COP31 ရာသီဥတုညီလာခံကျင်းပသည့် အိမ်ရှင် တူကီယဲနိုင်ငံက ရာသီဥတုပြောင်းလဲမှု တိုက်ဖျက်ရေး ပူးပေါင်းဆောင်ရွက်ရန် တိုက်တွန်း

အန်ကာရာ နိုဝင်ဘာ ၉

 

တူကီယဲနိုင်ငံတောင်ပိုင်း အန်တာလျာမြို့၌ ၂၀၂၆ ခုနှစ် ကုလသမဂ္ဂရာသီဥတုပြောင်းလဲမှုဆိုင်ရာ ညီလာခံ COP31 ကို နိုဝင်ဘာ ၉ ရက်က စတင်ကျင်းပခဲ့သည်။ ညီလာခံဖွင့်ပွဲတွင် တူကီယဲနိုင်ငံ ပတ်ဝန်းကျင်၊ မြို့ပြနှင့် ရာသီဥတုပြောင်းလဲမှုဆိုင်ရာဝန်ကြီး မူရတ်ကူရမ်က ယခင် COP ညီလာခံများတွင် သဘောတူညီခဲ့သည့်အချက်များကို လက်တွေ့အကောင်အထည်ဖော်နိုင်ရေး နိုင်ငံအားလုံး ပူးပေါင်းဆောင်ရွက်ကြရန် တိုက်တွန်းခဲ့သည်။

 

ညီလာခံတွင် ဖန်လုံအိမ်ဓာတ်ငွေ့ ထုတ်လွှတ်မှုလျှော့ချရေးနှင့် ရာသီဥတုပြောင်းလဲမှု၏ သက်ရောက်မှုများကို လိုက်လျောညီထွေဖြစ်အောင် ဆောင်ရွက်ရေးတို့ကို ဆွေးနွေးသွားမည် ဖြစ်သည်။ ကမ္ဘာ့မိုးလေဝသအဖွဲ့ (WMO) ၏ ထုတ်ပြန်ချက်အရ ၂၀၂၆ ခုနှစ် ဇန်နဝါရီမှ စက်တင်ဘာလအတွင်း ကမ္ဘာ့ပျမ်းမျှအပူချိန်သည် စက်မှုခေတ်မတိုင်မီ ကာလထက် ၁ ဒသမ ၄၇ ဒီဂရီဆဲလ်စီးယပ် မြင့်တက်ခဲ့ကြောင်း သိရသည်။ ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်ကလည်း ကမ္ဘာကြီးသည် ရာသီဥတုပြင်းထန်သည့် ခေတ်သစ်တစ်ခုသို့ ရောက်ရှိနေပြီဖြစ်ကြောင်း သတိပေးပြောကြားခဲ့သည်။

 

ယခုညီလာခံတွင် ဩစတြေးလျနိုင်ငံက ဆွေးနွေးညှိနှိုင်းမှုများကို ဦးဆောင်မည်ဖြစ်ပြီး အိမ်ရှင်အဖြစ်လက်ခံကျင်းပသည့် တူကီယဲနှင့် ဩစတြေးလျနိုင်ငံတို့အကြား ပူးပေါင်းဆောင်ရွက်မှုသည် ရာသီဥတုဆိုင်ရာ သဘောတူညီချက်များကို လက်တွေ့အကောင်အထည်ဖော်နိုင်ရေးအတွက် အရေးပါလာမည်ဖြစ်သည်။

 

အင်န်အိတ်ချ်ကေ