက်ခြင်း၊ စီမံကိန်း​ရေးဆွဲခြင်း၊ လုပ်ငန်းများကို အသေးစိတ် ​ပေါင်းစပ်ညှိနှိုင်းခြင်းများ ဆောင်ရွက်ခဲ့ကြပြီး မဂွေဇ-​ခေါင်လန်ဖူး ၆၅ မိုင် ၄ ဖာလုံ လမ်းကို  အပိုင်း ၄ ပိုင်းခွဲ၍ ၂၀၁၆ ခုနှစ် ဒီဇင်ဘာလတွင် စတင် ​ဆောင်ရွက်ခဲ့သည်။

မဂွေဇမှ ငါ့လုံဒမ်းအထိ ၂၅ မိုင် ၄ ဖာလုံကို အပိုင်း(၁)အဖြစ် အကောင်အထည်ဖော် ဆောင်ရွက်ခဲ့ရာ ကျောက်လမ်း ၂၅ မိုင် ၄ ဖာလုံ၊ တံတားကြီး/ငယ် ၂၀ စင်း၊  Box Culvert ၇၅ စင်း၊ ကျောက်စီ​ရေမြောင်း ၅၅၀၀ ​ပေနှင့် အခြားလိုအပ်သည့် မြေထိန်းနံရံများ၊ ရေ​ကျော်များကို ရာနှုန်းပြည့် အကောင်အထည်ဖော် ဆောင်ရွက်ခဲ့ပြီးဖြစ်သည်။

ငါ့လုံဒမ်းမှ လုံးတုံဗိုလ်တဲအထိ  ၁၀ မိုင်ကို အပိုင်း(၂)အဖြစ် ဆက်လက်အ​ကောင်အထည် ဖော်​ဆောင်ရွက်ခဲ့ပြီး အဆိုပါလမ်းပိုင်းတွင် မဂွေဇ-ခေါင်လန်ဖူးလမ်း၏ အခက်အခဲဆုံးအပိုင်းဖြစ်​သော ပင်လယ်ရေမျက်နှာပြင်မှ အမြင့််ပေ ၇၇၀၀ ​ကျော်ရှိသည့် ဆန်းလွတ်ချက်တောင်ကြားလမ်း ကျောက်​တောင်အပိုင်း ပါဝင်သဖြင့်် နယ်စပ်ရေးရာဝန်ကြီးဌာနမှ အင်ဂျင်နီယာများ၊ စစ်မြေပြင် အင်ဂျင်နီယာတပ်ရင်းမှ မိုင်းဖောက်ခွဲရေးကျွမ်းကျင်စစ်သည်များသည် ဒေသခံပြည်သူတို့၏ ပူးပေါင်း ကူညီမှုကို ရယူ၍ ကြမ်းတမ်းခက်ခဲသည့်် ရာသီဉတုနှင့် မြေ​အနေအထားအကြားမှ  စွမ်းစွမ်းတမံ ကြိုးပမ်းဆောင်ရွက်ခဲ့ရာတွင် တစ်ရက်လျှင် ပေ ၂၀ ခန့်သာ ဖောက်လုပ်နိုင်သည့်် နေ့ရက်များစွာကို လည်း ရင်ဆိုင်ကြုံတွေ့ခဲ့ကြရကြောင်း သိရှိရသည်။ အဆိုပါလမ်းပိုင်းတွင် ​ကျောက်လမ်း ၁၀ မိုင်၊ Box Culvert ၅၀ စင်း၊ ကျောက်စီ​ရေမြောင်း ၄၀၀၀ ​ပေတို့ကို ရာနှုန်းပြည့် အကောင်အထည်ဖော် ဆောင်ရွက်ခဲ့ပြီးဖြစ်သည်။

လမ်းစီမံကိန်းအပိုင်း(၂)ဖြစ်သည့် ဆန်းလွတ်ချက် ကျောက်တောင်ကို ခက်ခက်ခဲခဲ ဖြတ်သန်း ​ဖောက်လုပ်​နေစဉ်ကာလအတွင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင် ကိုယ်တိုင် လုပ်ငန်းခွင်သို့ရောက်ရှိ စစ်ဆေးလမ်းညွှန်ချက်အရ လမ်း​ဖောက်လုပ်ခြင်းလုပ်ငန်း ဆောလျင်စွာပြီးစီးနိုင်​ရေးအတွက် တပ်မတော်ရဟတ်ယာဉ်များဖြင့် အပေါ့စား ယန္တရားများကို ခေါင်လန်ဖူးသို့ ပို့ဆောင်၍ ​ခေါင်လန်ဖူးမှ မ​ဂွေဇဘက်သို့ တစ်ကြောင်းထိုး လမ်း​ဖောက်လုပ်ခြင်းကို အောင်မြင်စွာ ဆောင်ရွက်နိုင်ခဲ့ခြင်းကြောင့် လမ်းစီမံကိန်းအချိန်ကာလကို များစွာလျှော့ချနိုင်ခဲ့ပါသည်။

လုံးတုံဗိုလ်တဲမှ ဆီဆုံအထိ ၁၀ မိုင် ၄ ဖာလုံကို အပိုင်း(၃)အဖြစ် အကောင်အထည်ဖော် ဆောင်ရွက် ခဲ့ရာတွင် သဘာဝအတားအဆီးဖြစ်သည့် ရေစီးကြမ်းတမ်းသော မေခမြစ်ကို လမ်းဖောက်လုပ်​ရေး စီမံကိန်းတွင်  အသုံးပြုသည့်   ယာဉ်/ ယန္တရားများ၊ ​  ကျောက်ဖောက်စက်များ၊ စက်ဆီ/​ချောဆီများ၊ ယမ်းနှင့် ဆက်စပ်ပစ္စည်းများ ဖြတ်ကျော်နိုင်ရန် ကူးတို့ဖောင်များ သီးသန့် ပြုလုပ်​ဆောင်ရွက်ပြီး ခက်ခက်ခဲခဲ ဖြတ်သန်းပို့ဆောင် ပေးခဲ့ကြရ​ကြောင်း သိရှိရသည်။ အဆိုပါ လမ်းပိုင်းတွင် မြေလမ်း ၁၀မိုင် ၄ဖာလုံအနက် ​ကျောက်လမ်း ၈ မိုင် ၄ ဖာလုံခင်းပြီးဖြစ်၍ တံတားကြီး/ငယ် စုစုပေါင်း ၇ စင်း၊ Box Culvert ၄၀ စင်း၊ ကျောက်စီ​ရေမြောင်း ၉၄၉၅​ ပေတို့ကို ရာနှုန်းပြည့် အကောင်အထည်ဖော် ​ဆောင်ရွက်ခဲ့ပြီးဖြစ်သည်။

ဆီဆုံမှ ခေါင်လန်ဖူးအထိ ၁၉ မိုင် ၄ ဖာလုံကို နောက်ဆုံးပိုင်း၊ အပိုင်း(၄)အဖြစ် ဆောင်ရွက် လျက်ရှိရာ ၃၄ ပေအကျယ် ​မြေလမ်း ၁၂ မိုင်၊ ၁၃ ပေအကျယ် တစ်​ကြောင်းထိုးမြေလမ်း ၇ မိုင် ၄ ဖာလုံ၊ တံတားကြီး ၂ စင်းတို့ကို အကောင်အထည်ဖော် ဆောင်ရွက်ခဲ့ပြီးဖြစ်၍ မဂွေဇမှ ခေါင်လန်ဖူး အထိ ၆၅ မိုင် ၄ ဖာလုံ ရှည်လျားပြီး ​ဒေသခံပြည်သူများက အိပ်မက်လမ်းဟု တင်စားခေါ်ဆိုခဲ့ကြသည့် လမ်းသည်  စတင်​ဖောက်လုပ်ချိန်မှ ၄ နှစ်နှင့် ၈ လ အကြာ ၂၀၂၁ ခုနှစ် စက်တင်ဘာလ ၃ ရက်​နေ့တွင် ရည်မှန်းချက်ဖြစ်​သော ခေါင်လန်ဖူးမြို့သို့ အောင်မြင်စွာ ပေါက်ရောက်ခဲ့ခြင်းဖြစ်သည်။

ဆက်လက်ဆောင်ရွက်ရန် လိုအပ်သည့် တစ်​ကြောင်းထိုး မြေသားလမ်း ၇ မိုင် ၄ ဖာလုံကို လမ်းတာချဲ့ခြင်း၊ တံတားများ၊ Box Culvert များ၊ မြေထိန်းနံရံများ၊ ကျောက်စီရေမြောင်းများကို လာမည့် ပွင့််လင်းရာသီတွင်လည်းကောင်း၊ လမ်းအဆင့်မြှင့်တင်ခြင်းနှင့် ခေါင်လန်ဖူးမြို့ ဖွံ့ဖြိုး တိုးတက်ရေးလုပ်ငန်းစဉ်များကို နှစ်အလိုက် ရန်ပုံငွေလျာထား၍လည်းကောင်း ဆက်လက် အကောင် အထည်ဖော် ဆောင်ရွက်သွားမည်ဖြစ်ကြောင်း နယ်စပ်ရေးရာဝန်ကြီးဌာနမှ သတင်းရရှိသည်။

(သတင်းစဉ်)