အင်ဒိုနီးရှား၌ မီးတောင်ပေါက်ကွဲမှုကြောင့် လေဆိပ်ပိတ်ခဲ့ရသဖြင့် ခရီးသည် သုံးသိန်းခွဲနီးပါး ထိခိုက်ခဲ့

ဂျကာတာ စက်တင်ဘာ ၈

 

အင်ဒိုနီးရှားနိုင်ငံတွင် Anak Krakatau မီးတောင်ပေါက်ကွဲမှုမှ မီးတောင်ပြာများ လွင့်စဉ်မှုဖြစ်ပွားပြီးနောက် လေဆိပ်များကို ပိတ်ထားခဲ့ရာ မြို့တော်ဂျကာတာရှိ Soekarno-Hatta အပြည်ပြည် ဆိုင်ရာလေဆိပ်နှင့် အခြားလေဆိပ်လေးခု၌ ယခုအခါ လေကြောင်းလိုင်းများ ပျံသန်းပြေးဆွဲမှု ပြန်လည်စတင်နေပြီဖြစ်ကြောင်း သယ်ယူပို့ဆောင်ရေးဝန်ကြီးဌာနက စက်တင်ဘာ ၈ ရက်တွင် ပြောသည်။

 

လေဆိပ်များပိတ်ထားစဉ် လေဆိပ်များ၌ လေယာဉ်စုစုပေါင်း ၁၇၈ စင်းရှိနေခဲ့ပြီး ပျံသန်းနိုင်စွမ်းနှင့် ဘေးကင်းမှုရှိ၊ မရှိ စစ်ဆေးရန် လိုအပ်သောကြောင့် အချို့လေကြောင်းလိုင်းများ ပျံသန်းပြေးဆွဲမှု ပြန်လည်စတင်နိုင်ရန် အချိန်အနည်းငယ်ကြန့်ကြာနိုင်ကြောင်း သယ်ယူပို့ဆောင်ရေးဝန်ကြီး ဒူဒီပူဝါဂန်ဒီက ပြောသည်။

 

အခြေခံအဆောက်အအုံနှင့် ဒေသဖွံ့ဖြိုးတိုးတက်ရေးဆိုင်ရာ ပေါင်းစပ်ညှိနှိုင်းရေးဝန်ကြီးဌာန၏ စက်တင်ဘာ ၇ ရက် ထုတ်ပြန်ချက်တွင် လေဆိပ်ပိတ်ပင်မှုကြောင့် လေယာဉ်ခရီးစဉ် ၂၉၆၁ ခုထက် မနည်းနှောင့်နှေးခြင်း၊ လမ်းကြောင်းပြောင်းလဲခြင်းနှင့် ဖျက်သိမ်းခြင်းတို့ပြုလုပ်ခဲ့ရပြီး ခရီးသည်ပေါင်း ၃၄၁၀၀၀ ထက်မနည်း ထိခိုက်မှုရှိခဲ့ကြောင်း ဖော်ပြထားသည်။

 

မီးတောင်ပေါက်ကွဲမှုကြောင့် အင်ဒိုနီးရှားနိုင်ငံတွင် လေဆိပ်ရှစ်ခုအထိ ပိတ်ထားခဲ့ရကြောင်း၊ Anak Krakatau မီးတောင်သည် စက်တင်ဘာ ၄ ရက်မှစတင်ကာ ပေါက်ကွဲမှုများဖြစ်ပွားလျက်ရှိပြီး စက်တင်ဘာ ၆ ရက်တွင် ပိုမိုပြင်းထန်သော ပေါက်ကွဲမှုများ ဖြစ်ပွားခဲ့ကြောင်းနှင့် စက်တင်ဘာ ၈ ရက်တွင် မီးတောင်ပေါက်ကွဲမှု သုံးကြိမ်ဖြစ်ပွားခဲ့ကြောင်း သိရသည်။

 

ဆင်ဟွာ