တရုတ်နိုင်ငံမှ ရှာဖွေကယ်ဆယ်ရေးအဖွဲ့ဝင်များနှင့် ​အိန္ဒိယနိုင်ငံမှလှူဒါန်းသည့်​ကူညီကယ်​ဆယ်​ရေးပစ္စည်းများ​ရောက်​ရှိ

 

ရန်​ကုန်​ မတ်​ ၂၉

 

မတ်​ ၂၈ ရက်​ ဒေသစံ​တော်​ချိန် မွန်းလွဲ ၁၂ နာရီ ၅၁ မိနစ်ခန့်တွင်​ မန္တ​လေး​မြေငလျင်​စခန်းမှ အ​ရှေ့​မြောက်​ဘက်​ ၂၁ ကီလိုမီတာခန့် အကွာအ​ဝေးကို ဗဟိုပြုပြီး အင်​အား ၇ ဒသမ ၇ ရစ်​(ခ်)​တာစကေးအဆင့်​ရှိ ငလျင်​လှုပ်​ခတ်​ခဲ့ရာ ငလျင်​လှုပ်​ခတ်​ခဲ့မှု​ကြောင့်​ စစ်​ကိုင်းတိုင်း​ဒေသကြီး၊ မန္တ​လေးတိုင်း​ဒေသကြီး၊ မ​ကွေးတိုင်း​ဒေသကြီး၊ ရှမ်းပြည်​နယ်​အ​ရှေ့​မြောက်​ဒေသ၊​ နေပြည်​တော်​ကောင်စီနယ်မြေနှင့်​ ပဲခူးတိုင်းဒေသကြီးတို့ရှိ ငလျင်​ဒဏ်​သင့်​သည့်​နေရာ​ဒေသများကို အမျိုးသားသဘာဝဘေး အန္တရာယ်​ဆိုင်​ရာစီမံခန့်​ခွဲမှု​ကော်​မတီမှ အ​ရေး​ပေါ်အ​ခြေအ​နေအဖြစ်​ ကြေညာခဲ့သည်​။ 

 

ငလျင်​ဒဏ်​သင့်​ဒေသများ၌ ပျက်​စီးဆုံးရှုံးမှုများအား နိုင်​ငံ​တော်​အစိုးရအ​နေဖြင့်​ ကူညီကယ်​ဆယ်​ရေးလုပ်​ငန်းများ အချိန်နှင့်တစ်ပြေးညီ ဆောင်​ရွက်​လျက်​ရှိပြီး ပြည်​ပမှ လူသားချင်းစာနာ​ထောက်​ထားမှုဆိုင်​ရာ အကူအညီများရရှိ​စေ​ရေးအတွက်​ လမ်းဖွင့်​ပေးထားပြီဖြစ်​ရာ တရုတ်​ပြည်​သူ့သမ္မတနိုင်ငံအစိုးရက မြန်​မာနိုင်​ငံရှိ ငလျင်​ဒဏ်​သင့်​ဒေသများ တွင် ​ကူညီကယ်​ဆယ်​ရေးလုပ်ငန်းများ ဆောင်ရွက်နိုင်ရေးအတွက် ကယ်ဆယ်ရေးအဖွဲ့ဝင် ၃၇ ဦးနှင့် ရှာဖွေကယ်ဆယ် ရေး အထောက်အကူပြုပစ္စည်းများ တင်ဆောင်လာသောလေယာဉ်သည် မတ်​ ၂၉ ရက်​ နံနက်​ ၇ နာရီ ၇ မိနစ်ခန့်တွင်​ ရန်​ကုန် အပြည်ပြည်​ဆိုင်​ရာလေဆိပ်​သို့​ ရောက်​ရှိလာရာ ရန်​ကုန်​တိုင်း​ဒေသကြီးဝန်​ကြီးချုပ်​ ဦးစိုးသိန်း၊ တိုင်းဒေသကြီး ဝန်ကြီးများနှင့် တာဝန်​ရှိသူများ၊ မြန်မာနိုင်ငံတရုတ်သံရုံးမှ First Secretary ဖြစ်သူ Mr. Zhu Feng နှင့် တာဝန်ရှိသူများ၊ လူမှုဝန်ထမ်း၊ ကယ်ဆယ်​ရေးနှင့် ပြန်လည်နေရာချထားရေးဝန်ကြီးဌာန ဘေးအန္တရာယ်စီမံခန့်ခွဲမှုဦးစီးဌာန ညွှန်ကြား ရေးမှူး ဦးသန်းစိုးနှင့် တာဝန်ရှိသူများက ကြိုဆိုကြသည်။

 

ယနေ့ ရောက်ရှိလာသော တရုတ်​ပြည်​သူ့သမ္မတနိုင်​ငံမှ ကယ်ဆယ်ရေးအဖွဲ့ဝင်များသည်​ ရန်ကုန်တိုင်းဒေသကြီးအစိုးရ အဖွဲ့မှ စီစဉ်ထားရှိသည့် မော်တော်ယာဉ်များဖြင့် ယနေ့နံနက်ပိုင်းက နေပြည်တော်သို့ ဆက်လက်ထွက်ခွာသွားကြသည်။

 

ဆက်​လက်၍ ယ​နေ့နံနက်​ ၈ နာရီ မိနစ် ၄၀ တွင်​ အိန္ဒိယနိုင်​ငံအစိုးရက မြန်​မာနိုင်​ငံရှိ ငလျင်​ဒဏ်​သင့်​ပြည်​သူများ အတွက်​ ကူညီကယ်​ဆယ်​ရေး ပစ္စည်းများတင်​ဆောင်​လာ​သော​ လေယာဉ်​သည်​ ရန်​ကုန်​အပြည်​ပြည်​ဆိုင်​ရာ​လေဆိပ်​သို့​ ရောက်​ရှိလာရာ တာဝန်​ရှိသူတို့က ကြိုဆိုကြသည်​။ 

 

 အိန္ဒိယနိုင်​ငံအစိုးရက မြန်​မာနိုင်​ငံရှိ ငလျင်​ဒဏ်​သင့်​ပြည်​သူများအတွက်​ ပေးပို့လိုက်​သည့်​ ကူညီကယ်​ဆယ်​ရေးပစ္စည်း များကို မြန်​မာနိုင်​ငံဆိုင်​ရာ အိန္ဒိယနိုင်​ငံသံအမတ်​ကြီးက လွှဲ​ပြောင်း​ပေးအပ်​ရာ ရန်​ကုန်​တိုင်း​ဒေသကြီးဝန်​ကြီးချုပ်​ ဦးစိုးသိန်းက လက်​ခံရယူသည်​။

 

အိန္ဒိယနိုင်​ငံအစိုးရက ပေးပို့လှူဒါန်းသည့်​ ကယ်​ဆယ်​ရေးပစ္စည်းများမှာ ခေါက်ဆွဲခြောက်၊ Solar မီးအိမ်၊ မီးဖိုချောင်သုံး ပစ္စည်း၊ တစ်ကိုယ်ရေသုံးပစ္စည်း၊ မီးစက်၊ ဆေးရုံသုံးပစ္စည်း၊ တာပေါ်လင်၊ စောင်၊ ခြင်ထောင်၊ ပလတ်စတစ်အိတ်မျိုးစုံတို့ ဖြစ်ကြောင်း သိရသည်။

ဇွဲထက်ကို(ပြန်/ဆက်)