မင်းလှမြို့နယ်ရှိ ရေနံဓာတုဗေဒစက်ရုံစု (သံပရာကန်) ၌ ယမန်နေ့နံနက်ပိုင်းက မီးလောင်ကျွမ်းမှု ဖြစ်ပွားခဲ့ရာ အချိန်မီ မီးငြှိမ်းသတ်နိုင်ခဲ့ပြီး လက်ရှိအချိန်တွင် ကုန်ထုတ်လုပ်မှုလုပ်ငန်းများ ပုံမှန်ပြန်လည် လည်ပတ်လျက်ရှိ

နေပြည်တော် ဇန်နဝါရီ ၂၄

 

မကွေးတိုင်းဒေသကြီး မင်းလှမြို့နယ်ရှိ ရေနံဓာတုဗေဒစက်ရုံစု (သံပရာကန်) ၌ ယမန်နေ့နံနက် ၆ နာရီ ၅ မိနစ်ခန့်တွင် စတင်မီးလောင်ကျွမ်းမှုဖြစ်ပွားခဲ့ရာ စက်ရုံရှိ မီးသတ်ဝန်ထမ်းများနှင့် စက်ရုံ ဝန်ထမ်းများ၊ တပ်နယ်၊ ခရိုင်၊ မြို့နယ်များရှိ မီးသတ်တပ်ဖွဲ့ဝင်များနှင့် အတူပူးပေါင်းပြီး ဝိုင်းဝန်း ငြှိမ်းသတ်နိုင်ခဲ့မှုကြောင့် ယင်းနေ့နံနက် ၇ နာရီတွင် မီးငြှိမ်းသတ်နိုင်ပြီး လက်ရှိအချိန်တွင် ကုန်ထုတ်လုပ်မှုလုပ်ငန်းများ ပုံမှန် ပြန်လည် လည်ပတ်လျက်ရှိသည်။

 

အဆိုပါမီးလောင်ကျွမ်းမှုဖြစ်စဉ် ဖြစ်ပေါ်ခဲ့ခြင်းကို စွမ်းအင်ဝန်ကြီးဌာန ဒုတိယဝန်ကြီးနှင့် တာဝန် ရှိသူများက မင်းလှမြို့နယ်ရှိ မြန်မာ့ရေနံဓာတုဗေဒလုပ်ငန်း၏ ရေနံဓာတုဗေဒစက်ရုံစု (သံပရာကန်) သို့ မွန်းလွဲပိုင်းတွင် သွားရောက်ကြည့်ရှုစစ်ဆေးသည်။

 

မီးလောင်ကျွမ်းမှုဖြစ်စဉ် ဖြစ်ပွားခဲ့သည့် ရေနံစိမ်းလက်ခံသိုလှောင်ကန် အခြေအနေများကို စက်ရုံမှူး က တင်ပြခဲ့ရာ သိုလှောင်ကန်နံရံများသာ မီးလောင်ကျွမ်းခဲ့ပြီး သံကန်အတွင်း သိုလှောင်ထားသည့် ရေနံစိမ်းများ ပျက်စီးဆုံးရှုံးမှုမရှိကြောင်း၊ လက်ရှိမီးလောင်မှုဖြစ်ပွားခဲ့သည့် သိုလှောင်ကန် နှစ်ကန်အား အသုံးမပြုဘဲ အခြားရေနံစိမ်းသိုလှောင်ကန်များအား အသုံးပြုပြီး ထုတ်လုပ်ခြင်းလုပ်ငန်းများ ဆောင်ရွက်သွားမည်ဖြစ်ကြောင်း၊ စက်ရုံနှင့် ရေနံသိုလှောင်ကန်များ ပျက်စီးဆုံးရှုံးမှုမရှိဘဲ ရေနံစိမ်း သိုလှောင်ခြင်းနှင့် ထုတ်လုပ်ခြင်းလုပ်ငန်းများကို ပုံမှန်အတိုင်း လည်ပတ်ဆောင်ရွက်လျက်ရှိကြောင်း၊ ပြင်ပရှိ ဆက်သွယ်ထားသည့် ပိုက်လိုင်းအနည်း ငယ်သာပျက်စီးသွားပြီး ပိုက်လိုင်းအတွင်းရှိ ပိုက်လိုင်း ကျန်ရေနံစိမ်း ခန့်မှန်းဂါလန် ၃၅၀ ခန့်သာ ဆုံးရှုံးခဲ့ကြောင်း၊ ပြင်ပရှိပိုက်လိုင်းများ ပျက်စီးမှုများကို လည်း အမြန်ဆုံးပြုပြင်ဆောင်ရွက်နိုင်ရေး စီမံဆောင်ရွက်လျက်ရှိကြောင်း ရှင်းလင်းတင်ပြသည်။

 

ရှင်းလင်းတင်ပြခဲ့မှုများအပေါ် ဒုတိယဝန်ကြီးက မီးလောင်မှုဖြစ်ပွားရာတွင် အချိန်နှင့်တစ်ပြေးညီ ဝိုင်းဝန်းဆောင်ရွက်ခဲ့ကြသည့် တပ်နယ်၊ ခရိုင်၊ မြို့နယ်များရှိ မီးသတ်တပ်ဖွဲ့ဝင်များနှင့် စက်ရုံရှိ ဝန်ထမ်းများအား ကျေးဇူးတင်ဂုဏ်ပြုပါကြောင်း၊ ပျက်စီးဆုံးရှုံးသွားသည့် ပိုက်လိုင်းများအား ပြုပြင်ခြင်းလုပ်ငန်းများ ဆောင်ရွက်ကြရာတွင် ကုန်ထုတ်လုပ်မှုကို ထိခိုက်မှုမရှိအောင် စီမံ ဆောင်ရွက်ကြရန်လိုကြောင်း၊ ရေနံချက်စက်ရုံများသည် မီးလောင်ကျွမ်းနိုင်သည့် လောင်စာဆီများကို ကိုင်တွယ်အသုံးပြုရသည့် လုပ်ငန်းဖြစ်သည့်အတွက် အရေးပေါ်မီးဘေးအန္တရာယ်ဖြစ်ပေါ်လာပါက လူ၊ စက်၊ ပစ္စည်း အဆင်သင့်ရှိနေရန်လိုကြောင်း၊ ဝန်ကြီးဌာနအနေဖြင့်လည်း လက်ရှိစက်ရုံ၏ မီးသတ်ဝန်ထမ်းအင်အား၊ မီးသတ်ယာဉ်နှင့် အခြားဆက်စပ်ပစ္စည်းများကိုလည်း ပိုမိုလုံလောက်မှု ရှိစေရန် အမြန်ဆုံး ထပ်မံဖြည့်ဆည်း ဆောင်ရွက်ပေးသွားမည်ဖြစ်ကြောင်းမှာကြားပြီး စက်ရုံအတွင်း လှည့်လည်ကြည့်ရှု စစ်ဆေး၍လိုအပ်သည်များကို တာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေး ခဲ့ကြောင်း သိရသည်။

 

သတင်းစဉ်