ယခုနှစ် ဝင်ဘယ်ဒန်ပြိုင်ပွဲ၏ ဆုကြေးကို ၇ ရာခိုင်နှုန်း တိုးမြှင့်သွားမည်

ယခုနှစ် ဝင်ဘယ်ဒန်ပြိုင်ပွဲ၏ စုစုပေါင်း ဆုကြေးငွေကို ၇ ရာခိုင်နှုန်း တိုးမြှင့်သွားမည်ဖြစ်ပြီး စံချိန်တင် ပေါင် ၅၃ ဒသမ ၅ သန်းအထိ ရောက်ရှိသွားမည်ဖြစ်ကြောင်း သိရသည်။ 

ဆုကြေးငွေသည် ၂၀၂၄ ခုနှစ်တွင် ပေါင်သန်း ၅၀ ရှိကြောင်း၊ ယင်းမှာ ၂၀၁၅ ခုနှစ်ကထက် နှစ်ဆခန့် မြင့်တက်လာကြောင်း သိရ သည်။

ပြီးခဲ့သည့်နှစ် အမျိုးသားတစ်ဦးချင်းပြိုင်ပွဲတွင် ကားလို့စ်အယ်ကာရက်ဇ်နှင့် အမျိုးသမီးတစ်ဦးချင်း ပြိုင်ပွဲတွင် ဘာဘိုရာခရီစီကိုဗာတို့သည် အသီးသီးဗိုလ်စွဲခဲ့ကြပြီး ပေါင် ၂ ဒသမ ၇ သန်းစီ ဆုကြေး ရရှိခဲ့သည်။ ယခုနှစ်တွင် အနိုင်ရဗိုလ်စွဲမည့်သူအနေဖြင့်  ၁၁ ရာခိုင်နှုန်းတိုးကာ ပေါင် သုံးသန်းအထိ ရရှိမည်ဖြစ်သည်။

နှစ်ယောက်တွဲပြိုင်ပွဲတွင်   အနိုင်ရရှိမည့်သူများအနေဖြင့်  လေးရာခိုင်နှုန်းတိုးကာ ပေါင် ၆၈၀၀၀၀ ရရှိမည် ဖြစ်သည်။ ယခုနှစ် ဝင်ဘယ်ဒန်ပြိုင်ပွဲကို လာမည့် ဇွန် ၃၀ ရက်မှ ဇူလိုင် ၁၃ ရက် အထိ ကျင်းပသွားမည် ဖြစ်သည်။

မိုးဇက် - စုစည်းရေးသားသည်