တိုကျိုအပါအဝင် ဂျပန်နိုင်ငံ ကန်တို-ကိုရှင်ဒေသတွင် မိုးသည်းထန်စွာ ရွာသွန်းနိုင်

 

တိုကျို    စက်တင်ဘာ      ၂

ဂျပန်နိုင်ငံ မိုးလေဝသအာဏာပိုင်များက တိုကျိုမြို့အပါအဝင် ကန်တို- ကိုရှင် ဒေသတွင် လေထုအခြေအနေများ အလွန်မတည်ငြိမ်လာသည့်အတွက် စက်တင်ဘာ ၃ ရက်မှစ၍ မိုးသည်းထန်စွာရွာသွန်းနိုင်ကြောင်း သတိပေးထား သည်။

ဂျပန်မိုးလေဝသအေဂျင်စီ(JMA) ၏  ပြောကြားချက်အရ ရာသီအလိုက် မိုးတိမ်တောင်ဖြစ်ထွန်းမှုသည် ဂျပန်နိုင်ငံ တစ်ဝန်း တောင်ဘက်သို့ ရွေ့လျားလာမည်ဖြစ်ပြီး တောင်ဘက်မှ ပူနွေးပြီး စိုထိုင်းသောလေထုများလည်း ဝင်ရောက်လာမည်ဖြစ်ကြောင်းသိရသည်။

ကန်တို-ကိုရှင်ဒေသတွင် စက်တင်ဘာ ၃ ရက် အရုဏ်တက်ချိန်မှ  စက်တင်ဘာ ၅ ရက်ခန့်အထိ  မိုးသည်းထန်စွာ  ရွာသွန်းနိုင်ကြောင်း ခန့်မှန်းထားသည်။ စက်တင်ဘာ ၃ ရက်ညနေပိုင်းအထိ ၂၄ နာရီအတွင်း မိုးရေချိန်သည် မြောက်ပိုင်း ကန်တိုနှင့်ကိုရှင်ဒေသများတွင် ၈၀ မီလီမီတာအထိ ရှိနိုင်ပြီး ကန်တိုတောင်ပိုင်းတွင် ၆၀ မီလီမီတာအထိ ရှိနိုင်ကြောင်း ခန့်မှန်းထားသည်။

မိုးလေဝသအေဂျင်စီ တာဝန်ရှိသူများက မြေပြိုမှုများ၊ မြေနိမ့်ပိုင်းဒေသများတွင် ရေကြီးမှုများနှင့် မြစ်ရေမြင့်တက်မှုများအပြင် မိုးကြိုးပစ်ခြင်း၊ လေပြင်းများ ရုတ်တရက်တိုက်ခတ်ခြင်းနှင့် မိုးသီးကြွေခြင်းများ  ဖြစ်ပေါ်နိုင်သဖြင့်  ပြည်သူများအနေဖြင့်  သတိပြုနေထိုင်ကြရန် တိုက်တွန်းထားသည်။                              

အင်န်အိတ်ချ်ကေ