လှိုင်မြို့နယ်၌ နိုင်ငံ့ဝန်ထမ်းပင်စင်စား အငြိမ်းစားများအား ကျန်းမာရေးစောင့်ရှောက်မှုလုပ်ငန်းများ ကွင်းဆင်းဆောင်ရွက်

 

လှိုင် ဇူလိုင် ၂၉

 

ရန်ကုန်တိုင်းဒေသကြီး လှိုင်မြို့နယ်တွင် နိုင်ငံ့ဝန်ထမ်းပင်စင်စား အငြိမ်းစားများအား ကျန်းမာရေးစောင့်ရှောက်မှုလုပ်ငန်းများ ကွင်းဆင်းဆောင်ရွက်ခြင်းကို ယမန်နေ့နံနက် ၈ နာရီက မြန်မာ့စီးပွားရေးဘဏ် (ကမာရွတ်ဘဏ်ခွဲ)တွင် ပြုလုပ်သည်။

 

ထိုသို့ဆောင်ရွက်ရာတွင် ရန်ကုန်မျက်စိအထူးကုဆေးရုံကြီးမှ ဆရာဝန်ကြီးများနှင့် မြို့နယ်ပြည်သူ့ကျန်းမာရေးဦးစီးဌာနမှ ဝန်ထမ်းများပူးပေါင်း၍ ကမာရွတ်ဘဏ်ခွဲသို့ ပင်စင်လာထုတ်သော နိုင်ငံ့ဝန်ထမ်း ပင်စင်စားအငြိမ်းစားများအား ဆီးချို၊ သွေးတိုးနှင့် မျက်စိစမ်းသပ် စစ်ဆေးခြင်း ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေးခဲ့ပြီး စုစုပေါင်း အငြိမ်းစားနှင့် ဝန်ထမ်း ၁၃၀ တို့အား နံနက် ၈ နာရီမှ မွန်းလွဲ ၂ နာရီအထိ စမ်းသပ်စစ်ဆေးဆောင်ရွက် ပေးခဲ့ကြသည်။

ဇော်ဇော်နိုင်(ပြန်/ဆက်)